اپەننين تۇبەگىندە وتكەن جارىستا يسپانيانىڭ Movistar كلۋبىنىڭ سەركەسى ريچارد كاراپاستىڭ باق جۇلدىزى جاندى. جالپى ەسەپتىڭ جەڭىمپازى اتانعان ونىڭ ەسىمى گراند-تۋردا توپ جارعان ەكۆادور ەلىنىڭ تۇڭعىش ۆەلوشاباندوزى رەتىندە تاريحتا قالدى. وڭتۇستىك امەريكانىڭ وعلانىنان نەبارى ءبىر مينۋت جانە بەس سەكۋند قانا قالىپ قويعان باحرەيننىڭ Bahrain Merida كومانداسىنىڭ ساڭلاعى, يتاليالىق ۆينچەنتسو نيبالي ەكىنشى ورىن يەلەنسە, گوللانديانىڭ Jumbo-Visma كلۋبىنىڭ مۇشەسى سلوۆەنيالىق پريموج روگليچ ءۇشىنشى ساتىعا تابان تىرەدى. ول جەڭىمپازدان ەكى جارىم مينۋت ارتتا قالدى.
«استانانىڭ» ارلاندارى اراسىندا ەڭ ۇزدىك كورسەتكىشكە ميگەل انحەل لوپەس قول جەتكىزدى. كولۋمبيالىق سپورتشى جەتىنشى ورىنعا جايعاستى. سونىمەن قاتار, 25 جاستاعى سايىپقىران «دجيرو د'يتاليا» دوداسىنىڭ ەڭ ۇزدىك جاس ۆەلوشاباندوزىنا تيەسىلى «اق جەيدەنى» يەلەندى. جالپى قازاقستاندىق كوماندانىڭ ساپىندا ونەر كورسەتكەن ورەندەر وسى جارىستىڭ كەزەڭدىك سايىستارىندا ءۇش رەت جەڭىسكە جەتكەنىن دە ايتقان ءجون. اتاپ ايتساق, 7 مەن 20 كەزەڭدەردە پەلو بيلباو الدىنا جان سالماسا, 15 كەزەڭدە داريو كاتالدوعا تەڭ كەلەر ەشكىم تابىلمادى.
