وسىعان وراي پارتيانىڭ باستاماسىمەن مەملەكەتتىك باعدارلامالار مەن رەفورمالاردى جۇزەگە اسىرۋدىڭ تيىمدىلىگىن باعالاۋ جانە مونيتورينگ ءجۇرگىزۋ ورتالىعى قۇرىلدى. اتالعان ورتالىقتىڭ العاشقى وتىرىسى ءوتىپ, وندا بيزنەستى قولداۋعا جانە دامىتۋعا ارنالعان «بيزنەستىڭ جول كارتاسى-2020» مەملەكەتتىك باعدارلاماسىنىڭ جۇزەگە اسىرىلۋ بارىسى تۋرالى ەسەپ تىڭدالدى.
وتىرىسقا Nur Otan پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ, ۇلتتىق ەكونوميكا ءمينيسترى رۋسلان دالەنوۆ, «اتامەكەن» ۇكپ باسقارما توراعاسى ابىلاي مىرزاحمەتوۆ, پارلامەنت ءماجىلىسىنىڭ دەپۋتاتتارى, «دامۋ» كاسىپكەرلىكتى قولداۋ قورىنىڭ وكىلدەرى, Nur Otan پارتياسى جانىنداعى كاسىپكەرلىكتى قولداۋ جونىندەگى رەسپۋبليكالىق قوعامدىق كەڭەستىڭ مۇشەلەرى, بيزنەس-قاۋىمداستىق وكىلدەرى مەن بەلگىلى ساراپشى ماماندار قاتىستى. ودان بولەك بەينە-كونفەرەنتسيا بايلانىسى ارقىلى بارلىق وبلىس پەن ەلوردا, الماتى جانە شىمكەنت قالالارى اكىمدەرىنىڭ ورىنباسارلارى, جەرگىلىكتى كاسىپكەرلەر جانە جوعارىدا اتالعان قوعامدىق كەڭەستىڭ ايماقتىق وكىلدەرى دە قاتىستى. ءىس-شارانى Nur Otan پارتياسى مەملەكەتتىك باعدارلامالار مەن رەفورمالاردى جۇزەگە اسىرۋدىڭ تيىمدىلىگىن باعالاۋ جانە مونيتورينگ جۇرگىزۋ ورتالىعىنىڭ ديرەكتورى راحىم وشاقباەۆ جۇرگىزىپ وتىردى.
ءسوز باسىندا Nur Otan پارتياسى توراعاسىنىڭ ءبىرىنشى ورىنباسارى ەلباسىنىڭ كەزەكتى XVIII سەزدە بەرگەن تاپسىرماسىنا نازار اۋدارىپ, ونى ورىنداۋ ءۇشىن پارتيا جۇيەلى جۇمىستى باستاپ كەتكەنىن ايتتى.
– ەلباسى ماڭىزدى مەملەكەتتىك باعدارلامالاردىڭ ءجۇزەگە اسىرىلۋ بارىسىنا قوعامدىق باقىلاۋ جۇرگىزۋ جۇمىستارىن كۇشەيتۋدى تاپسىردى. بۇل جۇمىستاردىڭ ماقساتى پارتيانىڭ مەملەكەتتىك ورگانداردان ەسەپ تالاپ ەتۋ ەمەس, كەرىسىنشە باعدارلامالاردى ءتيىمدى ءارى ۋاقتىلى جۇزەگە اسىرۋعا ىقپال ەتىپ, ەلىمىزدىڭ ستراتەگيالىق قۇجاتتارىندا كورسەتىلگەن ءتيىستى شارالاردى قولعا الۋ. وسىنداي تىڭداۋلاردىڭ «بيزنەستىڭ جول كارتاسى-2020» باعدارلاماسىنان باستالعانى دا تەگىن ەمەس. ءويتكەنى ەل ەكونوميكاسى مەن حالىقتىڭ ءال-اۋقاتى كاسىپكەرلىكپەن تىكەلەي بايلانىستى, – دەدى م.اشىمباەۆ.
