ايماقتار • 22 قاڭتار، 2019

ەلباسىنىڭ گرانتتار ءبولۋ تۋرالى تاپسىرماسى تولىق كولەمدە ورىندالدى — قر بعم

341 رەتكورسەتىلدى

بۇگىن پرەمەر-مينيستر باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسىندا پرەزيدەنتتىڭ بەس الەۋمەتتىك باستاماسىن ىسكە اسىرۋ بارىسىن قاراۋ اياسىندا جوعارى ءبىلىم بەرۋدىڭ قولجەتىمدىلىگى مەن ساپاسىن ارتتىرۋ، سونداي-اق ستۋدەنت جاستاردىڭ ءومىر ءسۇرۋ جاعدايلارىن جاقسارتۋ بويىنشا اتقارىلىپ جاتقان جۇمىستار تۋرالى ءبىلىم جانە عىلىم ءمينيسترى ەرلان ساعاديەۆ باياندادى.

ءمينيستردىڭ ايتۋىنشا، 2018 جىلى گرانتتار سانى 20 مىڭعا كوبەيتىلدى. ەلىمىزدەگى گرانتتاردىڭ جالپى جىل سايىن بولىنەتىن سانى 69 مىڭعا جەتتى: 53 مىڭ ستۋدەنت – باكالاۆرياتتا، 13 مىڭى – ماگيستراتۋرادا، 2 مىڭنان استام ادام PhD باعدارلامالارى بويىنشا ءبىلىم الىپ جاتىر.

ە.ساعاديەۆ بارلىق گرانت الۋشىلاردىڭ 50%-ى تەحنيكالىق ماماندىقتار بويىنشا (34 مىڭ) ءبىلىم الىپ جاتقانىن اتاپ ءوتتى. ولاردىڭ ىشىندە اقپاراتتىق-كوممۋنيكاتسيالىق تەحنولوگيالار، كيبەرقاۋىپسىزدىك، راديوتەحنيكا جانە ەلەكترونيكا سەكىلدى ەڭبەك نارىعى ءۇشىن ماڭىزدى باعىتتار بار. «سەرپىن» باعدارلاماسى بويىنشا اۋىل جاستارىنا 5 مىڭ گرانت قاراستىرىلعان. گرانتتاردىڭ شامامەن 20%-ى مۇعالىمدەردى دايارلاۋعا، ونىڭ ىشىندە تىلدىك بىلىكتىلىكتى كۇشەيتۋگە باعىتتالعان.

بارلىق جوعارى وقۋ ورىندارىندا تەحنيكالىق جانە اۋىل شارۋاشىلىعى ماماندىقتارى بويىنشا گرانتتار قۇنى ۇلتتىق جوو-لارداعى گرانتتارمەن بىردەي بولىپ، 635 مىڭ تەڭگەنى قۇرادى. وسىلايشا، ءبىلىم جانە عىلىم ءمينيسترىنىڭ ايتۋىنشا، مەملەكەت باسشىسىنىڭ گرانتتاردى ءبولۋ جانە قۇنىن ارتتىرۋ تۋرالى تاپسىرماسى تولىعىمەن ورىندالدى.

جوعارى ءبىلىمنىڭ قولجەتىمدىلىگىن قامتاماسىز ەتۋ ءۇشىن قوسىمشا شارالار قابىلدانىپ جاتىر.

بىرىنشىدەن، ۇبت جىلىنا 4 رەت وتكىزىلەدى. 2019 جىلعى قاڭتار ايىندا ءبىرىنشى رەت تەستىلەۋ وتكىزىلدى. وعان 35 مىڭنان اسا مەكتەپ تۇلەگى قاتىستى. ولارعا اقپان ايىنان باستاپ اقىلى وقۋ ءۇشىن جوعارى وقۋ ورىندارىنا تۇسۋگە مۇمكىندىك بەرىلدى.

ەكىنشىدەن، ء«بىلىم تۋرالى» زاڭعا ەنگىزىلگەن وزگەرىستەرگە سايكەس باكالاۆرياتقا ۇقساس ماگيستراتۋراعا قابىلداۋدىڭ جاڭا مودەلى ەنگىزىلۋدە. ءبىلىم بەرۋ گرانتىن تاعايىنداۋ ۇمىتكەرلەرگە جوو تاڭداۋ مۇمكىندىگىن بەرە وتىرىپ، كەشەندى تەستىلەۋ ناتيجەلەرىنىڭ نەگىزىندە ىسكە اسىرىلادى.

