«جاتىر موينى قاتەرلى ىسىگى – بۇگىنگى تاڭدا ەڭ ءجيى كەزدەسەتىن قاۋىپتى دەرتتەردىڭ ءبىرى. الەم بويىنشا بۇل اۋرۋ ءسۇت بەزى وبىرىنان كەيىن ەكىنشى ورىندا تۇر. جىل سايىن دۇنيە جۇزىندە جارتى ميلليونعا جۋىق قىز-كەلىنشەك اتالعان قاتەرلى ىسىككە شالدىقسا, جارتىسىنا جۋىعى كوز جۇمادى. ەلىمىزدە ورتاشا ەسەپپەن العاندا كۇن سايىن جاتىر موينى وبىرى ەكى قازاقستاندىق ايەلدىڭ ءومىرىن ۇزەدى» دەيدى وبلىستىق ونكولوگيالىق ديسپانسەردىڭ باس دارىگەرىنىڭ ورىنباسارى ولەگ دۋدياك.
ونىڭ ايتۋىنشا, 2018 جىلى جاتىر موينى وبىرىمەن ديسپانسەرلىك ەسەپكە 51 نازىكجاندى الىنعان. ولاردىڭ بارلىعى قاتەرلى ىسىكتىڭ العاشقى كەزەڭدەرىنە شالدىققان. 2017 جىلى 57 ايەل ەسەپكە قويىلىپتى.
دارىگەرلەر مەملەكەت قاراجاتىنا جۇرگىزىلەتىن سكرينينگتىڭ وزىنە ادامداردىڭ تەكسەرىلۋگە كەلە بەرمەيتىنىنە الاڭدايدى. ماسەلەن, اتالعان تەكسەرىس تىزىمىنە كىرەتىن جاتىر موينى وبىرىن انىقتاۋ قۇنى 3721 تەڭگەنى قۇرايدى ەكەن. ال سكرينينگ اياسىندا 30 بەن 70 جاس ارالىعىندا ايەلدەر ءۇشىن بۇل شارا 4 جىلدا ءبىر رەت تەگىن جۇرگىزىلەدى.
ونكولوگيالىق ديسپانسەردىڭ سكرينينگ بويىنشا جاۋاپتى مامانى كۇلزيپا ساندىباەۆا 2018 جىلى وتكىزىلگەن سكرينينگ بارىسىندا 716 ناۋقاس انىقتالىپ, 673-ءى ديسپانسەرلىك ەسەپكە الىنعانىن جەتكىزدى. ولاردىڭ 17-ءسى جاتىر موينى وبىرىنا شالدىققان. 15 ايەلدىڭ دەرتى قاتەرلى ىسىكتىڭ – ءبىرىنشى, ال ەكەۋىنىكى ەكىنشى ساتىسىندا تىركەلگەن.
«سكرينينگتىڭ ماقساتى – وبىردى العاشقى كەزەڭدەرىندە انىقتاۋ. بۇل دەرتتەن تولىق ايىعۋعا مۇمكىندىك بەرەدى. دەنساۋلىعىن تەكسەرتەمىن دەگەن جاندار ءۇشىن اپتالىق اياسىندا تەگىن «اشىق ەسىك» كۇنىن ۇيىمداستىرۋدى جوسپارلاپ وتىرمىز» دەيدى ول.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
