جيىننىڭ اشىلۋىندا ءسوز العان پرەمەر-ءمينيستردىڭ ورىنباسارى گۇلشارا ابدىقالىقوۆا قوناقتار مەن قاتىسۋشىلاردى قۇتتىقتاپ: «تسيفرلى قوعام مەن ءبىلىم ەكونوميكاسى بار جاڭا جاھاندىق وركەنيەت تۋىنداۋدا جانە ءبىزدىڭ ەلىمىز وسى ۋاقىت تالاپتارىنا ساي بولۋى كەرەك. ال جاستار ەلىمىزدىڭ قازىرگى الەمدەگى باسەكەگە قابىلەتتىلىگىنىڭ نەگىزگى فاكتورى بولۋى ءتيىس», دەدى. گ. ابدىقالىقوۆا فورۋم ماگيسترالدى يدەيالار مەن ادامي كاپيتالدى دامىتۋ جوبالارىن ازىرلەۋدىڭ جۇيەلىك الاڭىنا اينالعانىن اتاپ ءوتتى. پرەمەر-ءمينيستردىڭ ورىنباسارىنىڭ ايتۋىنشا, مەملەكەتتىك ساياساتتاعى باسىمدىقتاردىڭ ءبىرى – ءبىلىم بەرۋدى دامىتۋ. قازىر كوپدەڭگەيلى جۇيە جۇمىس ىستەۋدە, سونداي-اق زاڭنامالىق بازا جەتىلدىرىلۋدە. ۇدەمەلى دامۋدىڭ بىردەن ءبىر كۋاسى – جوعارى وقۋ ورىندارى سانىنىڭ 131-گە دەيىن ارتۋى. وندا 540 مىڭنان استام ستۋدەنت ءبىلىم الىپ جاتىر.
ءوز كەزەگىندە ءسوز العان نازارباەۆ ۋنيۆەرسيتەت پرەزيدەنتى شيگەو كاتسۋ بۇگىندە ءبىزدىڭ وزگەرمەلى, كۇتپەگەن, كۇردەلى جانە ءبىر ءماندى ەمەس الەمدە ءومىر سۇرەتىنىمىزدى ەسكە سالدى. «ءبىز ساندىق پروگرەسس, كومپيۋتەرلىك تەحنولوگيالاردى دامىتۋ, جاساندى ينتەللەكت, big data داۋىرىندە ءومىر سۇرەمىز. جاساندى ينتەللەكت جۇيەسى ءبىر جاعىنان ادام رەسۋرستارىن اۋىستىراتىن داۋىردە, بىراق ەكىنشى جاعىنان جاڭا ماماندىقتار ءۇشىن قاجەتتىلىك تۋعىزادى. الەم وزگەرىپ جاتىر, سوندىقتان بىزگە, جوعارى وقۋ ورىندارىنا, ستۋدەنتتەرگە ءبىزدىڭ كليەنتتەرىمىز رەتىندە ۇسىناتىن قىزمەتتەردى جاقسارتۋ ءۇشىن فورۋم تاقىرىبىنا قويىلعان سۇراققا جاۋاپتاردى انىقتاۋ ماڭىزدى», دەپ اتاپ ءوتتى.