بۇعان قوسا، ە.ساعاديەۆ مينيسترلىك جاتاقحانالاردا جاڭا ورىنداردى بەرۋ جۇمىستارىن جالعاستىرىپ جاتقانىن ايتتى. 2019 جىلى 5000 ورىن بەرۋ كوزدەلگەن.

«بۇگىندە ءۇش جارىم اي ىشىندە بىزگە 11 144 ورىنعا 20 ءوتىنىش كەلىپ ءتۇستى، 6556 ورىنعا 12 كەلىسىمشارت جاسالدى. ولاردىڭ كوبىسى سالىنا باستادى. سونىمەن قاتار، وسى ايدىڭ سوڭىنا دەيىن 4588 ورىنعا تاعى 8 كەلىسىمشارت جاساسۋدى جوسپارلاپ وتىرمىز. بۇل – كەلەسى جىلى بەرىلەتىن جوبالار»، — دەدى ە. ساعاديەۆ.

ءبىلىم جانە عىلىم ءمينيسترى وسى جوبا ىسكە اسىرىلا باستاعاننان بەرى ءبىلىم بەرۋ ۇيىمدارى ءوز قاراجاتتارى ەسەبىنەن، وسى مەملەكەتتىك تاپسىرىس تەتىگىن قولدانباي 2780 ورىنعا ارنالعان 10 نىساندى ەنگىزگەنىن اتاپ ءوتتى.

جالپى، 2022 جىلدىڭ سوڭىنا دەيىن 75 مىڭ جاڭا ورىندى پايدالانۋعا بەرۋ ءۇشىن بارلىق جاعداي جاسالعان. 170 جەر تەلىمى انىقتالعان. ولاردىڭ 121-ءى ءبىلىم بەرۋ ۇيىمدارىنا تيەسىلى، 49-ىن اكىمدىكتەر بولگەن. 27 ۇيىم جوبالىق-سمەتالىق قۇجاتتامانى (جسق) ازىرلەدى، 62-ءسى ازىرلەپ جاتىر. ازىرلەنگەن جانە ۇلگىلىك جسق بانكى قۇرىلدى، ونى جوبانىڭ جاڭا قاتىسۋشىلارى پايدالانا الادى.

107 جوبا بويىنشا قارجىلاندىرۋ كوزدەرى انىقتالدى: 50 جوبا — ءوز قاراجاتتارى ەسەبىنەن، 57-سىن ينۆەستورلاردىڭ قاراجاتى ەسەبىنەن ىسكە اسىرۋ جوسپارلانىپ وتىر.

تەتىككە قاتىسۋعا جەكە سەكتوردى تارتۋ ماسەلەسى اسا وزەكتى ءارى ىنتالاندىرۋدىڭ قوسىمشا شارالارىن تالاپ ەتەدى. اتاپ ايتقاندا، بعم بيزنەستىڭ جول كارتاسىن 2025 جىلعا دەيىن ۇزارتۋ اياسىندا قۇرىلىس سالۋشىلاردىڭ نەسيە مولشەرلەمەلەرىن سۋبسيديالاۋدى ۇسىنادى. سونىمەن قاتار، جەرگىلىكتى اتقارۋشى ورگاندار تاراپىنان جەر تەلىمدەرىن ءبولۋ جۇمىسىن جەدەلدەتۋ قاجەت.

«جالپى العاندا، مەملەكەت باسشىسىنىڭ ءۇشىنشى باستاماسى جوسپارلانعان مەرزىم اياسىندا جۇزەگە اسىرىلىپ جاتىر جانە ونى تۇراقتى باقىلاۋدا ۇستاپ وتىرمىز»، — دەپ تۇيىندەدى ە.ساعاديەۆ.

سوڭعى جاڭالىقتار

قىس قىسىمىن ادام كۇشى جەڭۋدە

ايماقتار • بۇگىن، 16:56

تارازدا «اntikor ortalygy» اشىلدى

ايماقتار • بۇگىن، 16:10

200 تەڭگەلىك مونەتا اينالىمعا شىقتى

قازاقستان • بۇگىن، 10:39

قورجىنىمىز بوس قايتتى

قىسقى سپورت • بۇگىن، 06:56

بوكسشىلار امماندا ىرىكتەلەدى

كاسىپقوي بوكس • بۇگىن، 06:53

ناقىل سوزدەرگە تولى اعاش

ايماقتار • بۇگىن، 06:47

ۇقساس جاڭالىقتار