اۋدان وتكەن جىلى ەكونوميكا مەن الەۋمەتتىك سالانىڭ باسىم باعىتتارى بويىنشا وڭ كورسەتكىشتەرگە قول جەتكىزگەن. ەكونوميكاسىنىڭ 94 پروتسەنتى اۋىل شارۋاشىلىعىنا تيەسىلى بولسا, ونىڭ 82,1 پروتسەنتىن وسىمدىك شارۋاشىلىعى قۇرايدى. بيىل ەت ەكسپورتىن 2,5 ەسەگە ارتتىرۋ تۋرالى ەلباسىنىڭ تاپسىرماسىن جۇزەگە اسىرۋ ماقساتىندا اۋداندا مال شارۋاشىلىعىن دامىتۋعا دەن قويىلۋدا. ماسەلەن, ەگىندىكول اۋىلىندا جالپى سوماسى 420 ميلليون تەڭگەگە ەت وڭدەۋ, 5 مىڭ باس كۇركەتاۋىق ءوسىرۋ كەشەنىنىڭ جانە مال سويۋ بەكەتىنىڭ قۇرىلىسى جۇرگىزىلمەك. ال, قورجىنكول اۋىلىندا 172 ميلليون تەڭگەگە 100 باس قازاقتىڭ اقباس ەتتى ءىرى قاراسىن ءوسىرۋ قولعا الىنىپ, مال سويۋ جانە ەتتى وڭدەۋ تسەحى سالىنباق. اتالعان جوبالاردىڭ جۇزەگە اسىرىلۋى قوسىمشا 40 جاڭا جۇمىس ورنىنىڭ اشىلۋىنا سەبەپشى بولماق. ەگىندىكول اۋدانى ءۇشىن بۇگىندە اۋىز سۋ ماسەلەسى وتكىر تۇر. ماسەلەن, اۋدانعا اۋىز سۋ ۇزىندىعى 100 شاقىرىم بولاتىن نۇرا سۋ قۇبىرى ارقىلى جەتەدى. 50 جىل بۇرىن سالىنعان سۋ قۇبىرى جىل سايىن ىستەن شىعىپ, تۇرعىنداردىڭ اۋىز سۋسىز قالىپ جۇرگەن كۇندەرى از بولماعان. ەندى بۇل ماسەلە, الداعى جىلدارى تۇبەگەيلى شەشىلمەك.
–جارتى عاسىر بۇرىن سالىنعان سۋ قۇبىرىنىڭ ابدەن توزىعى جەتكەن. جاماۋمەن كۇنىمىز وتەدى. ەندى بۇل ماسەلە ۇكىمەت قاۋلىسىمەن ءبىرجولاتا شەشىلەدى دەپ ۇمىتتەنىپ وتىرمىز. ياعني, سۋ قۇبىرى شارۋاشىلىق جۇرگىزۋ قۇقىعىنداعى مەملەكەتتىك مەكەمەنىڭ قۇزىرىنا بەرىلمەك. ويتكەنى, جاڭا قۇبىردىڭ سالىنۋىنا نەمەسە بار قۇبىردى كۇردەلى جوندەۋدەن وتكىزۋگە شامامەن 5 ميلليارد تەڭگە قاجەت. ال, بۇل سومانى وبلىستىق جانە اۋداندىق بيۋدجەت كوتەرە المايدى. ەندى اتالعان مەكەمە جوبالىق-سمەتالىق قۇجات ازىرلەيدى. سودان كەيىن بارىپ قۇبىردى جوندەۋگە كىرىسەدى. ءسويتىپ, اۋدان تۇرعىندارى بولاشاقتا تاۋلىك بويى ۇزدىكسىز اۋىز سۋمەن قامتىلادى,–دەيدى ەگىندىكول اۋدانىنىڭ اكىمى ەرلان يسابەكوۆ.
ەگىندىكول اۋدانى ءۇشىن ماڭىزدى ماسەلەلەردىڭ ەندى ءبىرى – جول قاتىناسى. بۇگىندە اۋداندا «نوۆوچەركاسسك-ەگىندىكول» باعىتىنداعى اۆتوجول جوندەۋدەن وتكىزىلۋدە. 53 شاقىرىمدىق جولدىڭ 34 شاقىرىمى جوندەلدى, قالعان جولدى جوندەۋ بيىل جالعاستىرىلماق. اۋداندىق بيۋدجەتتەن كوكتەمگى تاسقىننان زارداپ شەگەتىن ەگىندىكول-اباي جولىن جوندەۋگە 8 ميلليون تەڭگە قاراستىرىلعان. اۋدان ورتالىعىنداعى ىشكى جولداردىڭ جوندەلۋىنە وبلىستىق بيۋدجەتتەن 20 ميلليون تەڭگە ءبولىنىپ وتىر. اۋدان تۇرعىندارى «نۇرلى جول» باعدارلاماسىمەن سالىناتىن «ورتالىق-باتىس» جولىنىڭ قۇرىلىسىنان كوپ ءۇمىت كۇتىپ وتىر.
بايقال ءبايادىل,
«Egemen Qazaqstan»
ەگىندىكول اۋدانى,
اقمولا وبلىسى
