قاراعاندى وبلىسىنىڭ اكىمى ەرلان قوشانوۆ وقيعا ورنىنا بارىپ, جاعدايدى ءوز كوزىمەن كورىپ قايتتى. قازىرگى تاڭدا باستى مىندەت - ۇيلەردى سۋ باسۋدان ساقتاپ, تۇرعىنداردى قورعاۋ ءۇشىن بارلىق شارالاردى قولدانۋ بولىپ تابىلادى.
2017 جىلى بۇقار جىراۋ اۋدانىندا چكالوۆو جانە سادوۆوە كەنتتەرىنىڭ اينالاسىندا ۇزىندىعى 2-3,5 شاقىرىمدى قۇرايتىن قورعانىس دۋالدارى سالىندى.
- ءبىز بۇل شارالاردىڭ وڭ ناتيجە بەرگەنىن كورىپ وتىرمىز. سۋدىڭ كوپ كەلۋىنە قاراماستان, جاعداي باقىلاۋدا ۇستالىپ وتىر. ۇيلەردى سۋ باسقان جوق. ازىرگە تۇرعىنداردى كوشىرۋگە ەش نەگىز جوق, - دەدى ەرلان قوشانوۆ. - بۇگىن سۋ تاسقىنىنىڭ قارقىندى كەزەڭى ەندى عانا باستالدى. الداعى ءبىر-ەكى كۇندە بۇدان دا كوبىرەك سۋ كەلۋى مۇمكىن. ءبىز سامارقاند سۋ قويماسى بويىنشا دۇرىس شەشىم قابىلداۋعا ءتيىسپىز. قاجەت بولعان جاعدايدا سۋ اعىزۋ ۇلعايتىلادى, ول ءۇشىن رەزەرۆ بار.
سادوۆوە اۋىلىندا ۇزدىكسىز سۋ سورعىلاۋ جۇمىستارى مەن قورعانىس ۇيىندىلەرىن نىعايتۋ جالعاستىرىلۋدا. وقيعا ورنىندا وبلىستىق سۋ تاسقىنىنا قارسى شتابتىڭ جىلجىمالى پۋنكتى ورنالاسقان. ەلدى مەكەنگە ازاماتتىق قورعانىس جانە جەرگىلىكتى اتقارۋشى بيلىكتىڭ بارلىق كۇشتەرى جۇمىلدىرىلعان.
وبلىستىق تجد باستىعى يبراگيم كۇلشىمباەۆ بايانداعانداي, سادوۆوە اۋىلىندا الدىن الۋ شارالارىن قامتاماسىز ەتۋگە جەكە قۇرامنىڭ 140 ادامى, 35 بىرلىك ارنايى تەحنيكا: جۇك تيەگىشتەر, ساموسۆالدار, جول تالعامايتىن كولىكتەر, ۆاحتوۆكالار, موتوپومپالار جانە ت. ب. جۇمىلدىرىلعان.
كەنتتە 40-تان استام ءۇي بار, وندا 350-گە جۋىق ادام تۇرادى. وبلىس اۋماقتارىنىڭ باسىم بولىگىندە قار ەرىپ بولدى. دەگەنمەن سامارقاند, شەرۋباي-نۇرا جانە ىنتىماق سۋ قويمالارىنان سۋ اعىزۋ جۇمىستارى ەرەكشە باقىلاۋدا ۇستالىپ وتىر.
تجد اقپاراتى بويىنشا, وساكاروۆ, نۇرا جانە بۇقار جىراۋ اۋداندارىنىڭ وزەندەرىندە 8 مۇز جارۋ شارالارى وتكىزىلگەن. ەرىگەن قار سۋىن بۇرۋ جانە ەلدى مەكەندەردى قورعاۋ ءۇشىن 3700 مەتر قورعاۋ ۇيىندىلەرى تۇرعىزىلدى جانە نىعايتىلدى, 3100 مەتر اينالما ارنالار قۇرىلدى, 24820 دانا قاپتار توسەلدى, 57 مىڭ تەكشە مەتردەن استام سۋ سورىلدى, 950 توننا ينەرتتى ماتەريال پايدالانىلدى.
