تاياۋدا «بالداۋرەن» رەسپۋبليكالىق وقۋ-ساۋىقتىرۋ ورتالىعىنىڭ بازاسىندا جاستار جىلى شەڭبەرىندە «دەنە شىنىقتىرۋ ءپانىنىڭ ۇزدىك مۇعالىمى-2019» ءىۇ رەسپۋبليكالىق بايقاۋى وتكىزىلدى. بىردەن ايتا كەتەيىك, بايقاۋدىڭ نەگىزگى ماقساتى دەنە تاربيەسى ءپانى مۇعالىمدەرىنىڭ كاسىبي بىلىكتىلىگىن جەتىلدىرۋ. ەلىمىز بويىنشا ءپان مۇعالىمدەرىنىڭ ءبىلىمى مەن بىلىگى, كاسىبي شەبەرلىكتەرى سىن تەزىنە تۇسكەن بۇل بايقاۋدى قازاقستان رەسپۋبليكاسى ءبىلىم جانە عىلىم مينيسترلىگىنىڭ قولداۋىمەن ۇلتتىق دەنە تاربيەسى عىلىمي-تاجىريبەلىك ورتالىعى وتكىزىپ وتىر. جاستار جىلى شەڭبەرىندە بولعاندىقتان, بايقاۋعا وتىز جاسقا دەيىنگى تالاپكەرلەر قاتىستى. تەك جاسى عانا ەمەس, تاجىريبەسى دە ەسكەرىلگەن. ۇمىتكەرلەردىڭ جالپى ءبىلىم بەرەتىن مەكتەپتەردە ءوز ءپانى بويىنشا جۇمىس ىستەگەن جەتى جىلدىق تاجىريبەسى بولۋى شارت.
رەسپۋبليكالىق سىناققا ءوز وڭىرلەرى ۇكىلەپ ءۇمىت ارتقان كىل جۇيرىكتەر جينالدى. ولاي بولاتىندىعى, الدىمەن اۋداندىق, وبلىستىق بايقاۋلار ۇيىمداستىرىلىپ, جۇزدەن جۇيرىك, مىڭنان تۇلپار شىققاندار سىن تەزىنەن وتكىزىلگەن. بۋرابايدىڭ باۋرايىنداعى كورىگى قىزعان بايقاۋعا نۇر-سۇلتان, الماتى قالالارىمەن قاتار, ەلىمىزدىڭ 13 وبلىسىنان جانە «بالداۋرەن», «بالداۋرەن-شىمكەنت» رەسپۋبليكالىق وقۋ-ساۋىقتىرۋ ورتالىقتارىنىڭ وكىلدەرى قاتىستى.
الدىمەن سالتاناتتى اشىلۋ ءراسىمى وتكىزىلدى. كاسىبي بىلىكتىلىكتەرىن ساراپقا سالعالى تۇرعانداردىڭ الدىندا «بالداۋرەن» ورتالىعىنىڭ باس ديرەكتورى مۇحيتدين تولەپباي جانە بايقاۋدىڭ باس تورەشىسى, ۇلتتىق دەنە تاربيەسى عىلىمي-تاجىريبەلىك ورتالىعىنىڭ ديرەكتورى سادىق مۇستافاەۆ ءسوز سويلەپ, اتالمىش بايقاۋدىڭ ءمان-ماڭىزىنا تەرەڭىرەك توقتالىپ ءوتتى. شەشەندەردىڭ ايتۋىنا قاراعاندا, مۇنداي جيىن وتكىزۋدىڭ پايداسى مول. بىرىنشىدەن, ەلىمىزدىڭ ءار تۇكپىرىنەن كەلىپ وتىرعان ۇمىتكەرلەردىڭ بويىنداعى كاسىبي ءبىلىم-بىلىكتىلىگى ارقىلى ءار ايماقتا دەنە تاربيەسى ءپانىنىڭ قانشالىقتى دامۋ ۇستىندە ەكەندىگىن ساراپتاۋعا بولادى. ەكىنشىدەن, ءوزارا باق سىناسقان ءپان مۇعالىمدەرى ارىپتەستەرىنىڭ وزىق ءادىس-تاسىلدەرىن, ءتالىمدى تاجىريبەلەرىن تەرەڭىرەك تانىپ, بويلارىنا سىڭىرەدى. اينالىپ كەلگەندە, ۇزدىككە ىلەسۋ ارقىلى ورتاق ءىس العا جىلجيدى.
بايقاۋ بارىسىندا بىلىكتىلىكتى ساراپتاۋ جانە جاڭاشىل پەداگوگ باعىتتارى بويىنشا تالاپكەرلەردىڭ ورەسى تارازى باسىنا تارتىلدى. العاشقى سىناقتا ءپان مۇعالىمدەرى دەنە تاربيەسى بويىنشا 30 سۇراقتان تۇراتىن ساۋالناماعا ءجۇز مينۋتتىڭ ىشىندە جاۋاپ بەرسە, 20 سۇراقتان تۇراتىن پەداگوگيكا جانە وقىتۋ ادىستەمەلەرى ورايىنداعى بىلىكتىلىكتەرى بەزبەنبەلدى. سونداي-اق, وسى باعىتتا ءار مۇعالىم باسكەتبول, ۆولەيبول ءتارىزدى سپورت تۇرلەرىنەن ناقتى ءىس-قيمىل ۇلگىلەرىن كورسەتتى.
بايقاۋدىڭ ەكىنشى كەزەڭىندە قاتىسۋشىلار ءوز ماماندىقتارىنا وراي وزىق ويلارىمەن, ىلكىمدى ىستەرىمەن, ناتيجەلى جۇمىستارىمەن ەرەكشەلەندى. ءپاندى وقىتۋ بارىسىنداعى تيىمدىلىگى مول جاڭالىقتارىمەن ءبولىستى.
بايقاۋدىڭ ءۇشىنشى, ءتورتىنشى كەزەڭدەرى دە قىزعىلىقتى ءارى تارتىستى ۇيىمداستىرىلدى. اشىق ساباق وتكىزىلدى. مەكتەپتەگى سپورت شارالارىن ۇيىمداستىرۋدىڭ ۇزدىك ۇلگىلەرى ساراپشىلاردىڭ نازارىنا ۇسىنىلدى. ماسەلەن, 5-9 سىنىپتاردا بۇل ءپان ءبىلىم بەرۋ سالاسىنداعى جاڭارتىلعان باعدارلاما بويىنشا وتكىزىلەدى. جارىستىڭ ءبىر ەرەكشەلىگى, كونكۋرسقا قاتىسۋشىلار تاقىرىپتاردى وزدەرى تاڭداپ الدى.
قازىلار القاسىنىڭ شەشىمىمەن باس جۇلدە باتىس قازاقستان وبلىسىنىڭ وكىلى ابزال ناۋرىزباەۆقا بۇيىرسا, ءبىرىنشى ورىنعا جامبىل وبلىسىنان دميتري ۆورونكو, ەكىنشى ورىنعا ماڭعىستاۋ وبلىسىنىڭ وكىلى كوبەن نۇرسۇلتان يە بولدى. ال, ءۇشىنشى ورىن اقتوبە وبلىسىنان كەلگەن سامعات ەسقاراەۆقا بۇيىردى.
بۋراباي اۋدانى,
اقمولا وبلىسى
