1989 جىلى «قارتتار ءۇي» بولىپ اشىلعان مەكەمە 2016 جىلى الەۋمەتتىك كومەكتى قاجەت ەتەتىن جاندارعا شۋاعىن شاشار «شاراپات»-قا اينالعان. ورتالىقتا 24 پەن 96 جاس ارالىعىنداعى 320 ادام قىزمەت الادى. قىزمەت الۋشىلاردىڭ قاتارىندا ەلگە ەڭبەك ەتكەن ەلەۋلى پروفەسسورلار دا, سوت جۇيەسىندە جەمىستى جۇمىس ىستەگەن, ءتۇرلى سالانىڭ مايتالمان ماماندارى دا بار. ورتالىق ديرەكتورى رىستى جاعىپارقىزىنىڭ ايتۋىنشا, جاس كومەك الۋشىلار – كوبىنە ءى, ءىى توپ مۇگەدەكتەرى. «بۇل عيمارات – ەلباسىنىڭ ءوزى كەلىپ لەنتاسىن قيعان, زاماناۋي جابدىقتالعان, جىلۋلىق ءۇيى. ءبىز مەديتسينالىق, الەۋمەتتىك, پسيحولوگيالىق, قارجىلىق كومەك كورسەتەمىز. مەديتسينا بلوگىمىزدا فيزيوتەراپيالىق قىزمەت الۋعا بولادى. بۇدان بولەك ماسساج بولمەسى, ساۋنا, مەشىت, شىركەۋ, باسسەين بار. ازاماتتارىمىز 4 مەزگىل تاماقتانادى», دەيدى مەكەمە باسشىسى. ر. جاعىپارقىزىنىڭ سوزىنە سەنسەك, اتىن ايتپاي قايىرىمدىلىق ءىس ىستەيتىن جۇرەگى جومارت جاندار جەتەرلىك. ايتالىق, ءبىر كاسىپكەر ءۇش بىردەي شاعىن جىلىجاي سالىپ بەرسە, ەندى ءبىر قولى اشىق ازاماتتار رامازان ايىندا ورازا ۇستاعان 30 مۇسىلمانعا كۇن سايىن اۋىزاشار جاساپتى.
ءبىر-بىرىمەن شۇيىركەلەسە كەتەتىن شاراپاتتىقتار ءبىر شاڭىراق استىندا كوڭىل جاراستىرىپ, كەيبىرى ءتىپتى بۇدان بىلايعى ءومىرىن بىرگە وتكىزۋگە بەل بايلاپتى. قازىر ورتالىقتا 17 وتباسى كۇن كەشەدى. بۇل دا بولسا, مەكەمەنىڭ – وسى جەردەن كومەك الۋعا كەلگەندەرگە جاڭاشا ءومىر سىيلايتىن شاراپاتى مول شاڭىراق ەكەنىنە دالەل.
كەزدەسۋگە كەلگەن قارتتار ءجۇز جىلدان بەرى حالىقپەن بىرگە جاساپ كەلە جاتقان گازەتىمىزدىڭ قىسقا دا نۇسقا تاريحىمەن تانىستى, قازىرگى تىرشىلىگىنەن حاباردار بولىپ, ءوز ويلارىمەن ءبولىستى. گازەتىمىزدەگى «مادەنيەت جانە رۋحانيات» ءبولىمىنىڭ جەتەكشىسى تالعات باتىرحان قازاق ءباسپاسوزىنىڭ ايناسى, كوشباسشىسى بولعان باس باسىلىمنىڭ اتىنان «ءجۇز جىلدىق جىلناما» اتتى مەرەيتويلىق جيناعىمەن قوسا بىرنەشە كىتاپتاردى ورتالىقتىڭ كىتاپحاناسىنا سىيعا تارتتى. باسىلىم باسشىلىعى مەن ۇيىعان ۇجىمنىڭ ىستىق سالەمىن جەتكىزگەن جەتەكشىمىز بار تاراپتاعى جاڭالىقتىڭ جارشىسىنا اينالعان گازەت ەلدىڭ ماسەلەسىن ەكشەپ, ۇلتتىڭ ءسوزىن ۇستايتىنىن ايتتى.
ەگەمەندىكتەر جىلى جۇزدەسۋدەگى ادەمى اڭگىمەنى ولەڭمەن ورنەكتەدى, قارتتاردىڭ ساليقالى ءسوزىن انمەن ارلەپ, كۇيمەن كومكەردى. كەزدەسۋ سوڭىندا قاريالار «Egemen Qazaqstan» ۇجىمىنا تەلەگەي تابىس تىلەپ, باتاسىن بەردى.
