فريستايلشىلار 16 جۇلدە جيىنتىعى ءۇشىن تالاسادى. وسى ورايدا قازاقستاننىڭ باستى ءۇمىتى يۋليا گالىشەۆا ەكەنىن ايتا كەتۋگە ءتيىسپىز. 2018 جىلى پحەنچحان قالاسىندا الاۋى تۇتانعان وليمپيا ويىندارى, 2015 جانە 2017 جىلدارداعى الەم چەمپيوناتتارىندا جۇلدەگەرلەر قاتارىنان كورىنگەن جەرلەسىمىز بۇل جولى دا جاسىنداي جارقىراپ, جەڭىس تۇعىرىنا كوتەرىلەدى دەپ ۇمىتتەنەمىز. سونداي-اق, گالىشەۆا ازيا ويىندارىندا ءۇش رەت جانە دۇنيەجۇزىلىك ۋنيۆەرسيادادا ەكى رەت التىننان القا تاعىندى.
ءتورت بىردەي وليمپيادادا باق سىناپ, التى رەت الەم چەمپيوناتىنا قاتىسقان دميتري رەيحەردكە دە ۇلكەن سەنىم ارتامىز. ازيا ويىندارى مەن دۇنيەجۇزىلىك ۋنيۆەرسيادانىڭ جەڭىمپازى دەگەن اتاعى بار وتانداسىمىز وسى جولى بارىن سالۋعا ءتيىس. سونىمەن قاتار, پاۆەل كولماكوۆ, اياۋلىم امىرەنوۆا, سەرگەي رومانوۆ جانە الەكساندر گەبەرت سىندى سپورتشىلار دا سولت-لەيك-سيتيگە ساپار شەكتى.
فريستايلدىڭ شاڭعى اكروباتيكاسى ءتۇرى بويىنشا جانبوتا الدابەرگەنوۆا, جىبەك اراپباەۆ, باعلان ىنكاربەك, اقمارجان قالمۇرزاەۆا سىندى قازاقتىڭ ۇل-قىزدارى ونەر كورسەتەدى. ولاردىڭ بارلىعى دا تالاي ءىرى دودالاردا ىسىلىپ, ۇلكەن تاجىريبە مەكتەبىنەن وتكەن. جوعارىدان ەسىمدەرى اتالعان سپورتشىلاردان بولەك, الەم چەمپيوناتىندا ەلدار بادرۋدينوۆ تا باق سىنايدى.
ال سنوۋبورد سايىسىندا قازاقستاندا ءوز دەڭگەيىندە دامىماي جاتىر. سول سەبەپتى دە الەم چەمپيوناتىنا اتتانعان سپورتشىلارىمىز فينالدىق سايىسقا جولداما السا دا, سونىڭ ءوزى ۇلكەن جەتىستىك بولار ەدى. جالپى سپورتتىڭ بۇل تۇرىندە 14 جۇلدە جيىنتىعى ساراپقا سالىنادى.
عالىم سۇلەيمەن,
«Egemen Qazaqstan»
