«باقىتتى بالالىق شاقتىڭ كۇزەتىندە» دەگەن ۇرانمەن ءوتىپ جاتقان وسى يگى شارا قازاقستان رەسپۋبليكاسى ىشكى ىستەر مينيسترلىگى (قر ءىىم), ىشكى ىستەر ورگاندارى ء(ىىو) ارداگەرلەرى كەڭەسى جانە رەسپۋبليكالىق «دينامو» دەنە-شىنىقتىرۋ مەن سپورت قوعامىنىڭ مۇرىندىق بولۋىمەن ۇيىمداستىرىلىپ وتىر. بۇل كۇندەرى 7 مىڭنان اسا جاس ديناموشىلار, بالالار ءۇيىنىڭ تاربيەلەنۋشىلەرى, يۋۆەنالدى پوليتسيانىڭ تىركەۋىندە تۇرعان جاسوسپىرىمدەر جانە ءىىو قىزمەتكەرلەرىنىڭ بالالارى سپورتتىڭ بىرنەشە ءتۇرى بويىنشا سايىسقا تۇسۋدە.
جارىستىڭ اشىلۋ سالتاناتى الماتىداعى «دينامو» ستاديونىندا ءوتتى. «قر گەنەرالدار كەڭەسى» پرەزيديۋمىنىڭ توراعاسى, ادىلەت گەنەرال-مايورى رۇستەم حايداروۆ, ءىىو ارداگەرلەرى كەڭەسىنىڭ توراعاسى, ميليتسيا گەنەرال-مايورى ساعىنجان اسىل-كەنەي جانە تاعى باسقا اتاقتى ديناموشىلار كوپشىلىككە قۇتتىقتاۋ سوزدەرىن ارناپ, قاتىسۋشىلارعا اق جول تىلەدى.
جيىن بارىسىندا ءسوز العان داڭقتى بالۋان, گرەك-ريم كۇرەسىنەن قوس بىردەي وليمپيادا جۇلدەگەرى, الەم, ەۋروپا, ازيا چەمپيونى داۋلەت تۇرلىحانوۆ: «دينامو» ورتالىق كەڭەسى وسى اۋقىمدى شارانى بالالار كۇنى قارساڭىندا وتكىزۋدە. بۇل دا ءبىر قۇپتارلىق ءىس. قۇرمەتتى قوناق رەتىندە شاقىرىلعان مەن وسى جارىسقا قاتىسۋعا كەلگەن جاس ورەندەردىڭ كوپتىگىن كورىپ, ەرەكشە ءسۇيسىنىپ وتىرمىن. قازىرگى كەزدە بالالار ەرەسەك ومىرگە دايىندالۋدا. وسى جولدا ولار سپورتتى سەرىك ەتسە, نۇر ۇستىنە نۇر بولادى. مەن وسى باستامالارىڭىزدى تولىقتاي قۇپتايمىن. الداعى ۋاقىتتا دا ۇلكەن تابىستارعا جەتىڭىزدەر! – دەپ اقتارىلا سويلەدى.
– «دينامو» – مەنىڭ اجىراماس ءبىر بولىگىم, – دەپ قوستادى ءوز ارىپتەسىن, اتاقتى بوكسشى, ماسكەۋ وليمپياداسىنىڭ كۇمىس جۇلدەگەرى ۆيكتور دەميانەنكو. – ايتۋلى قوعامنان تالاي دارابوزدار شىققانى بارشاعا ءمالىم. ولار اسا ءىرى حالىقارالىق جارىستاردا ەلىمىزدىڭ سپورتتىق داڭقىن اسقاقتاتتى. مەن دە سپورتتىق جولىمدى ءدال وسى ستاديوندا باستاعانمىن. سول كەزدەگى كەرەمەت بوكس زالى كۇنى بۇگىنگە دەيىن كوز الدىمدا».
ءسوز كەزەگى تيگەندە ايگىلى ۆاتەرپولشى, داڭقتى «دينامونىڭ» سەركە ويىنشىسى, وليمپيادا چەمپيونى سەرگەي كوتەنكو: «وسىنداي ورىمدەي جاستاردىڭ سپورتقا مىقتاپ دەن قويعاندارىن كورىپ, ەرەكشە شاتتانىپ تۇرمىن. ەرتەڭگى كۇنى سول ورەندەردىڭ اراسىنان مىقتى سپورتشىلاردىڭ شىعاتىنىنا قىلاۋداي دا كۇمانىم جوق», – دەپ تەبىرەنە سويلەدى.
