قازاقستان كاسىپوداقتار فەدەراتسياسى اتقارۋ كوميتەتىنىڭ ەلباسى نۇرسۇلتان نازارباەۆتىڭ «نۇر وتان» پارتياسىنىڭ XVIII سەزىندە اتاپ وتكەن باستامالارىن تالقىلاۋعا ارنالعان كەزەكتەن تىس كەڭەيتىلگەن وتىرىسى ءوتتى. قركف توراعاسى باقىتجان ءابدىرايىمنىڭ توراعالىعىمەن وتكەن وتىرىسقا قركف, سالالىق كاسىپوداقتار بىرلەستىكتەرى مەن ءىرى باستاۋىش كاسىپوداق ۇيىمدارىنىڭ وكىلدەرى قاتىستى.
قركف توراعاسى كىرىسپە سوزىندە قازاقستاندىقتاردىڭ ناقتى قاجەتتىلىكتەرىنە, سونىڭ ىشىندە بيۋدجەت سالاسىنىڭ تابىسى تومەن قىزمەتكەرلەرىنىڭ قازىرگى ەڭبەكاقىسى مولشەرىن قايتا قاراستىرۋ جانە ۇلعايتۋعا باعىتتالعان مەملەكەت باسشىسىنىڭ باستامالارىن جۇزەگە اسىرۋدا كاسىپوداقتاردىڭ ەرەكشە ءرولىن اتاپ ءوتتى. ب.ءابدىرايىم بۇگىندە فەدەراتسيا قۇرامىندا ميلليوننان اسا بيۋدجەت سالاسىنىڭ قىزمەتكەرلەرى بار ەكەنىن جانە كاسىپوداق ۇيىمدارى ەڭبەكاقىنى ارتتىرۋ قاجەتتىگى تۋرالى ماسەلەنى جۇيەلى تۇردە كوتەرىپ كەلە جاتقانىن جەتكىزدى. بۇل رەتتە كاسىپوداق قوزعالىسىنىڭ مۇشەلەرى ەلباسىنىڭ كوپ بالالى جۇمىسشى انالار مەن جالعىز باستى انالاردى الەۋمەتتىك قولداۋ باستاماسىن ەرەكشە ىلتيپاتپەن قابىلدادى, ويتكەنى, بۇل باستامالار قركف قىزمەتىنىڭ باسىم باعىتتارىمەن تىكەلەي ۇندەسىپ جاتىر.
قازىرگى تاڭدا كاسىپوداقتار فەدەراتسياسىنىڭ باستاماسىمەن باستاۋىش كاسىپوداق ۇيىمدارىندا كوپ بالالى جۇمىسشى انالارعا كومەك كورسەتىلۋدە. جۇمىس بەرۋشىنىڭ جوعارى الەۋمەتتىك جاۋاپكەرشىلىگى مەن كاسىپوداقتاردىڭ ءوز مىندەتتەرىن تابىستى اتقارۋىنىڭ ايقىن دالەلى رەتىندە قىزىلوردا وبلىسى «جاڭاقورعان» شيپاجايىنىڭ تاجىريبەسىن اتاپ وتۋگە بولدى. اتالعان شيپاجايدا وسى جىلعى اقپاندا كوپ بالالى جانە جالعىز باستى انالارعا جىل سايىن ەڭ تومەنگى جالاقىنىنىڭ ەكى ەسەلەنگەن مولشەرىن تولەۋ تۋرالى شەشىم قابىلداندى. سونىمەن قاتار شيپاجايدا جۇمىس ىستەيتىن ايەلدەر ءاربىر تۋعان ءسابيى ءۇشىن ەڭ تومەنگى جالاقى كولەمىندە ءبىر جولعى كومەك الاتىن بولادى. وسىنداي مىسالدار كاسىپوداقتار تاجىريبەسىندە از ەمەس.
ەلباسىنىڭ الەۋمەتتىك باستامالارى فەدەراتسيانىڭ جاستاردى قولداۋ, سونداي-اق اۋىلداردا الەۋمەتتىك سالانى دامىتۋ جانە جاستاردى اۋىلدىق ەلدى مەكەندەرگە تارتۋ ماقساتىندا ىسكە اسىرىپ جاتقان ناقتى شارالارىمەن سايكەسەدى. وسىلايشا, جاستار جىلى اياسىندا «سەنىم» سالالىق كاسىپوداعى اۋىلدا جۇمىس ىستەۋگە نيەتتى دەنساۋلىق ساقتاۋ سالاسىنىڭ جاس ماماندارىنا جىل سايىن 500 مىڭ تەڭگە كولەمىندە 60 گرانت ءبولۋ تۋرالى شەشىم قابىلدادى.
وتىرىس بارىسىندا قركف ەڭبەككەرلەرگە الەۋمەتتىك كومەك كورسەتۋ شارالارىن ءارى قاراي دا ارتتىرۋ ماقساتىندا ەلىمىزدىڭ كاسىپوداقتارى مەن جۇمىس بەرۋشىلەرگە پرەزيدەنت باستامالارىن قولداۋ تۋرالى ۇندەۋ جولدادى.
«ەڭبەك ادامىنىڭ قۇقىعى مەن مۇددەسىن قورعاۋ سالاسىنداعى ەڭ ءىرى قوعامدىق ۇيىم رەتىندە كاسىپوداقتار فەدەراتسياسى ازاماتتىق قوعامنىڭ بارلىق جاسامپاز كۇشتەرىن, بارلىق الەۋمەتتىك ارىپتەستەردى ادام كاپيتالىن جان-جاقتى جانە ساپالى دامىتۋ, ەڭبەككەرلەردىڭ ءومىر ءسۇرۋ ساپاسىن ارتتىرۋ, ەكونوميكالىق جانە الەۋمەتتىك قورعاۋ جولىندا بىرلەسە, كۇش-جىگەر جۇمىلدىرۋعا شاقىرادى.
ءبىز الەۋمەتتىك ارىپتەستەرگە, جۇمىس بەرۋشىلەرگە, كاسىپوداق ۇيىمدارىنا ۇجىمدىق شارتقا جۇمىسشى ايەلدەردى, سونىڭ ىشىندە كوپ بالالى جانە جالعىز باستى انالار, مۇمكىندىگى شەكتەۋلى بالالارى بار انالاردى قولداۋ جونىندە تولىقتىرۋلار ەنگىزۋ ارقىلى قوعام, ەڭبەك ۇجىمى الدىندا الەۋمەتتىك جاۋاپكەرشىلىك الا وتىرىپ, پرەزيدەنتتىڭ الەۋمەتتىك باستامالارىن قولداۋ جونىندە ۇندەۋ تاستايمىز. بۇل, ءوز كەزەگىندە, قوعامنىڭ ءال-اۋقاتىنىڭ جانە ەلىمىزدەگى تۇراقتىلىقتىڭ نەگىزى بولادى», دەپ كورسەتىلگەن قركف ۇندەۋىندە.
وتىرىسقا قاتىسۋشىلار ورىن الىپ جاتقان وزگەرىستەر ەڭبەككەرلەردىڭ جان-جاقتى قولداۋىنا يە بولاتىنىنا جانە قويىلعان ماقساتتار ءساتتى جۇزەگە اسىرىلاتىنىنا زور سەنىم ءبىلدىردى.
جولدىباي بازار,
«Egemen Qazaqstan»
