پرەمەر-مينيستر اسقار مامين بۇل يگى ءىستىڭ ەلباسى نۇرسۇلتان نازارباەۆتىڭ باستاماسىمەن قولعا الىنعانىن اتاپ ءوتتى. «وڭىرلىك جانە جالپى دامۋدى كوزدەيتىن ورتاق پالاتا ەلباسى باستاماسىمەن ۇسىنىلعان بولاتىن. قازاقستان ۇكىمەتى بۇل باستامانى الداعى ۋاقىتتا دامىتۋعا, مەملەكەتتەر اراسىنداعى ىنتىماقتاستىقتى ارتتىرۋعا بارىنشا كۇش سالادى. اتالعان شارالار تۇركى ەلدەرىندەگى جەكە سەكتور ءۇشىن دە وتە ءتيىمدى, ەندى بۇل ىنتىماقتاستىقتان ناقتى ناتيجە كۇتەمىز», دەدى پرەمەر-مينيستر. ونىڭ ايتۋىنشا, تۇركى ەلدەرى ساۋدا-ونەركاسىپ پالاتاسىنىڭ نەگىزگى ماقساتى – قۇرامىنا كىرگەن ەلدەر اراسىنداعى ەكونوميكالىق بايلانىستى دامىتۋ ءارى نىعايتۋ. ال ورتاق پالاتاعا قوسىلعان ەلدەر ورتاق مىندەتتەردى ءبىرلەسە انىقتاماق. اتاپ ايتقاندا, ءتۇركىتىلدەس مەملەكەتتەردە ونەركاسىپ جانە اۋىل شارۋاشىلىعىن دامىتۋ; ساۋدا, قىزمەت كورسەتۋ, ونەركاسىپ, شاعىن جانە ورتا كاسىپورىندار, كاسىپكەرلىك, اۋىل شارۋاشىلىعى, ىشكى تۋريزم جانە قولونەر سالاسى, كەدەن, كولىك, اقپاراتتىق تەحنولوگيا جانە باسقا دا ءوزارا ءتيىمدى سالالاردى دامىتۋ; تۇركى ەلدەرى كەڭەسىنە مۇشە مەملەكەتتەردىڭ ەكونوميكالىق جانە ىسكەرلىك ءمۇددەلەرىن قورعاۋعا باعىتتالعان ۇسىنىستاردى ازىرلەۋ, ءوزارا يننوۆاتسيالىق مۇمكىندىكتەردى العا تارتىپ, بىرلەسكەن كاسىپورىنداردى دامىتۋعا اتسالىسۋ; تۇركى ەلدەرى اراسىنداعى تاۋار تاسىمالىن جولعا قويۋ, سونداي-اق ءوزارا تاۋار ءجانە قىزمەت تۇرلەرىمەن الماسۋعا توسقاۋىل بولاتىن كەدەرگىلەردى جويۋ, ت.ب.
تۇركى كەڭەسىنىڭ باس حاتشىسى باعدات امىرەەۆ قازاقستاندا قۇرىلعان تۇركى ەلدەرىنە ورتاق پالاتانىڭ وعان قوسىلعان مەملەكەتتەر اراسىنداعى ساۋدا-ونەركاسىپتە عانا ەمەس, تۋريزم, ءبىلىم جانە باسقا دا سالالاردا تىعىز قارىم-قاتىناس ورناتۋدىڭ ماڭىزدى قۇرالى بولاتىنىن جەتكىزدى. «بۇگىنگى باسقوسۋ ەلدەردىڭ ەكونوميكالىق, ساۋدا-ساتتىق سالالارىنداعى دوستىعىن نىعايتۋعا سەپتىگىن تيگىزەدى دەپ سەنەمىن», دەدى ب.امىرەەۆ. سونداي-اق ول تۇركى ەلدەرىنىڭ كەڭەسىنە قازىرگى تاڭدا ءتوراعالىق ەتىپ وتىرعان قىرعىزستان بولعاندىقتان, كەڭەستىڭ كەلەسى سامميتى باكۋدە وتەتىنىن ايتتى. قازان ايىنا جوسپارلانعان اۋقىمدى شارا كەڭەسكە مۇشە مەملەكەتتەردىڭ ەكونوميكالىق ىنتىماقتاستىعىنا باعىتتالماق.
ال ازەربايجان ۇلتتىق كاسىپكەرلەر (جۇمىس بەرۋشىلەر) كونفەدەراتسياسىنىڭ پرەزيدەنتى مامەد مۇساەۆ پالاتانىڭ شەتەلدىك ينۆەستيتسيانى تارتۋعا زور ىقپال ەتە الاتىنىن ايتتى. بۇل ءۇشىن تۇركى كەڭەسىن دە مۇشە مەملەكەتتەردىڭ بىرلەسكەن ينۆەستيتسيالىق قورى قۇرىلماق. «تۇركى كەڭەسىنىڭ بيزنەس فورۋمىندا تۇركىتىلدەس ەلدەردىڭ جاڭا ينۆەستيتسيالىق قورىن قۇرۋدى جوسپارلاپ وتىرمىز. سوندىقتان بۇگىنگى قۇجاتىمىز تۇركىتىلدەس ەلدەرىندە ورتا جانە شاعىن بيزنەس, اۋىل شارۋاشىلىعى سالاسىنداعى كاسىپكەرلىكتى دامىتۋعا جانە تاعى باسقا سالالاردا ءوزارا ىنتىماقتاستىق ورناتا وتىرىپ, دامۋعا سەرپىن بەرەدى», دەدى م.مۇساەۆ.
ايتا كەتەيىك, بۇگىندە تۇركى ەلدەرىنىڭ ءىجو كولەمى 1 ترلن دوللاردان, حالقىنىڭ سانى 150 ملن-نان اسادى. بۇل ەلدەر جىل سايىن 260 ملرد دوللاردان استام سوماعا ءونىم يمپورتتايدى. ءوز كەزەگىندە, ورتاق پالاتا وسى ەلدەر اراسىنداعى ءونىم ءوندىرىسىن ارتتىرۋ ءۇشىن نەگىز بولادى, ياعني ۇجىمدىق يمپورت الماستىرۋشىلىقتى قامتاماسىز ەتەدى.
