زاعيپا باليەۆا ءوز سوزىندە ماجىلىستە زاڭ شىعارۋ قىزمەتى تۋرالى, ونىڭ ىشىندە, ەلباسىمىز نۇرسۇلتان ءابىش ۇلى نازارباەۆتىڭ باستاماسىمەن قابىلدانعان زاڭدار تۋرالى, الەۋمەتتىك ماڭىزدى قادامدار تۋرالى جان-جاقتى باياندادى.
- «Nur Otan» پارتياسىنىڭ ءحىح سەزىندە ەلباسى الەۋمەتتىك سالانى دامىتۋدىڭ كەشەندى ءۇش باعىتىن بەلگىلەدى, ونىڭ ءىشىن تۇرمىسى تومەن وتباسىلار مەن كوپ بالالى انالاردى قولداۋ, تابىسى از ازاماتتاردىڭ تۇرعىن ۇيگە قول جەتكىزۋ ماسەلەسىن شەشۋ جانە ءبىلىم مەن دەنساۋلىق سالالارىن جاقسارتۋ,وڭىرلەردى كەشەندى دامىتۋ ماسەلەلەرى اسا وزەكتى. وسى باعىتتا كوپتەگەن ناقتى شارالار قولعا الىنىپ جاتىر. وسى ورايدا, «Nur Otan» ەلىمىزدىڭ جەتەكشى ساياسي پارتياسى رەتىندە العا قويىلعان بارلىق مىندەتتەردىڭ ورىندالۋىن ۇيىمداستىرۋمەن قاتار, ولاردىڭ ساپاسىنا دا تۇراقتى تۇردە باقىلاۋ جۇرگىزەدى», - دەپ اتاپ ءوتتى ز. باليەۆا.
سونداي-اق دەپۋتاتتار قازاق ۇلتتىق اگرارلىق ۋنيۆەرسيتەتىنىڭ پروفەسسورلىق-وقىتۋشىلار قۇرامىنىڭ پىكىرلەرىن تىڭداپ, ەلىمىزدىڭ اۋىل شارۋاشىلىعىن جاڭعىرتۋ ماسەلەلەرىن تالقىلادى.
وسى ورايدا, دەپۋتات ا. داۋرەنباەۆ اۋىلدى وركەندەتۋدىڭ وزەكتى سۇراقتارىن العا تارتا كەلىپ, زامان اعىمىنا ساي ەلدى مەكەندەردى عالامتور جەلىسىمەن قامتۋدىڭ ماڭىزدىلىعىنا نازار اۋداردى.
كەزدەسۋ بارىسىندا ءوزارا سۇراق-جاۋاپتارعا كەزەك بەرىلىپ, ۇسىنىس-پىكىرلەر ايتىلدى.
