قازاق تاريحىنىڭ العاشقى سۇرلەۋىن سالۋشىلاردىڭ ءبىرى ءھام الاش ارداگەرى مۇحامەتجان تىنىشپاەۆتىڭ دەرەگىندە بۇل شايقاس 1721-1723 جىلدارداعى سۇراپىل اپات «اقتابان شۇبىرىندى, القاكول سۇلاما» وقيعاسىنان كەيىن, ناقتى 1730 جىلى بولعانى جايلى ايتىلىپ, مايدان دالاسى بالقاش كولىنىڭ وڭتۇستىك-شىعىس جاعىندا 120 شاقىرىم جەردە, ول جەر ەل اراسىندا «يتىشپەس» دەگەن اتپەن ءمالىم دەپ جازادى.
جوعارىداعى الاش وقىمىستىسىنىڭ پايىمى نەگىزىندە شايقاس ورنىن ناقتىلاعان كەيىنگى زەرتتەۋشىلەر ونى – بالقاش كولى, وتار دالاسى, شۋ وزەنى ارالىعىنداعى ادىرلى القاپ دەپ وتىر. ويتكەنى بۇل جەردە قازاق-قالماق قورىمدارى وتە كوپ جانە نىسان كسرو باس شتابىنىڭ 1942 جىلعى قۇپيا كارتاسىندا «ماڭىزدى نۇكتە» رەتىندە كورسەتىلگەن.
1997 جىلى ەلىمىزدىڭ مەملەكەتتىك حاتشىسى ءا.كەكىلباەۆ جانە اكادەميك-تاريحشى م.قوزىباەۆتىڭ باستاماسىمەن سوعىس بولعان القاپقا زەرتتەۋ جۇرگىزگەن «اڭىراقاي» ەكسپەديتسياسى مايدان اۋماعىنىڭ ۇزىندىعى – 30-35, ەنى – 20 شاقىرىم دەگەن توقتام جاساپ, شايقاسقا ەكى تاراپتان 70 مىڭعا جۋىق ادام قاتىسقانى جايلى انىقتاما بەرگەن.
بار قازاقتىڭ باسى قوسىلعان وسى ءبىر شەشۋشى شايقاسقا ابىلقايىر حان قولباسشىلىق جاساپ, ارداگەرلەر قاراكەرەي قابانباي, قانجىعالى بوگەنباي, شاقشاق جانىبەك, شاپىراشتى ناۋرىزباي جانە ايگىلى جىراۋلار اقتامبەردى, ۇمبەتەيلەر قاتىسقاندىقتان بۇل ورىن قازىر جالپىۇلتتىق ماڭىزعا يە قۇندى نىسان رەتىندە تىركەلىپ وتىر.
جاڭا عاسىردىڭ العاشقى جىلى «اڭىراقاي» شايقاسىنا 270 جىل تولۋىنا وراي الماتى وبلىسى اكىمدىگى جەرگىلىكتى زيالى قاۋىم وكىلدەرىنىڭ قاتىسۋى مەن مايدان وتكەن ورىنعا ارنايى تاسبەلگى ورناتىپ (سۋرەتتە), كەيىنگى ۇرپاققا ەستەلىك قالدىردى.
دايىنداعان بەكەن قايرات ۇلى,
«Egemen Qazaqstan»
