قارا جەرگە حالىق يە بولعاننان مۇراقتى جاننىڭ مۇراتى – ەلدى ەل قىلۋ. جەل ءۇيىر جەلبەگەي جۇرتتىڭ قامساۋى, قالقانى بولۋ استە وڭاي ەمەس. جازعىتۇرىمعى جەلكەمىكتەي وڭنان دا, سولدان دا ەسەتىن ءدۇريا دۇنيەدە تۇرلاۋلى تەمىرقازىق قاجەت. ءبىراز جىل بۇرىن ەلباسى نۇرسۇلتان نازارباەۆ ايتقان ءبىراۋىز ءسوز ءجيى ەسكە تۇسەدى. «تاۋەلسىزدىكتى ءسات سايىن قورعاۋىمىز كەرەك» دەگەن-ءدى قازاقستاننىڭ تۇڭعىش پرەزيدەنتى. جاھانعا ءمالىم بولعان «نازارباەۆ مودەلى» ارقىلى ءبىر جاعادان باس, ءبىر جەڭنەن قول شىعارا بىلگەن بىرلىگىمەن قازاقستاندىقتار بۇل بايلامدى بايىپپەن بەكىتتى. ەلباسىنىڭ جەتەكشىلىگىمەن قازاق ەلى كەڭەستەن قالعان «تاريحي» مۇرالاردى دا, الەم كەڭىستىگىندەگى گەوساياسي ورنىن دا ەلدىڭ ەرەكشە جەتىستىكتەرىنە اينالدىرا ءبىلدى. بۇعان مىسال رەتىندە بۇگىنگى قازاقستاننىڭ جاپپاي قىرىپ جوياتىن يادرولىق قارۋعا قارسى جانە جاھاندىق بەيبىتشىل, بىتىمگەرشىل ساياساتىن, سونداي-اق ەۋرازيانىڭ ءاپايتوس دالاسىندا الىپ مەملەكەتتەردىڭ اراسىندا ساۋدا-كولىك لوگيستيكاسى رەتىندە قارقىندى دامۋىن ايتۋ جەتكىلىكتى. ۇلى دالا توسىندە ادامزات كوشىن عالامات باعىتقا بۇرعان ساقارا سالتاناتىن تياناقتاپ, ءتۇپ تەگىمىزدىڭ كوشەلى تاريحىن تاۋەلسىز قازاقستاننىڭ تاڭداۋىمەن ءساتتى ساباقتاستىرعان ەلباسىنىڭ ەلدىك سانانى ەسەلەي تۇسكەن ەڭبەگى ەلەندى.
مەملەكەت باسشىسى قاسىم-جومارت توقاەۆتىڭ پرەزيدەنتتىك قىزمەتىنە كىرىسكەندەگى استانا اتاۋىن قازاقستاننىڭ تۇڭعىش پرەزيدەنتىنىڭ ەسىمىنە اۋىستىرۋ تۋرالى العاشقى ۇسىنىسى دا قاستەرلى تاۋەلسىزدىك توڭىرەگىنە توپتاسقان تۇراقتى دامۋ يدەياسىن نىقتاۋدىڭ, ودان ءارى نىعايتۋدىڭ ناقتى كورىنىسى ىسپەتتى. ويتكەنى ەڭسەلى ەلوردا ەلىمىزدىڭ تاۋەلسىزدىككە ءتان جاڭا پاسسيونارلىق رۋحىن قالىپتاستىردى, وڭىرلەردىڭ دامۋىنا سەرپىن بەرگەن قوزعاۋشى كۇشكە اينالدى. ەندى, مىنە, جاڭا تۇرپاتتى قازاقستاننىڭ جاڭا دامۋ جولىنداعى ۇلان-عايىر ماقسات-مىندەتتەرىنە نۇر-سۇلتان اتاۋىمەن تاعى دا تۋ الىپ شىققانداي.
البەتتە, قالا اتاۋى, ونىڭ ىشىندە استانالار اتاۋى – ەلدىڭ ەنشىلەس ءبىر اتريبۋتى سانالادى. 20 جىلدىق بەلەسىندە ەلوردامىزدىڭ استانا اتاۋى دا الەمگە ءماشھۇر بولىپ, ەلدىكتىڭ ەرەكشە نىشانى, بىرەگەي برەند رەتىندە تانىلدى. بۇگىندە باقوردامىزعا اينالعان باس قالادا استانا اتاۋىمەن قوسارلانا اتالاتىن قانشاما الەۋمەتتىك-مادەني نىساندار بار. ماسەلەن, «استانا-وپەرا», «استانا-ارەنا», «نۇر-استانا», «ەير-استانا» جانە «استانا» اتالاتىن سپورتتىق كلۋبتار مەن تەلەارنالار تۋرالى ايتساق تا جەتكىلىكتى بولار. اقپارات جانە قوعامدىق دامۋ ءمينيسترى د.اباەۆ بۇكىل دۇنيەگە بەلگىلى بۇل برەندتىڭ ساقتالاتىنىن, سونىمەن بىرگە «نۇر-سۇلتان» اتاۋىن جاڭا برەند رەتىندە دامىتۋدىڭ الەۋەتى زور ەكەنىن جەتكىزگەن بولاتىن.
جالپى, ەلدىكتىڭ ەڭ اۋەلگى ىرگەتاسىن قالاعان مەملەكەت قايراتكەرلەرىنىڭ ەسىمىن ەلوردالارعا بەرۋدىڭ ۇلگىلى ءۇردىسى بۇرىننان بار. بۇل رەتتە تاريح پاراقتارىنان سان مىسال كەلتىرۋگە بولادى. جانە بۇل اتاۋلاردىڭ باسىم بولىگى بەلگىلى دارەجەدە حالىقتىڭ, مەملەكەتتىڭ بولمىس-بىتىمىمەن استاسىپ, ءسىڭىسىپ كەتەدى.
تۇماندى كۇندەرى, كۇندەرى ەمەس-اۋ, ءدىنى باسقا, ءدىلى باسقا جۇرتتاردان سۇراۋسىز تاڭىلعان ەل-جەر, ءشار اتاۋلارى جاۋىر اتتاي جورتاقتاتقان, ارقانى ايازداي قارىپ, شەمەن شەر بولىپ قاتقان ارتى جار, الدى تۇيىق بولعان قىسىلتاياڭ داۋىرلەردە, تۇتاس كەزەڭدەردە ءومىر سۇرگەن حالىق ەلدىك سانامەن, مەملەكەتتىك مۇددەمەن قابىل العان بۇل جاڭا اتاۋ تاريحي ءمانى تەرەڭ, ارقالار جۇگى اۋىر قاستەرلى قۇندىلىققا قۇرمەت بولۋعا ءتيىس!
دۋمان اناش,
«Egemen Qazaqstan»
