سەميناردىڭ اشىلۋىندا ءسوز العان نازارباەۆ ۋنيۆەرسيتەت الەۋمەتتىك گۋمانيتارلىق عىلىمدار مەكتەبىنىڭ دەكانى دەنيەل پيۋ بىرنەشە جىلدان بەرى جۇمىس ىستەپ كەلە جاتقان بىرلەستىكتىڭ جوعارى وقۋ ورىندارى وقىتۋشىلارىن عانا ەمەس, مەكتەپ مۇعالىمدەرىن دە تارتۋدى قولعا العانىن جەتكىزدى. ال اتالعان وقۋ ورنىنداعى قازاق ءتىلى جانە تۇركىتانۋ دەپارتامەنتىنىڭ مەڭگەرۋشىسى مۇددەلى مامانداردى قازاق ءتىلىنىڭ مارتەبەسىن كوتەرۋگە اتسالىسۋدى ماقسات ەتكەن بىرلەستىكپەن بەلسەندى قارىم-قاتىناس ورناتۋعا شاقىردى.
سپيكەرلەر اراسىندا العاشقىلاردىڭ ءبىرى بولىپ ش.شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعىنىڭ مامانى, ۇكىمەتتە ماقۇلدانعان لاتىن ءالىپبيى نۇسقاسى اۆتورلارىنىڭ ءبىرى انار فازىلجان بايانداما جاساپ, لاتىن ءالىپبيىنىڭ ەملە ەرەكشەلىكتەرىن ءتۇسىندىردى. ول بايانداماسىنىڭ باسىندا ءالىپبي مەن ونىڭ ەملەسىن جاساپ شىققان توپتىڭ ءۇلكەن جاۋاپكەرشىلىكپەن قوسا قاجىرلى ەڭبەك ەتىپ وتىرعانىن جەتكىزدى. «ءبىر جاعىمىزدا كيريلل گرافيكاسىنان الىستاعىسى كەلمەيتىن ورىستىلدىلەر, ەكىنشى جاعىمىزدا ءتىل تازالىعىنىڭ ساقتالۋىن قالايتىندار, ءۇشىنشى جاقتا بولاشاقتىڭ كوزقاراسىمەن قارايتىن جاس بۋىن بار. وسى ءۇش توپتىڭ كوڭىلىنەن شىعاتىن ءالىپبي جوباسىن جانە جازۋعا وڭاي بولاتىن ەملەسىن جازىپ شىعۋ وڭاي ەمەس. دەسە دە كوپتەگەن ەل لاتىن گرافيكاسىنا ءوتتى, بىرقاتارى ءوتۋدى جوسپارلاپ جاتىر. باستىسى لاتىن ءالىپبيى الەمدىك ءتىل سانالاتىن اعىلشىن گرافيكاسىنا ۇقسايتىنىمەن دە ءورىسى كەڭ. سوندىقتان اتا-انالار اياسى تارىلىپ بارا جاتقان كيريلل گرافيكاسىمەن ەمەس, لاتىن گرافيكاسىمەن وقىتاتىن مەكتەپتەرگە بەرگەنى ءجون», دەيدى ول.
باعدارلاما بارىسىندا شەبەرلىك ساباعىن وتكىزگەن كيمەپ ۋنيۆەرسيتەتىنىڭ پروفەسسورى زاۋرەش ەرنازاروۆا ورىس سىنىبىن ءبىتىرىپ ۋنيۆەرسيتەتكە كەلگەن ستۋدەنتتەردىڭ سوڭعى ون شاقتى جىلداعى دەڭگەيى ءتۇسىپ كەتكەنىن تىلگە تيەك ەتتى. «2008-2009 جىلدارى بالالار ادەتتە قازاق ءتىلىن intermediate دەڭگەيىندە ءبىلىپ كەلەتىن. ال قازىر pre-intermediate, ءتىپتى elementary دەڭگەيىندە ءبىلۋى كوپ كەزدەسەدى. 11 جىل بويى قازاق ءتىلىن وقىسا دا, نەگە 4 دەڭگەيدى مەڭگەرىپ كەلمەيدى؟ وسىنى زەرتتەپ جاتقان عالىمدار از. مەنىڭ پايىمداۋىمشا, ونىڭ سەبەبى – قوعامدىق قاجەتتىلىكتىڭ ازايعانى. سونىمەن قاتار اتا-انالاردىڭ اراسىندا 90-شى جىلداردان بەرىگە دەيىن جاپپاي قازاقتانۋ قارقىندى بولدى. ال بەرتىن كەلە قاجەتتىلىك جوعالىپ بارادى», دەيدى. ز.ەرنازاروۆا. ونىڭ ايتۋىنشا, ورىس نەمەسە باسقا ءتىلدى سىنىپ بالالارىنىڭ قازاقشاعا شورقاق بولۋىنا ءتىلدى ۇيرەتۋدىڭ زامان تالابىنا ساي ادىستەمەسىنىڭ بولماۋى اسەر ەتىپ وتىر. «مىسالى, ەسسە جازۋ دەگەن تاپسىرما بار. بىراق مۇعالىمنىڭ وزىنە سول ەسسەنى قالاي جازدىرۋ كەرەكتىگىن كورسەتەتىن ادىستەمە جوق», دەدى پروفەسسور. وعان قوسا وقۋلىقتار ءوز الدىنا, ونى تولىقتىراتىن, بالالاردىڭ قىزىعۋشىلىعىن ارتتىراتىن قوسىمشا وقىتۋ قۇرالدارىنىڭ جوقتىعى دا قول بايلايتىن كورىنەدى.
بەس كۇنگە سوزىلاتىن سەمينار-ترەنينگتە قازاق ءتىلىن اكادەميالىق تىلگە اينالدىرۋ, عىلىمدى قازاقشا سويلەتۋ, مۋزىكا ارقىلى ۇيرەتۋ, وقىتۋ قۇرالدارىن جەتىلدىرۋ بويىنشا ۋنيۆەرسيتەتارالىق ءتاجىريبە الماسۋ جوسپارلانعان. سونداي-اق كانادادان كەلگەن, اكادەميالىق اعىلشىن ءتىلى بويىنشا ءدارىس بەرەتىن نازارباەۆ ۋنيۆەرسيتەتتىڭ وقىتۋشىسى Deanne Cobb-Zygadlo, تۇركيادان كەلگەن ءتىل مامانى Tugba Yildirim, اقش-تان كەلگەن لينگۆيست Erik Aasland ءوز تاجىريبەلەرىمەن بولىسپەك. ايتا كەتەيىك, قازاقستاندا 7-8 جىل تۇرعان اتالعان لينگۆيست عالىم ەلىمىزدەگى بەس ءوڭىردى ارالاپ, جاستار اراسىندا ماقال-ماتەلدەردىڭ قولدانىلۋ اياسى تۋرالى عىلىمي جوباسىن تانىستىرادى.
