مۇرات قاستاەۆ بىزگە بەرگەن سۇحباتىندا «سايلاۋ قارساڭىندا ۆاليۋتا نارىعىندا دۇرلىگۋدىڭ بار ەكەنى بايقالادى, دەۆالۆاتسيا بولۋى مۇمكىن, ءسوزسىز دەۆالۆاتسيا بولادى دەگەن اقپاراتتار حالىقتىڭ اراسىندا شيەلەنىستىڭ تۋىنا اكەلۋدە. ءبىزدىڭ ويىمىزشا, دەۆالۆاتسيانىڭ بولۋىنا ەش سەبەپ جوق. نارىقتىڭ قانداي دا ءبىر ويىنشىلارى وسى تاقىرىپتى قوزدىرىپ, وسىنىڭ ارقاسىندا پايدا كورگىسى كەلەتىن سياقتى. ۇلتتىق بانكتىڭ ساياسي ەركى مەن بەلسەندى ۇستانىمى نارىقتى تىنىشتاندىرىپ, ونى تەپە-تەڭدىك جاعدايىنا اكەلۋگە ءتيىس», – دەپ جاۋاپ بەردى.
وسىعان دەيىن ۇلتتىق بانك توراعاسى ەربولات دوساەۆ جۋرناليستەرگە دەۆالۆاتسيا بولا ما, جوق پا دەگەن ماسەلەنى تالقىلاۋعا قۇلقى جوق ەكەنىن ايتقان ەدى.
الايدا 3 ماۋسىم كۇنى ول «بيىلعى جىلدىڭ مامىر ايىنداعى مۇناي باعاسى سياقتى فاكتورعا ءمان بەرەتىن بولساق, ۇلتتىق ۆاليۋتانىڭ السىرەۋى 0,4% (381,08 تەڭگەدەن 382,56 تەڭگەگە دەيىن) بولدى. 27 مامىردان باستاپ 3 ماۋسىمعا دەيىنگى ارالىقتا 1,2%-عا ء(بىر دوللار 379,86 تەڭگەدەن 383,94 تەڭگەگە دەيىن) السىرەگەن», – دەپ ءتۇسىندىردى ەربولات دوساەۆ.
ۇلتتىق بانك ۆاليۋتا نارىعىندا ۆاليۋتالىق ينتەرۆەنتسيا جاساعان-جاساماعانىن ايتپاي وتىر. اقش دوللارى مەن قازاق تەڭگەسى باعامى تۋرالى اقپاراتتاردا رەسمي بيلىكتىڭ ۇستانىمى ەمەس, ەل اۋزىنداعى جەل ءسوز جەڭىپ جاتىر. ءتىپتى كەشە ەلدە تيىنداردى اينالىمنان شىعارىپ تاستادى دەگەن حابار جەتتى.
ۇلتتىق بانك تە, قازاقستان قارجىگەرلەر قاۋىمداستىعى اتىنان ءسوز العان قارجىلىق قاۋىمداستىق تا بۇل اقپاراتتى ارانداتۋشىلىق دەپ تانىدى. سەبەبى ەاەو تۋرالى كەلىسىمشارتتا بىرىڭعاي ۆاليۋتالىق وداقتى قۇرۋ جانە بىرىڭعاي ۆاليۋتانى ەنگىزۋ قاراستىرىلماعان. ونىڭ الداعى 5 جىلدا قايتا كوتەرىلۋى مۇمكىن دە ەمەس. ولاردىڭ پايىمداۋىنشا, قارجىلىق رەتتەۋشىنىڭ بىرىڭعاي ورتالىق بانكىن قۇرىپ, وعان بىرىڭعاي ۆاليۋتانى ەنگىزۋدى ۇلتتىق ورگانداردان جوعارى تۇراتىن ورگانعا بەرمەيىنشە, بۇل مۇمكىن ەمەس شارۋا.
كەشە تۇستەن كەيىن KASE-دە قازاقستان پرەزيدەنتىنىڭ كەزەكتەن تىس سايلاۋى الدىنداعى سوڭعى كۇندىزگى ساۋدا بولدى. 9 ماۋسىم كۇنى قازاقستاندىقتار مەملەكەتتىڭ جاڭا باسشىسىن تاڭداۋعا بارادى, ودان كەيىن حالىقتىڭ ماۋسىمدا شەتەلدىك ۆاليۋتانى قانشالىقتى ساتىپ العانىن جانە ونىڭ قانشالىقتى پايدالى بولعانىن بىلەتىن بولامىز.
10 ماۋسىم كۇنى قازاق تەڭگەسىنىڭ نارىقتىق
باعاسى بەلگىلى بولادى.