«بيزنەستىڭ جول كارتاسى-2020» مەملەكەتتىك باعدارلاماسىنىڭ باستى ماقساتى – ايماقتىق كاسىپكەرلىكتىڭ تۇراقتى ءارى تەڭگەرىمدى ءوسۋىن قامتاماسىز ەتىپ, جۇمىس ورىندارىن ساقتاۋ جانە جاڭا قىزمەت ورىندارىن اشۋ. ەلباسىنىڭ تىكەلەي باستاماسىمەن قولعا الىنعان بۇل باعدارلاما 2010 جىلدان بەرى جۇزەگە اسىرىلىپ كەلەدى. تۇڭعىش پرەزيدەنتىمىزدىڭ ءوتكەن جىلدىڭ قازان ايىنداعى قازاقستان حالقىنا ارناعان جولداۋىندا باعدارلامانىڭ قولدانىلۋ مەرزىمىن 2025 جىلعا دەيىن ۇزارتۋ كەرەكتىگىن ايتىپ, ءتيىستى ورىندارعا ناقتى تاپسىرما بەرگەنى بەلگىلى.
قازىرگى تاڭدا وسى باعىتتا ايتارلىقتاي جۇمىستار قولعا الىنىپ, يگى ناتيجەلەرىن بەرۋدە. بۇل جونىندە ۇلتتىق ەكونوميكا ءمينيسترى ر.ءدالەنوۆ كەڭىنەن ايتىپ بەردى. ونىڭ سوزىنە قاراعاندا, باعدارلامانىڭ الەۋمەتتىك-ەكونوميكالىق اسەرى زور. اتاپ ايتقاندا, 2015-2018 جىلدار ارالىعىندا باعدارلاما اياسىندا 210,1 ملرد تەڭگە قاراجات ءبولىنىپ, سونىڭ ناتيجەسىندە 13 مىڭنان استام شاعىن جانە ورتا كاسىپكەرلىككە قولداۋ كورسەتىلگەن. ودان بولەك, جىل سايىن 10 مىڭ جاڭا جۇمىس ورنى اشىلىپ, جىلىنا 20 مىڭ ازامات كاسىپكەرلىكتىڭ قىر-سىرى تۋرالى وقىتۋ كۋرسىنان وتكەن. سونداي-اق وسى جىلدار ىشىندە باعدارلاما ارقىلى ورتا ەسەپپەن 3,3 ترلن تەڭگەنىڭ ءونىمى ءوندىرىلىپ, قازىناعا جىلىنا 175 ملرد تەڭگە سالىق تولەنگەن.
ءوز كەزەگىندە «اتامەكەن» ۇكپ باسقارما توراعاسى ا.مىرزاحمەتوۆ اتالعان باعدارلامانىڭ وتاندىق كاسىپكەرلىكتىڭ دامۋىنا تىڭ سەرپىن بەرگەنىن ايتتى. ونىڭ ايتۋىنشا, «اتامەكەن» كاسىپكەرلەر پالاتاسى 2015 جىلدان بەرى باعدارلامانىڭ ءتورتىنشى باعىتى – كاسىپكەرلىكتى قارجىسىز قولداۋ شارالارىنىڭ باستى ۇيلەستىرۋشىسى بولىپ كەلەدى. سوعان سايكەس ۇلتتىق كاسىپكەرلەر پالاتاسى قولدانىستاعى بيزنەسكە قىزمەتتىك قولداۋ كورسەتۋ, مونو جانە شاعىن قالالار مەن اۋدان ورتالىقتارىنداعى كاسىپكەرلەرگە مەملەكەتتىك قولداۋ تۋرالى اقپاراتتىق ءتۇسىندىرۋ جۇمىستارىن جۇرگىزۋ, «بيزنەس-مەكتەپ», «ىسكەرلىك بايلانىستار», «اعا سەنورلار», «بيزنەس ناسيحات» سياقتى ناقتى 6 باعىت بويىنشا جۇمىس جۇرگىزۋدە.
