دۋشانبە-ساراتوۆ باعىتىنداعى پويىزعا وتىرىپ, تاجىكستان ەلىنەن ءبىر-اق شىققان اسەل بۇل ساپارىنا كىم, نە سەبەپ بولعانىن ايتا المايدى (مۇمكىن ايتقىسى كەلمەيدى). بەيتانىس ورتاعا, بوتەن جەرگە تاپ بولعان قارشاداي قازاق قىزىنىڭ باسىنان كەشكەنىن تاعدىردىڭ تالكەگى دەگەن ءبىر اۋىز سوزبەن بەينەلەي سالۋدىڭ ءوزى قيىن. دۋشانبەدەگى دامحانالاردىڭ بىرىندە داياشى بولىپ جان باعىپ جۇرگەن جەرىنەن قازاقستاندىق ازامات, كاسىپكەر نۇرقاسىم حامزا ۇلىمەن تانىسپاعاندا, ءومىرى سولاي جالعاسا بەرەر مە ەدى؟
كاسىپكەردىڭ تاجىكستاندا جۇرگەن قازاق قىزىنىڭ تۋىستارىن ىزدەگەن حابارى WhatsApp الەۋمەتتىك جەلىسىندە تەز تارالدى. وسىدان ءبىر اي بۇرىن قۇرمانعازى اۋدانىنىڭ تۇرعىنى تۇراربەك ەرعاليەۆ قىزدىڭ اناسىن تانيتىنىن ايتىپ, تەلەفون ءنومىرىن بەرگەن. بۇل حابار ەرىكتىلەردىڭ دە نازارلارىنان تىس قالمادى. اديلا قۇسايىنوۆا مەن ريزابەك سۇلتانياەۆ اسەلدىڭ اناسىنا ءسۇيىنشى حاباردى جەتكىزۋگە اسىققان.
ء«ار قازاق - مەنىڭ جالعىزىم» دەگەن ولەڭ جولى وسىندايدا ەرىكسىز ەسكە تۇسەدى. اتىراۋلىق سەناتور سارسەنباي ەڭسەگەنوۆ تە جاعدايعا الاڭداۋشىلىق ءبىلدىرىپ, قر سىرتقى ىستەر مينيسترلىگىنە, ۇلتتىق قاۋىپسىزدىك كوميتەتىنە اسەلدى تاۋىپ, ەلگە قايتارۋعا قولداۋ كورسەتۋدى ءوتىنىپ, حات جولدادى.
«مينيستر بەيبىت اتامقۇلوۆ تاجىكستانداعى ەلشىلىككە تاپسىرما بەرىپ, قازاقستاندىق ديپلوماتتار جوعالعان قىزدى تاپتى. قولىندا ەشقانداي قۇجاتى بولماعاندىقتان, تۋعان جەرى اتىراۋدان تۋ تۋرالى اكتىلىك جازبانىڭ كوشىرمەسىن شۇعىل سۇراتىپ, سونىڭ نەگىزىندە ەلگە قايتىپ ورالۋعا ارنالعان كۋالىك راسىمدەلدى», - دەيدى سەناتور.
ەلشىلىك قىزمەتكەرلەرىنىڭ كومەگىمەن دۋشانبەدەن الماتىعا, ودان اتىراۋعا جەتكەن اسەل دۇيسەنباەۆانى اۋەجايدان اناسى مەن تۋىستارى كۇتىپ الدى. «وتانىما, وتباسىما ورالعانىما قۋانىشتىمىن, كومەكتەسكەن ادامداردىڭ بارىنە شەكسىز ريزامىن», - دەيدى اسەلدىڭ ءوزى. تاجىك ەلىندە وتكەن ءومىرى تۋرالى اشىلىپ سىر ايتقىسى كەلمەدى. ءبىز دە قاۋزاي قويمادىق. 19 جىل بويى جات جەردە ءجۇرىپ, انا ءتىلىن ۇمىتقانى بولماسا...
ول ورالدى. قۋانىشتىسى دا وسى.
باقىتگۇل باباش,
«EgemenQazaqstan»
اتىراۋ
