كىندىك قانى تامعان جەرى – قىزىلوردا وبلىسىنىڭ ارال اۋدانى. اكە-شەشەسى سول زاماننىڭ باقۋاتتى كىسىلەرىنىڭ قاتارىنان سانالعان. سودان بولار, اكەسى ەرنياز «پارمەندىلەردىڭ» بۇيرىعىمەن قۋدالاۋعا ۇشىرايدى. كىشكەنتاي زيبانى سول تۇستا ماحامبەت كەلىمبەتوۆ دەگەن اۋىلداسى ءوزىنىڭ پەرزەنتى بولماعانىن العا تارتىپ, اتىنا جازدىرتىپ الادى. بويجەتكەن شاعىندا زيبا ارالعا قاراستى قۇلاندى اۋىلىنىڭ ازاماتىمەن تۇرمىس قۇرادى. ارال تەڭىزى كەمەلدەنىپ تۇرعان سوناۋ شاقتا ولار بالىق اۋلاۋ ءىسىن وتباسىلىق كاسىپكە اينالدىرعان.
– ايەلدىڭ وشاق باسىنداعى ءتىرلىگى تاۋسىلعان با؟! ءبىز دە جاس كەزدە وزىمىزگە قاراعان كەز كەلگەن ءۇي مەن تىستىڭ شارۋاسىن ۋاقىتپەن ساناسپاي اتقارا بەرەتىنبىز. ەگىن وردىق, سيىر ساۋ, ت.ب. جۇمىستارعا ايانباي ارالاستىق. ايتەۋىر وتاعاسىنىڭ جانىنان قالماي, ەرلەرشە جۇمىس ىستەگەنىمىز راس. ونىڭ قايسىسىن ايتىپ تاۋىساسىڭ, كوپ قوي,– دەيدى عاسىر كۋاگەرى.
ۇزاق جاساعان اجە استى تالعاماي, ءوزىڭ قالاعانىڭدى ادال داستارقاننان قورەك ەتۋ دەنساۋلىققا پايدالى دەيدى. ال كوپ جاساۋدىڭ سىرى نەدە دەگەن ساۋالىمىزعا ول: «جاس كەزىمدە مالدىڭ ءسۇتىن ساۋمالداي, ياعني جىلىلاي ءىشۋدى داعدىعا اينالدىردىم, مۇمكىن سودان بولار. وسى كۇنگە دەيىن باستى بايلىققا شاعىم ايتقان كۇندەرىم از دەپ جاۋاپ قاتتى», – زيبا اجە.
ونى نازاردان تىس قالدىرماي باپتاپ, باتاسىنا كەنەلىپ وتىرعان شاڭىراقتاعى كەلىن كۇنسۇلۋدىڭ دا بەدەلى اۋىلداستارىنىڭ الدىندا ءبىر توبە. ەنەسىنە دەگەن قامقورلىعى كوپكە ۇلگى. ءبىر قىز بەن ءبىر ۇلدى ومىرگە اكەلگەن قارت كىسى قازىر ۇلىنان 4 نەمەرە, 2 شوبەرە, قىزىنان 5 جيەن نەمەرە, 12 جيەن شوبەرە ءسۇيىپ وتىر. بوزويلىقتار زيبا اجەنى سوزگە شەشەن ادام دەپ بىلەدى. «ول كىسىدەن اسىرىپ كىم ايتقان دەيسىڭ؟!», دەپ تاۋىپ ايتاتىن شەشەندىگىنە تامسانادى. ال قولداعى نەمەرە-شوبەرەلەرى اجەلەرىنىڭ ءاردايىم سۇيەنىشى. ۇلكەن كىسى ەلدەگى جاڭالىقتاردىڭ انىعىن كەيدە سولار ارقىلى ەستىپ الادى.
«مەنىڭ شاشىم جاس كەزىمدە وتە ۇزىن بولدى, ءتىپتى ەكى بۇرىمىمدى وراپ كۇلتەمنىڭ ەكى قالتاسىنا سالىپ الاتىن ەدىم», دەگەن اجە جاستارعا بىلاي دەپ وسيەتىن ايتادى.
– بولاشاق تۇتقاسىن ۋاقىت كوشىمەن الماسىپ جاڭا جاس ۇرپاق ۇستايتىنى اقيقات. سول جاستارىمىز زەيىندى, ۇلتقا ادال, ەلدىك داستۇردەن اتتاماۋى ءتيىس. ونىڭ بارلىعى بەرەكەلى شاڭىراقتاعى تامشىداي تۇراقتى بەرىلەتىن تاربيەمەن قالىپتاسادى. ءاربىرىمىز وسىعان مىعىم بولساق, كەلەشەگىمىز جامان بولماس, – دەيدى زيبا اجە.
مۇحتار مىرزالين,
قازاقستان جۋرناليستەر وداعىنىڭ مۇشەسى
اقتوبە وبلىسى, شالقار اۋدانى, بوزوي اۋىلى
