ءبىرىنشىسى – گەوساياسات. ەلباسىنىڭ ءوز وكىلەتتىگىن توقتاتۋى كوپشىلىك ءۇشىن كۇتپەگەن جاعداي بولدى. قىتاي ەلشىسى ەل باسشىلىعىمەن العاشقى كۇندەرى بەس رەت جولىققانىن ەسكە الۋعا بولادى. ياعني, بىزگە الەمدىك يزولياتسيادا دا, ستراتەگيالىق ەكىۇدايلىقتا دا قالۋعا بولمايدى. بۇل سىرتقى كۇشتەردىڭ ىشكى ىسىمىزگە ارالاسۋ قاۋپىن تۋعىزادى.
ەكىنشىسى – ينۆەستيتسيالىق جانە بيزنەس كليمات. وتاندىق جانە الەمدىك بيزنەس بۇعان دەيىن قابىلدانعان «ويىن ەرەجەلەرىنىڭ» تاعدىرىن كۇتىپ وتىر. ولار نە جالعاسا بەرۋى قاجەت, نە مۇلدەم جاڭا ەرەجەلەر قابىلدانۋى ءتيىس. ايتپاقشى, ىشكى ينۆەستيتسيالار بىلتىرعى جىلمەن سالىستىرعاندا ەكى ەسە ازايعان.
ءۇشىنشىسى – ساياسي يستەبليشمەنت پەن مەملەكەتتىك اپپاراتتىڭ بىرلىگى. ءبىزدىڭ ەليتا بەلگىسىزدىك جاعدايىندا ءتيىمدى جۇمىس ىستەي المايدى. ەگەر وتپەلى كەزەڭ سوزىلىپ كەتسە, وندا مەملەكەتتىك اپپارات پەن ەليتا باعدارسىز قالۋى مۇمكىن. سايكەسىنشە, سايلاۋدى كەلەسى جىلعا دەيىن قالدىرسا, قوعامدا تۇراقسىزدىق ورناۋى عاجاپ ەمەس.
ءتورتىنشىسى – سايلاۋ جاعدايدى تىنىشتاندىرۋعا, 2001 جىلعى جىككە ءبولىنۋدى ۇمىتۋعا, ساياسي-پارتيالىق جۇيەنى قايتا جاساقتاۋعا جاقسى مۇمكىندىك بەرەدى. قازىردىڭ وزىندە بەس-التى تۇلعا ءوزىنىڭ پارتيالىق امبيتسياسى جايلى مالىمدەۋگە دايار. بۇل سايلاۋ – ولارعا دا مۇمكىندىك.
