– ەلباسى – قازاقستان رەسپۋبليكاسىنىڭ تۇڭعىش پرەزيدەنتى كونستيتۋتسيامىزعا ساي ەل تىزگىنىن قاسىم-جومارت توقاەۆقا بەرگەنى بارشامىزعا بەلگىلى. قازاق حالقى ءار ۋاقىتتا دا تاباندىلىعىمەن, بايىپتىلىعىمەن, شەشىم قابىلداۋداعى كورەگەندىلىگىمەن بۇل تاريحي وقيعانى دۇرىس قابىلداي بىلگەن بولاتىن. مەملەكەت باسشىسى ەلىمىزدىڭ ىشكى-سىرتقى ساياسي تۇراقتىلىعىن ساقتاۋ ماقساتىندا مەرزىمىنەن بۇرىن پرەزيدەنتتىك سايلاۋ وتەتىنىن مالىمدەدى. بۇل ءمالىمدەمە ەلىمىزدەگى بارلىق ساياسي بيلىك تارماقتارىنىڭ ۋاعدالاستىعىمەن, كەلىسۋىمەن جاسالدى. «كەلىسىپ پىشكەن تون كەلتە بولماس» دەگەن بار. پرەزيدەنت حالىقتىڭ قولداۋىن الۋعا ءتيىس, حالىق سايلاعان پرەزيدەنت حالىق اتىنان سويلەي الادى. سوندىقتان بۇل شەشىمدى قازاقستان ازاماتى رەتىندە, ەلىمنىڭ پاتريوتى رەتىندە مەن سانالى تۇردە قابىلدادىم جانە قوش كوردىم. پرەزيدەنت ايتقانداي, الداعى سايلاۋ ءادىل, اشىق, ايقىن وتەتىنىنە سەنەمىن جانە اتسالىسامىن. بۇل سايلاۋدىڭ قورىتىندىسى ءبىزدى ساياسي دەڭگەيدە دە, ۇيىمداستىرۋشىلىق دەڭگەيدە دە جاڭا ءبىر كەزەڭگە كوتەرەدى جانە قازاقستاننىڭ ساياسي ساحناسىنا جاڭا كۇشتەردىڭ كەلۋىنە جول اشادى دەپ ويلايمىن. قازاقستاننىڭ الەۋمەتتىك-ەكونوميكالىق, ساياسي, مادەني, بارلىق جاعىنىڭ دامۋىندا جاڭا ءبىر كەزەڭى باستالادى دەپ ۇمىتتەنەمىن», دەيدى «ازامات داۋىسى» جەكە مەنشىك مەكەمەسىنىڭ ديرەكتورى عاليا جالعاسباي.
ال «مۇنايلى اۋداندىق ازاماتتىق باستاما» بىرلەستىگىنىڭ ءتورايىمى رايحان دارىباەۆا كەزەكتەن تىس پرەزيدەنتتىك سايلاۋ وتكىزۋ تۋرالى ۇندەۋدى قولدايتىندىعىن ايتىپ, «ويتكەنى بۇل سايلاۋ ەلىمىزدەگى تۇراقتىلىق پەن تاتۋلىقتىڭ كەپىلى بولادى دەپ بىلەمىن. ەل تىزگىنىن قولعا الاتىن تۇلعانى داۋىس بەرۋ ارقىلى حالىقتىڭ سايلاعانى دۇرىس. كەزەكتەن تىس وتەتىن بۇل سايلاۋ ەلىمىزدىڭ ءوسىپ-وركەندەۋىنە جاڭا سەرپىن اكەلەدى دەگەن ءۇمىت بار», دەدى.
– تىكەلەي ەفير ارقىلى مەملەكەت باسشىسى قاسىم-جومارت توقاەۆ ماۋسىم ايىندا كەزەكتەن تىس قازاقستان رەسپۋبليكاسى پرەزيدەنتىنىڭ سايلاۋى وتەتىنىن مالىمدەدى. بۇل باستامانى تولىق قۇپتايمىن. پرەزيدەنتتى سايلاپ الساق, الداعى ۋاقىتتا ساياسي تۇراقتىلىقتى ودان ءارى قامتاماسىز ەتۋگە بولادى. جالپى, 2019 جىل بارشا قازاقستاندىقتار ءۇشىن ساياسي وزگەرىستەرگە تولى جىل بولعالى تۇر. كەزەكتەن تىس سايلاۋ ءبىز ءۇشىن كۇتپەگەن وقيعا بولعانىمەن, بەرەرى كوپ دەپ ويلايمىن. بۇگىندە ەلىمىزدە ساياسي تۇراقتىلىق بار, ۇلتارالىق تاتۋلىقتىڭ ۇلگىسىن باسقا ەلدەر بىزدەن السىن دەيمىن. سونداي-اق ەلباسىنىڭ «رۋحاني جاڭعىرۋ», «100 ناقتى قادام» باعدارلامالارى ارقىلى ەلدە كوپتەگەن وڭدى وزگەرىس ورىن الدى. بۇگىندە الەۋمەتتىك قولداۋ شارالارىن كۇشەيتۋ ارقىلى ەلىمىزدىڭ ودان ءارى دامۋىنا جول اشىلدى. الداعى سايلاۋدا حالىق سايلايتىن قازاقستاننىڭ كەزەكتى پرەزيدەنتى ءۇشىن ەل باسقارۋ قيىنعا سوقپايدى دەپ ويلايمىن. ويتكەنى تۇڭعىش پرەزيدەنتىمىز قازاقستاندى دامىتۋدىڭ دارا جولىن كورسەتىپ كەتتى, دەپ قورىتتى باسقوسۋدى «ەكو ماڭعىستاۋ» ۇكىمەتتىك ەمەس ۇيىمىنىڭ جەتەكشىسى كيريلل وسين.
ۇكىمەتتىك ەمەس ۇيىمدار جەتەكشىلەرى كەزەكتەن تىس پرەزيدەنتتىك سايلاۋعا اتسالىسىپ, مەملەكەتىمىزدىڭ بىلىكتى باسشىسىن تاڭداۋعا ءوز ۇلەستەرىن قوساتىندىعىن جەتكىزدى.
