رەسمي اشىلۋدان كەيىن بەلگىلى ونەر قايراتكەرلەرى شىعارماشىلىقپەن اينالىساتىن جاستارمەن كەزدەستى. شاراعا اكادەميانىڭ ونەرپاز ستۋدەنتتەرىمەن قاتار, بۇگىندە قازاق ەستراداسىندا وزىندىك ورنى بار «ەسترادالىق ونەر» فاكۋلتەتىنىڭ ماگيسترانتتارى دينارا سۇلتان, ايقىن ءتولەپبەرگەن, سونداي-اق وسى فاكۋلتەتتىڭ ستۋدەنتى ەرنار ايدار كەلگەندەردىڭ الدىندا ونەر كورسەتتى.
جۇرگەنوۆ اتىنداعى قازاق ۇلتتىق ونەر اكادەمياسىندا ءداستۇرلى «اشىق ەسىك كۇنى» اياسىنداعى شاراعا قازاقستاننىڭ ەڭبەك سىڭىرگەن قايراتكەرى, «ازيانىڭ ۇزدىك اكتريساسى» سامال ەسلياموۆا قۇرمەتتى قوناق رەتىندە قاتىسىپ, قۇتتىقتاپ ءسوز سويلەدى. «اشىق ەسىك كۇنى» جاريالانعان ەڭ جاعىمدى جاڭالىق – الداعى جاڭا وقۋ جىلىندا «ۇلتتىق ونەر» فاكۋلتەتىنىڭ ىشىنەن «ايتىسكەر اقىن» ماماندىعى اشىلادى. «ايتىسكەر اقىن» ماماندىعى بويىنشا كۋرسقا قابىلداۋعا بەلگىلى اقىن, بۇگىنگى ايتىس ونەرىنىڭ اقتاڭگەرى, قازاقستاننىڭ ەڭبەك سىڭىرگەن قايراتكەرى ءجۇرسىن ەرمان ارنايى شاقىرىلدى. اكادەميا رەكتورى اسحات ماەميروۆ مادەنيەت جانە سپورت مينيسترلىگى, ت.جۇرگەنوۆ اتىنداعى قازاق ۇلتتىق ونەر اكادەمياسى اكادەميالىق عىلىمي كەڭەسىنىڭ شەشىمىمەن ەرمان ءجۇرسىن مولداش ۇلىنا «قۇرمەتتى پروفەسسور» اتاعى بەرىلگەندىگىن حابارلاپ, كۋالىگىن تابىستادى. ءجۇرسىن ەرمان ءوز سوزىندە: «ءبىر كەزدەرى ءوزىمىز ءتالىم العان قازاق ۇلتتىق ونەر اكادەمياسى عيماراتىنا كەلىپ, وسىنداي قۇتتى كۇنى توسىن سىيعا يە بولىپ تۇرمىن. بۇل مەنىڭ ۇزاق جىلعى ەڭبەگىمە جاسالعان قوشەمەت دەپ ويلايمىن. قازىر عانا جاڭادان اشىلىپ جاتقان «ايتىسكەر اقىن» ماماندىعىنا وقۋعا ءتۇسكىسى كەلەتىن تالاپكەرلەردى تىڭداپ جاتىرمىز. ەل ءىشى – التىن قازىنا. ارينە, تالانتتى بالالار بار. قازىلار القاسى اتىنان وسى جاستاردىڭ اراسىنان قازاق ونەرىنىڭ تۋىن كوككە كوتەرەر تالانتتاردىڭ شىعاتىنىنا كامىل سەنەمىز. ەلدەن كەلگەن بالالار ونەرىن تانىتىپ جاتىر. اشىق ەسىك كۇنىندە اكادەميا تابالدىرىعىن اتتاعىسى كەلەتىن تالاپكەرلەردىڭ بارلىعىنا تابىس تىلەيمىن. ءبىزدىڭ بولاشاعىمىز سىزدەردىڭ قولدارىڭىزدا, جەڭىسكە جەتە بەرىڭىزدەر!», دەپ اعالىق ىقىلاسىن ءبىلدىردى.
