كوميتەت توراعاسى جەڭىس نۇرعاليەۆ ءوز سوزىندە پارلامەنتشىلەر اقتوبەدە 2017 جىلعى 27 جەلتوقسانداعى «جەر قويناۋى جانە جەر قويناۋىن پايدالانۋ تۋرالى» كودەكسىن ىسكە اسىرۋ بارىسىن جانە اگروونەركاسىپ كەشەنىندەگى جاعدايدى جەتىلدىرۋ ماسەلەلەرىن تالقىلاعانىن ەسكە سالدى.
سەناتور اتاپ وتكەندەي, اقتوبە وبلىسى پايدالى قازبالارعا باي ايماقتاردىڭ قاتارىنا كىرەدى. ايماقتا سونداي-اق اۋىلشارۋاشىلىق ونىمدەرىن ءوندىرۋ جانە قايتا وڭدەۋ كولەمى ۇلعايىپ كەلەدى. وسى ورايدا, سالالىق مەكەمەلەر مەن جەرگىلىكتى كاسىپورىنداردىڭ وكىلدەرىمەن وتكىزگەن جيىن بارىسىندا جەر قويناۋىن پايدالانۋ جانە اۋىل شارۋاشىلىعى سالاسىنداعى ماسەلەلەردى شەشۋگە باعىتتالعان بىرقاتار ناقتى ۇسىنىستار سارالاندى.
ورتالىق اتقارۋشى ورگانداردىڭ وكىلدەرى سەناتورلارعا كوشپەلى وتىرىس قورىتىندىسى بويىنشا قابىلدانعان ءتيىستى حاتتامالاردىڭ ورىندالۋى تۋرالى حابارلادى.
ەنەرگەتيكا ءمينيسترىنىڭ ءبىرىنشى ورىنباسارى ماحامبەت دوسمۇحامبەتوۆ پەن ينۆەستيتسيالار جانە دامۋ ءمينيسترىنىڭ ورىنباسارى تيمۋر توقتاباەۆ جەر قويناۋىن پايدالانۋ تۋرالى زاڭنامانى جۇزەگە اسىرۋعا بايلانىستى ماسەلەلەردى شەشۋ تۋرالى دەپۋتاتتاردى حاباردار ەتتى. ولار جەر قويناۋىن پايدالانۋ تۋرالى شارتتاردى جاساۋ جانە توقتاتۋ تارتىبىنە, سونداي-اق, پايدالى قازبالاردى ءوندىرۋ ءۇشىن اۋىل شارۋاشىلىعى جەرلەرىن قايتارىپ الۋعا بايلانىستى ماسەلەلەرگە تۇسىنىكتەمە بەردى.
سەناتور مۇحتار جۇماعازيەۆ جەر قويناۋىن پايدالانۋ تۋرالى شارتتاردى توقتاتۋ جونىندەگى كوميسسيا قۇرامىنا جەرگىلىكتى اتقارۋشى ورگانداردىڭ وكىلدەرىن قوسۋ قاجەتتىگى تۋرالى ايتتى. دەپۋتات سونداي-اق قايتارىپ الاتىن جەرلەردىڭ ورنىنا شارۋالارعا وتەماقىنى قاراستىراتىن ناقتى تەتىكتەر نەمەسە قۇنى سوعان سايكەس كەلەتىن جەر ۋچاسكىلەرىن ۇسىنۋ قاجەت دەپ ەسەپتەيدى.
اۋىل شارۋاشىلىعى ءمينيسترىنىڭ ءبىرىنشى ورىنباسارى ارمان ەۆنيەۆ اۋىل شارۋاشىلىعى ونىمدەرىن وندىرۋشىلەردى تولعاندىرعان ماسەلەلەرگە وراي جاۋاپ بەردى. سالانى مەملەكەتتىك قولداۋ شارالارىنىڭ تۇراقتىلىعى, سۋبسيديالار مەن نەسيە ءبولۋ ءتارتىبى جانە ەت ءونىمىن شەت ەلدەرگە ەكسپورتتاۋدى ىلگەرىلەتۋدىڭ كەلەشەگى تالقىلانعان ماسەلەلەردىڭ قاتارىندا بولدى.
تالقىلاۋعا اقتوبە وبلىسىنىڭ اۋىل شارۋاشىلىعى باسقارماسىنىڭ باسشىسى قۇسايىن سارسەمباي, «ستەپنوە» سەرىكتەستىگىنىڭ ديرەكتورى امانعوس تولەۋوۆ, «پاريجسكايا كوممۋنانىڭ» ديرەكتورى گايك تەرتەريان مەن ەكسپورتتىق كاسىپورىن باسشىسى المات بەردەنوۆ قاتىستى. سەنات دەپۋتاتتارى راشيت اكىموۆ, بەكمىرزا ەلامانوۆ پەن دۇيسەنعازى مۋسين سۇراقتار قويىپ, ءوز ۇسىنىستارىن ورتاعا سالدى.
