ۋنيۆەرسيتەتىنىڭ ءباسپاسوز جانە قوعاممەن بايلانىس ءبولىمىنىڭ جەتەكشىسى جاندار اساننىڭ ايتۋىنشا, شارانى ۇيىمداستىرۋعا ياسساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ ەۋرازيا عىلىمي-زەرتتەۋ ينستيتۋتى مەن ء «بىلىم Times» جۋرنالى دا قولداۋ كورسەتكەن.
بەلگىلى تۇركولوگ, تۇڭعىش قىپشاقتانۋشى عالىم ءابجان قۇرىشجان ۇلىنىڭ عىلىمي ەڭبەكتەرىن زەرتتەپ, زەردەلەۋ ماقسات ەتكەن عالىمدار باسقوسۋى وتاندىق جانە شەتەلدىك جوعارى وقۋ ورىندارىنىڭ وقىتۋشىلارى, عالىمدار مەن ءتىل ماماندارى قاتىسۋىمەن «تۇركىتانۋ عىلىمى جانە تۇركى تىلدەرىنىڭ ومىرشەڭدىك ماسەلەلەرى», «رۋحاني جاڭعىرۋ: ادەبيەت پەن مادەنيەت – ۇلتتىڭ رۋحاني تامىرلارى», «جاڭارتىلعان ءبىلىم مازمۇنىنا جاڭا باعدار» جانە «رۋحاني جاڭعىرۋ: جاڭارتىلعان ءبىلىم جۇيەسىندەگى ۇلتتىق سانانىڭ كەمەلدەنۋى» باعىتتارى بويىنشا ءوتتى
ەۋرازيا عىلىمي-زەرتتەۋ ينستيتۋتىنىڭ ديرەكتورى ۆاكۋر سۇمەر القالى جيىندى اشا وتىرىپ, تۇركى الەمىنىڭ ىنتىماقتاستىعىن ارتتىرۋ باعىتتارىنا توقتالسا, ۋنيۆەرسيتەتتىڭ قازاق ءتىل ءبىلىمىنىڭ تەورياسى مەن ادىستەمەسى كافەدراسىنىڭ مەڭگەرۋشىسى, پروفەسسور تىنىشتىق ەرمەكوۆا عالىمنىڭ «كودەكس كۋمانيكۋسكە» بايلانىستى ىرگەلى زەرتتەۋلەرىنە توقتالىپ, ء«ابجان قۇرىشجان ۇلى ەسىمى بەرىسى – قايمانا قازاققا, ارىسى – الەم تۇركىتانۋشىلارىنا تانىس. زەرتتەۋشىلىك مول تۇيسىگى مەن قارىمدى قالامگەرلىگىنىڭ ارقاسىندا ءتول تاريحىمىزدىڭ تەرەڭىندەگى ورتا عاسىر ەسكەرتكىشتەرىن, بىرقاتار تۇركى جۇرتىنا ورتاق مۇرالاردى عىلىمعا ەنگىزىپ, كوپشىلىكپەن قايتا قاۋىشتىردى» دەپ اتاپ ءوتتى.
اباي اتىنداعى قازۇپۋ پروفەسسورى بالقيا قاسىم «عالىم عيبراتى», دوتسەنت مايرا ءجۇنىسوۆا «عالىم اماناتى», ە. بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ ستۋدەنتى نۇراي عازيزوۆ ء«تىل تاعدىرى – كەمەل كەلەشەك كەپىلى», اباي اتىنداعى قازۇپۋ ستۋدەنتى ادىلەت ىقىلاس «مان ەلەمەنتىنىڭ ەتيمولوگياسى» تاقىرىبىندا بايانداما جاسادى. باسقوسۋدا تۇركيانىڭ نيدە ومەر حاليسدەمير ۋنيۆەرسيتەتى, ە. بوكەتوۆ اتىنداعى قاراعاندى مەملەكەتتىك ۋنيۆەرسيتەتى مەن ق. جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ پروفەسسور-وقىتۋشىلارى ونلاين جەلىسىندە بايلانىسقا شىعىپ, پايىمدى پىكىرلەرىمەن ءبولىستى.
ەلۆيرا سەرىكقىزى,
«ەqemen Qazaqstan»
الماتى
