دوڭگەلەك ۇستەلگە نۇر-سۇلتان قالاسى اكىمدىگىنىڭ باسشىلىق قۇرامى, مادەنيەت جانە سپورت مينيسترلىگىنىڭ ءتىل ساياساتى كوميتەتى, نۇر-سۇلتان قالالىق پروكۋراتۋراسى, ادىلەت دەپارتامەنتى, قالالىق كاسىپكەرلەر پالاتاسى, بايقوڭىر, الماتى, سارىارقا, ەسىل اۋداندارىنىڭ اكىمدىگى, ساۋلەت, قالا قۇرىلىسى جانە جەر قاتىناستارى باسقارماسى, قوعامدىق دامۋ ىستەرى باسقارماسى, ينۆەستيتسيالار جانە كاسىپكەرلىكتى دامىتۋ باسقارماسى جانە مەملەكەتتىك مەكەمەلەر مەن قوعام قايراتكەرلەرى, ارنايى شاقىرىلعان دارىسكەرلەر قاتىستى.
ءىس-شارا تىلدەردى قولدانۋ سالاسىنداعى زاڭنامانىڭ ساقتالۋىن قاداعالاۋعا, زاڭنامانى بۇزعانداردىڭ جاۋاپكەرشىلىگىن كۇشەيتۋگە, مەملەكەتتىك ءتىلدى قولدانۋدىڭ مارتەبەسىن وسىرۋگە, سىرتقى جارناما مەن كورنەكى اقپارات ماتىندەرىندە كەزدەسەتىن قاتەلىكتەردىڭ الدىن الۋعا باعىتتالعان.
جيىن قورىتىندىسى بويىنشا نۇر-سۇلتان قالاسىنىڭ تۇرعىندارى مەن قوناقتارىنا ۇندەۋ جاريالاندى. وندا «ءتىل تازالىعى – بارشاعا ورتاق ءىس» اكتسياسى اياسىندا جارناماداعى قاتەلەردى تۇزەۋگە شاھار تۇرعىندارىن اتسالىسۋعا شاقىرعان.
«جارناما – قوعامنىڭ تىنىس-تىرشىلىگى مەن شاھاردىڭ بەت-بەينەسىن قالىپتاستىراتىن ماڭىزدى قۇرال.
وسى ورايدا, «قازاقستان رەسپۋبليكاسىنداعى ءتىل تۋرالى» قازاقستان رەسپۋبليكاسى زاڭىنىڭ 21-بابىنا سايكەس دەرەكتەمەلەر مەن كورنەكى اقپارات ماتىندەرى مەملەكەتتىك تىلدە (سول نەمەسە جوعارى جاعىنا, شريفتتەرى بىردەي), ودان كەيىن ورىس جانە قاجەت بولعان جاعدايدا وزگە تىلدەردە جازىلادى. دەگەنمەن, بۇگىنگى تاڭدا زاڭدى بىلمەۋ, نەمقۇرايلىلىق سياقتى سەبەپتەردەن قالاداعى سىرتقى جارناما, كورنەكى اقپاراتتاردا ءتىل نورمالارىنا قاتىستى تالاپتاردىڭ ساقتالماۋى ءجيى كەزدەسۋدە. وسى ماقساتتا, نۇر-سۇلتان قالاسىنىڭ تىلدەردى دامىتۋ جانە ارحيۆ ءىسى باسقارماسى مەن نۇر-سۇلتان قالاسىنىڭ كاسىپكەرلەر پالاتاسى «ءتىل تازالىعى – بارشاعا ورتاق ءىس» اكتسياسىن باستايدى.
بارشا ەلوردالىقتار مەن قالا قوناقتارىن كوشەدەگى سىرتقى (كورنەكى) جارنامادا كەزدەسەتىن كەز كەلگەن قاتەلىككە بەيجاي قاراماي, تىكەلەي جارناما يەسىنە حابارلاسىپ, زاڭ تالاپتارى اياسىندا ورىن العان كەمشىلىكتەردى جويۋعا شاقىرامىز. ءتىلدىڭ مارتەبەسى – ەلدىڭ مارتەبەسى! ولاي بولسا, ەلدىك ماسەلەدە, ءتىلدىڭ مەرەيىن اسىرۋ جولىندا بەلسەندى بولايىق» دەلىنگەن ۇندەۋدە.
وسى اكتسيا اياسىندا شاھاردىڭ كەز كەلگەن تۇرعىنى قاتە جارنامانى ءتيىستى مەكەمەگە جىبەرە الادى. ول ءۇشىن جارنامانىڭ ورنالاسقان جەرىن, تۇسىرىلگەن كۇنىن, ءتيىستى فوتوسۋرەتتى تىركەي وتىرىپ a.imangali@astana.kz ەلەكتروندى مەكەنجايىنا نەمەسە Facebook جەلىسىندەگى «ءتىل باسقارماسى» اككاۋنتىنا جولداۋى كەرەك.
