قىركۇيەك ايىندا ىرگەتاسى قالانىپ, مەملەكەتتىك بيۋدجەت ەسەبىنەن سالىنىپ جاتقان 60 پاتەرلى 20 تۇرعىن ءۇيدىڭ 11-ءى (660 پاتەر) 2019 جىلدىڭ ءساۋىر ايىندا تاپسىرىلادى. ال, 9 تۇرعىن ءۇي (540 پاتەر) كەلەر جىلدىڭ قاراشا ايىندا ەل يگىلىگىنە بەرىلمەك. كرەديتتىك كوپقاباتتى 6 تۇرعىن ءۇيدىڭ (336 پاتەر) قۇرىلىس جۇمىستارىن 2019 جىلدىڭ ماۋسىم ايىندا اياقتاپ, پايدالانۋعا بەرۋ جوسپارلانعان. سونداي-اق, وندا مەملەكەتتىك-جەكەشەلىك ارىپتەستىك اياسىندا 280 ورىندىق بالاباقشا پايدالانۋعا بەرىلىپ, 900 ورىندىق مەكتەپ الداعى جىلى وقۋ جىلى قارساڭىندا اشىلاتىن بولادى. ودان بولەك, ىسكەرلىك ورتالىقتا اكىمشىلىك عيماراتى, باسقارمالار جانە دەپارتامەنتتەر ۇيلەرى جانە 5 جۇلدىزدى «ريكسوس» قوناق ءۇيىنىڭ قۇرىلىسى باستالعان. وبلىس ورتالىعىن ينفراقۇرىلىممەن قامتۋ جوسپارىمەن جۇمىسشى توپتى تانىستىرعان تۇركىستان قالاسىنىڭ اكىمى الىپبەك وسەرباەۆ ينجەنەرلىك ينفراقۇرىلىم قازىرگى تاڭدا سالىنىپ جاتقان اكىمشىلىك-ىسكەرلىك ورتالىعىنىڭ 270 گەكتار جانە رۋحاني-مادەني ورتالىعىنىڭ 98 گەكتار اۋماعىن قامتاماسىز ەتۋگە مۇمكىندىك بەرەتىنىن ايتىپ ءوتتى.
سونداي-اق, جۇمىسشى توپ «ازىرەت-سۇلتان» مەملەكەتتىك تاريحي-مادەني قورىعىنا ايالداپ, قوجا احمەت ياساۋي كەسەنەسىنىڭ ماڭىنان سالىناتىن تاريحي ارحيتەكتۋرالىق جوبالاردىڭ نوبايىمەن تانىستى. اتالعان اۋماقتاعى 98 گەكتار جەرگە رۋحاني جانە مادەني ورتالىق سالىناتىن بولادى.
ال تۇركىستان قالاسىن دامىتۋعا ارنالعان جيىندا مادەنيەت جانە سپورت ءمينيسترى ا.مۇحامەدي ۇلى ازىرەت سۇلتان كەسەنەسىنىڭ اينالاسىن جاڭعىرتۋعا باعىتتالعان جوبالارمەن تانىستىردى.القالى جيىنعا, سونداي-اق قوعامدىق دامۋ ءمينيسترى د.قالەتاەۆ, ەنەگەتيكا ءمينيسترىنىڭ ورىنباسارى م.مىرزاعاليەۆ وزگە دە مينيسترلىك وكىلدەرى مەن ۇلتتىق كومپانيا باسشىلارى قاتىستى. تۇركىستان وبلىسىنىڭ جانسەيىت تۇيمەباەۆ الداعى ۋاقىتتا جۇزەگە اسىرىلاتىن جوبالار جونىندە تانىستىرسا, بىرقاتار مينيسترلەر مەن مينيسترلىك وكىلدەرى جۇمىس جوسپارلارى جونىندە بايانداما جاسادى. «استاناگەنپلان» جشس-ءى ديرەكتورى س.ءجۇنىسوۆ تۇركىستان قالاسىنداعى جاڭا اكىمشىلىك-ىسكەرلىك ورتالىق نوبايىن كورسەتتى. ال «BI Group» جشس-ءنىڭ وكىلى ا.زيكيرين اكىمشىلىك-ىسكەرلىك ورتالىقتا بوي كوتەرەتىن تۇرعىن ءۇي كەشەنى مەن ۇلى دالا مۋزەيى, تۋريستىك ورتالىق, شىعىس مونشاسى, امفيتەاتر, قوجا احمەت ياساۋي مۋزەيى, وقۋشىلار سارايى, وبلىستىق عىلىمي-امبەباپ كىتاپحانا, مەديا ورتالىق, «استانا» الاڭى, ورتالىق ستاديون سىندى عيماراتتاردىڭ جوباسىمەن تانىستىردى. جيىندى قورىتىندىلاعان پرەمەر-ءمينيستردىڭ ءبىرىنشى ورىنباسارى اسقار مامين قۇرىلىس جۇمىستارىن جوسپاردان كەشىكتىرمەي دەر كەزىندە ورىنداۋدى تاپسىردى.
عالىمجان ەلشىباي,
«ەگەمەن قازاقستان»
تۇركىستان وبلىسى.
