وندا شىمكەنت قالاسى قوعامدىق دەنساۋلىق ساقتاۋ دەپارتامەنتىنىڭ باسشىسى ءابدىماناپ تولەباەۆ ءدارى-دارمەك ساۋداسىنا بايلانىستى سالالىق مينيسترلىكتىڭ تۇسىندىرمە جۇمىستارىن باياندادى.
شىمكەنت قالاسى دەنساۋلىق ساقتاۋ باسقارماسى, قوعامدىق دەنساۋلىق ساقتاۋ دەپارتامەنتى جانە فارماتسيا كوميتەتىنىڭ شىمكەنت قالاسى بويىنشا دەپارتامەنتى ۇيىمداستىرعان بريفينگتە ءدارىحانالاردا دارىلىك زاتتاردى دارىگەردىڭ رەتسەپتى بويىنشا ساتۋ ماسەلەسىنە تۇسىندىرمە جۇرگىزدى.
دەپارتامەنت باسشىسىنىڭ ايتۋىنشا بيىل ەلىمىزدە دەنساۋلىق ساقتاۋ مينيسترلىگىنە قاراستى فارماتسيا مەن قوعامدىق دەنساۋلىق ساقتاۋ كوميتەتتەرى بىرىكتىرىلىپ, تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى بولىپ قۇرىلۋدا.
«ءدارى-دارمەكتەردىڭ رەتسەپت بويىنشا ساتىلۋى قوعامدا ماڭىزدى ماسەلە بولىپ تۇر. دارمەكتەردى ءتيىمسىز قولدانۋدان ادامنىڭ دەنساۋلىعىنا زيان كەلتىرەتىن فاكتىلەر كەزدەسۋدە. 2018 جىلى ءدارىحانالاردا دارىگەردىڭ رەتسەپتىنسىز ءدارى ساتقان 24 جاعداي تىركەلىپ, شارا كورىلدى. زاڭ اياسىندا جۇمىس ىستەمەگەن جاعدايدا 70-تەن باستاپ 1000 اەك ايىپپۇلدار سالىنادى. اسىرەسە, تۇرعىندارعا انتيبيوتيكتەرمەن ەمدەلۋدە دارىگەردىڭ كەڭەسى مەن ولار جازىپ بەرگەن رەتسەپت بويىنشا ەم الۋعا كەڭەس بەرەمىز. ويتكەنى ءوز بەتىمەن نەمەسە تامىر-تانىستاردىڭ ايتۋىمەن انتيبيوتيكپەن ەمدەلۋ قاۋىپتى اۋرۋلارعا سوقتىرادى», دەدى قر دسم فارماتسيا كوميتەتىنىڭ شىمكەنت قالاسى بويىنشا دەپارتامەنتىنىڭ باسشىسى ل. قاشقىمباەۆا.
سالا ماماندارى دارىلىك زاتتاردى قابىلداۋدا ونى ساتۋ بويىنشا دارىگەرلەر مەن جەكە كاسىپكەرلەرگە قولدانىستاعى تالاپتاردىڭ قاعيدالارىن ساقتاۋ قاجەتتىگىن اتاپ ءوتتى.
مامانداردىڭ ايتۋىنشا, ەلىمىزدە دارىلىك زاتتاردىڭ 7 792 اتاۋى تىركەلگەن, ونىڭ 6 033-ءى دارىگەردىڭ رەتسەپتى بويىنشا, 1759-ى رەپەتسپتسىز ساتىلادى.
قازىرگى تاڭدا شىمكەنتتە 1180 ءدارىحانا جۇمىس ىستەيدى. ونداعى ماماندار دارىلىك پرەپاراتتاردى ساتۋ بويىنشا تۇرعىندارعا ءتۇسىندىرۋ جۇمىستارىن جۇرگىزەدى.
