وسى جيىندا قاراعاندى قالاسىنىڭ اكىمى نۇرلان اۋباكىروۆ وبلىس ورتالىعىنداعى اۋلالاردى اباتتاندىرۋ بويىنشا ءۇش جىلعا ارنالعان جۇمىس جوسپارىمەن تانىستىردى. مىسالى, بيىل قالادا 100 اۋلا جوندەۋدەن وتكىزىلەدى. ال 2020 جىلى 123 اۋلانى اباتتاندىرۋ جوسپاردا بار. ياعني, كەلەسى جىلدىڭ اياعىنا تامان قاراعاندى قالاسىندا بارلىق اۋلا جونگە كەلتىرىلەدى دەپ مالىمدەدى قالا باسشىسى.
قازىرگى تاڭدا اتالعان جۇمىستارمەن اينالىساتىن مەردىگەر كومپانيالار انىقتالعان. اباتتاندىرۋدىڭ ءبىرىنشى كەزەڭىندە اۋلانى اسفالتتاۋ, جارىقتاندىرۋ, جيەك تاستار, ورىندىقتار جانە قوقىس جاشىكتەرىن ورناتۋ جۇمىستارى جۇرگىزىلەدى. ال 2020 جىلى ىسكە اسىرىلاتىن ەكىنشى كەزەڭ جوسپارى بويىنشا اۋلالاردا سالىناتىن بالالار جانە سپورت الاڭدارىنىڭ قۇرىلىسى جوسپارلانعان.