ال Nur Otan پارتياسى مەملەكەتتىك باعدارلامالار مەن رەفورمالاردى جۇزەگە اسىرۋدىڭ ءتيىمدىلىگىن باعالاۋ جانە مونيتورينگ جۇرگىزۋ ورتالىعىنىڭ ديرەكتورى راحىم وشاقباەۆ «بيزنەستىڭ جول كارتاسى-2020» باعدارلاماسىن جۇزەگە اسىرۋ كەزىندەگى كەيبىر ولقىلىقتارعا توقتالدى.
سونىمەن قاتار ءىس-شارادا ءماجىلىس دەپۋتاتى البەرت راۋ, شىمكەنت قالاسى اكىمىنىڭ ورىنباسارى دانات جۋمين, «كاسىپكەرلەر فورۋمى» قاۋىمداستىعىنىڭ توراعاسى رايمبەك باتالوۆ, «Azala Textile» جشس ديرەكتورى گۇلنار سادىقبەكوۆا جانە تاعى باسقا بىرقاتار ماماندار ءسوز الىپ, باعدارلاما اياسىندا اتقارىلىپ جاتقان جۇمىستاردىڭ ءناتيجەلىلىگىن ارتتىرۋعا قاتىستى ويلارىمەن ءبولىستى.
ءىس-شارانى قورىتىندىلاعان م.اشىمباەۆ بۇل پارتيانىڭ ەلباسىنىڭ قوعامدىق باقىلاۋدى كۇشەيتۋ جونىندەگى تاپسىرماسىن ورىنداۋ جۇمىستارىنىڭ باسى عانا ەكەنىن ايتىپ, الداعى ۋاقىتتا وسىنداي تىڭداۋلاردىڭ جالعاساتىنىن جەتكىزدى. سونداي-اق ول بۇگىنگى تالقىلاۋدىڭ ەلىمىزدەگى بيزنەس پەن شاعىن جانە ورتا كاسىپكەرلىك سالاسىندا بىرقاتار ماسەلەنىڭ بار ەكەنىن كورسەتىپ بەرگەنىنە كوڭىل ءبولدى.
بۇدان بولەك, پارتيا توراعاسىنىڭ ءبىرىنشى ورىنباسارى ەسەپكە الۋ, ستاتيستيكا جۇرگىزۋ جۇمىستارىن جەتىلدىرۋ جايىنا توقتالىپ, سوڭىندا پارتيانىڭ مەملەكەتتىك باعدارلامالاردىڭ تيىمدىلىگىن ارتتىرۋعا مۇددەلى بارلىق تاراپپەن جۇمىس ىستەۋگە دايىن ەكەنىن ايتىپ, بۇگىنگى تالقىلاۋدىڭ ناتيجەسىندە ۇكىمەتكە ارنايى ۇسىنىستار جولداناتىنىن جەتكىزدى.
ايتا كەتەيىك, پارتيا جانىنان جاڭادان قۇرىلعان مەملەكەتتىك باعدارلامالار مەن رەفورمالاردى جۇزەگە اسىرۋدىڭ تيىمدىلىگىن باعالاۋ جانە مونيتورينگ جۇرگىزۋ ورتالىعىنىڭ نەگىزگى ماقساتى – ۇكىمەت پەن ازاماتتىق قوعام اراسىندا ءتيىمدى كەرى بايلانىستى قالىپتاستىرىپ, مەملەكەتتىك باعدارلامالاردىڭ تيىمدىلىگىن جانە حالىقتىڭ سودان كورىپ وتىرعان پايداسىن انىقتاۋ. سوعان بايلانىستى ناقتى جوسپار دايىندالعان. بۇل بويىنشا جىل سوڭىنا دەيىن 8 مەملەكەتتىك باعدارلاما مەن 4 ۇلتتىق جوبا قاراستىرىلماق. اتالعان جۇمىستار جالپىعا قولجەتىمدى ءتۇردە جۇرگىزىلىپ, الەۋمەتتىك جەلىلەردە تىكەلەي تاراتىلادى.
