اق پەن قارا – ءبىر-بىرىنەن اجىرامايتىن ۇعىمدار. بۇلار ءوزارا بىرلەسكەندە جەكە ادامداردىڭ دا, تۇتاس حالىقتاردىڭ دا ومىرىنە قايتالانباس رەڭك بەرەدى» دەي وتىرىپ, كوپقىرلى ءارى اۋقىمدى تاريحىمىزدى دۇرىس ءتۇسىنىپ, قابىلداي ءبىلۋىمىز كەرەك دەگەن بولاتىن.
وسى ورايدا جوعارىداعى ەلباسى ماقالاسىندا اتاپ وتىلگەندەي, ۇلتىمىزدىڭ تاريحي تانىمىن تەرەڭدەتىپ, ساناسىن جاڭعىرتىپ, ەجەلگى مادەني-رۋحاني قۇندىلىقتارىمىزدى ۇرپاق بويىنا ءسىڭىرۋ ءۇشىن اتقارۋشى تاراپتاردان ءبىرشاما ىستەر قولعا الىنىپ جاتىر. ماسەلەن, وتكەن اپتا سوڭىندا ەلورداداعى ۇلتتىق مۋزەيدىڭ ۇيىمداستىرۋىمەن «ەجەلگى وركەنيەتتەر توعىسىنداعى ۇلى دالا ەلى» اتتى حالىقارالىق عىلىمي-تاجىريبەلىك كونفەرەنتسيا بولىپ ءوتتى. اتالعان باسقوسۋعا ەلىمىزدىڭ جەتەكشى عالىم-ماماندارى مەن شەتەلدىك ساراپشىلار قاتىسىپ, ۇلى دالا تاريحىنا بايلانىستى وي-تولعامدارىن ورتاعا سالدى. وسىلاردىڭ ىشىندە, ازەربايجاندىق عالىم ماحفۋزا زەينالوۆانىڭ تۇركى حالىقتارىنىڭ تاريحي-مادەني ورتاقتاستىعى جايلى ايتقان تۇجىرىمى, بوتاي مادەنيەتىن نەگىزدەۋشى عالىم-ارحەولوگ ۆيكتور زايبەرت جانە جاس مامان اقان وڭعار ۇلىنىڭ ۇلى دالا سالت اتتىلارى تۋرالى جاساعان باياندامالارى كوپتىڭ كوڭىلىنەن شىقتى.
اتالعان جيىندى تۇيىندەگەن تاريح عىلىمدارىنىڭ دوكتورى ماديار ەلەۋوۆتىڭ پايىمداۋىنشا, بۇل رەتكى باسقوسۋدا تالقىلاۋ نىسانىنا الىنعان تاقىرىبىندا ايتىلعانداي, ۇلى دالاداعى ەجەلگى وركەنيەتتەردى ساراپتاۋدىڭ باستى باعىتتارى ايقىندالدى, سونىمەن قاتار مەملەكەتارالىق تۇرعىدان ىستەلۋى قاجەت كەيبىر جۇمىستاردىڭ جوسپارى ناقتىلانىپتى.
ۇلتتىق مۋزەي ۇجىمى بۇعان دەيىن «التىن ادامنىڭ الەم مۋزەيلەرىنە شەرۋى» اتتى ۇلكەن جوبانىڭ قورىتىندىسىن جاساعان بولاتىن. بۇل باسقوسۋ سول شارانىڭ جالعاسى ىسپەتتەس. ويتكەنى الداعى جىلى ەلباسىنىڭ ماقالاسى بويىنشا اۋقىمدى جۇمىستار جوسپارلانىپ, ولاردى جۇزەگە اسىرۋدىڭ تەتىگى قالانباق. سول سەبەپتى بۇگىنگى كونفەرەنتسيانى الدا اتقارىلار كەلەلى ءىستىڭ كەڭەسى دەسە دە بولادى.
بەكەن قايرات ۇلى,
«ەگەمەن قازاقستان»
