بۇگىندە اۋدانداعى ورتاشا ەڭبەكاقى مولشەرى 97 مىڭ تەڭگەنى قۇراپ وتىر. وتكەن جىلدىڭ قورىتىندىسى بويىنشا, جارقايىڭ اۋدانى بيۋدجەتتىڭ كىرىس بولىگىن ورىنداۋ بويىنشا وبلىستا الدىڭعىلاردىڭ قاتارىندا. جالپى اۋداندا ەكونوميكانىڭ بارلىق سالالارى بويىنشا العا ۇمتىلۋ بايقالادى. وتكەن جىلى 2000 شارشى مەتر تۇرعىن ءۇي پايدالانۋعا بەرىلگەن. بۇل بۇرناعى جىلمەن سالىستىرعاندا 21 پروتسەنتكە كوپ. ۇستىمىزدەگى جىلى 75 جانە 60 پاتەرلىك تۇرعىن ۇيلەر قالپىنا كەلتىرىلمەك. سوڭعىسى «7-20-25» باعدارلاماسىنىڭ اياسىندا پايدالانۋعا بەرىلەتىن بولادى. اۋدان اكىمى مۇرات بالپاننىڭ ايتۋىنشا, بۇگىندە اۋداندا ءالى كۇنگە دەيىن تولىق شەشىمىن تاپپاي كەلە جاتقان وزەكتى ماسەلەلەر دە بار.
– اۋدانداعى وزەكتى ماسەلەلەردىڭ ءبىرى اۋىز سۋ جانە جول قاتىناسى. وتكەن جىلى ءبىز ءبىرسۋات اۋىلىنداعى سۋ قۇبىرى جەلىلەرىن قالپىنا كەلتىرۋ جانە شويىندىكول اۋىلىنداعى سۋ قۇبىرى جەلىلەرىن قايتا قۇرۋ بويىنشا جوبالىق-سمەتالىق قۇجاتتاما دايىنداۋ جۇمىستارىن باستادىق. اعىمداعى جىلى ەكى اۋىلدىڭ ماسەلەسىن شەشەتىن بولامىز. اۋدانداعى جولدىڭ قاشىقتىعى 464 شاقىرىمدى قۇرايدى. ونىڭ 110 شاقىرىمى رەسپۋبليكالىق ماڭىداعى جولدار. ارقالىق-دەرجاۆينسك باعىتىنداعى تاس جولدى جوندەۋ – كوپ جىلدان بەرى شەشىمىن تاپپاي كەلە جاتقان ماسەلەلەردىڭ ءبىرى. وسى ماقساتقا 1 ميلليارد 200 ميلليون تەڭگە قارجى ءبولىنىپ وتىر. جولدى جوندەۋ جۇمىستارىنىڭ ءبىرىنشى كەزەڭى وتكەن جىلى اياقتالدى. اعىمداعى جىلى جولدار تولىعىمەن جوندەلەدى,–دەيدى جارقايىڭ اۋدانىنىڭ اكىمى مۇرات بالپان.
اۋىل شارۋاشىلىعى سالاسىن دامىتۋدىڭ نەگىزگى باعىتتارىنىڭ ءبىرى – مال شارۋاشىلىعى. بۇل باعىتتا وتكەن جىلى تاسوتكەل اۋىلىندا ءىرى قارا مالعا ارنالعان تاۋارلى ءسۇت فەرماسى ۇيىمداستىرىلدى. بۇگىنگى تاڭدا فەرما ءسۇت ونىمدەرىنىڭ 5 ءتۇرىن شىعارادى. وتكەن جىلى اۋداندا ءىرى قارا مال باسى 21 پروتسەنتكە, قوي باسى 11 پروتسەنتكە كوبەيدى. ەلباسى ءوزىنىڭ جىل سايىنعى جولداۋلارىندا قوعامنىڭ بارلىق سالاسىن اۆتوماتتاندىرۋ قاجەت دەگەن مىندەت قويىپ وتىر. وسى ورايدا, بۇگىندە اۋدان بيۋدجەتىنىڭ 56 پروتسەنتى ءبىلىم سالاسىن قارجىلاندىرۋعا جۇمسالۋدا. اۋدانداعى ءبىلىم وشاقتارىنىڭ 55 پروتسەنتى جاڭا تەحنولوگيالارمەن جابدىقتالىپ, روبوتوتەحنيكا, ءىت-سىنىپتار اشىلعان.
بايقال ءبايادىل,
«Egemen Qazaqstan»
جارقايىڭ اۋدانى,
اقمولا وبلىسى
