كونفەرەنتسيا جۇمىسىن اشىپ, جۇرگىزگەن قاراعاندى وبلىسىنىڭ اكىمى ەرلان قوشانوۆ بيىل بۇقار جىراۋ قالقامان ۇلىنىڭ 350 جىلدىعى اياسىندا وتكىزىلگەن شارالار تۋرالى ايتىپ بەردى.
كونفەرەنتسياعا قاتىسۋشى عالىمدار «كومەكەي اۋليەنىڭ» ءومىر تاريحىنا, سوڭىنا قالدىرعان مۇراسىنا ارنالعان تاقىرىپتاردا مازمۇندى باياندامالار جاسادى. ءۇندىستاننان كەلگەن عالىم پۋنيت گاۋرا «رۋحاني جاڭعىرۋ» باعدارلاماسى جانە بۇقار جىراۋ شىعارماشىلىعى تۋرالى تەزيستەر ارقىلى تۇششىمدى اڭگىمە قوزعادى.
– بارلىعىمىزعا بەلگىلى, نۇرسۇلتان نازارباەۆ « ۇلى دالانىڭ جەتى قىرى» اتتى ماقالاسىن جاريالادى جانە ەلدىڭ بولاشاعىنا, قوعامدىق سانانىڭ جاڭعىرۋىنا ءوز كوزقاراسىن ءبىلدىردى. عۇلاما قازاق اقىنى جانە مەملەكەتتىك قايراتكەرى بۇقار جىراۋدىڭ مەرەيتويى اياسىندا ونىڭ قوعام مەن ۇلتتى دامىتۋعا قوسقان ۇلەسى جايلى بىلگەن ماڭىزدى. پرەزيدەنت قازاقستاندا جاڭعىرتۋ جانە جاڭا يدەيالاردىڭ كومەگىمەن جارقىن بولاشاق قۇرۋعا ەرەكشە تاريحي مۇمكىندىك بار ەكەنىن اتاپ ءوتتى. مەن قازاقستاندىقتاردىڭ, ونىڭ ىشىندە جاس ۇرپاقتىڭ بۇل جاڭعىرتۋدىڭ ماڭىزدىلىعىن تۇسىنەتىنىنە سەنىمدىمىن. وسى نەگىزدە ءتۇرلى ايماقتار مەن وبلىستاردان جينالعان «قازاقستاننىڭ 100 تاريحي تۇلعاسى» جوباسى دا قۇرىلۋى جانە بۇقار جىراۋدىڭ مۇراسى اتالمىش جوبانى قۇرۋ كەزىندە ماڭىزدى ماتەريال بولۋى ابدەن مۇمكىن, – دەپ اتاپ ءوتتى پۋنيت گاۋرا.
بۇقار جىراۋدىڭ ۇرپاعى قابدۇلساميح ايتقوجين «كومەكەي اۋليە» شىعارماشىلىعى قازاق حالقىنىڭ ەنتسيكلوپەدياسى ىسپەتتى دەگەن پىكىر ايتتى.
– ول ۇرپاقتار اراسىنداعى بايلانىس ءرولىن اتقارادى. بۇل تۇرعىدا بۇقار جىراۋ مۇراسى «رۋحاني جاڭعىرۋ» باعدارلاماسىن جۇزەگە اسىرۋ ىسىمەن جانە پرەزيدەنتىمىزدىڭ ۇلتتىق تاريحىمىزدىڭ جەتى قىرى تۋرالى ماقالاسىنىڭ مازمۇنىمەن جاراسىمدى ۇيلەسىم تاۋىپ وتىر, – دەپ اتاپ ءوتتى بۇقار جىراۋدىڭ جەتىنشى ۇرپاعى, جيەنشارى بولىپ كەلەتىن قابدۇلساميح ايتقوجين.
كونفەرەنتسيا جۇمىسىن قورىتىندىلاي كەلە, قاراعاندى وبلىسىنىڭ اكىمى ەرلان قوشانوۆ بىرقاتار ۇسىنىستار ايتتى.
– بىرىنشىدەن, ءبىز بۇقار جىراۋمەن بايلانىستى تاريحي ساتتەر مەن ونىڭ ءومىرى تۋرالى عانا ايتۋمەن شەكتەلمەۋىمىز قاجەت. ونىڭ تۇلعاسىنا جاڭا كوزبەن, جاڭا يدەيالارمەن قارايتىن ۋاقىت جەتتى. ەلباسىنىڭ « ۇلى دالانىڭ جەتى قىرى» ماقالاسىندا ءبىزدىڭ عۇلاما قايراتكەرلەرىمىزدىڭ ءومىرى تۋرالى بارلىق دەرەكتەردى جيناۋ قاجەتتىلىگى تۋرالى ايتىلعان. وسىعان وراي پرەزيدەنت «ارحيۆ-2025» جەتى جىلدىق باعدارلاماسىن قۇرۋدى تاپسىردى. مۇمكىن بۇقار جىراۋ تۋرالى تاريحي ايعاقتار ۇشان-تەڭىز شىعار جانە ول قۇجاتتاردى رەسەي, تۇركيا, وزبەكستان, قىتاي جانە ءۇندىستاننىڭ مۇراعاتتارىنان تابۋعا بولاتىن شىعار. ەكىنشىدەن, بۇقار جىراۋ تۇگەلدەي قازاق حالقى, تاريحىمىز ءۇشىن ايرىقشا تۇلعا بولىپ تابىلادى. سوندىقتان كەلەشەكتە بۇقار جىراۋ ينستيتۋتى پايدا بولۋى مۇمكىن دەپ ويلايمىن. عۇلاما ويشىلدىڭ مۇراسىن زەرتتەي كەلە جاس ۇرپاق ءوز حالقىنىڭ تاريحىن زەرتتەي الاتىن بولادى. سانانى, تاريحتى جانە رۋحانياتتى جاڭعىرتۋ وسىدان باستالادى. سەنىمدى بولاشاققا ءوز تاريحىن, ۇلى قايراتكەرلەرىن بىلەتىن جانە ولاردى جاس ۇرپاققا ۇلگى ەتەتىن مەملەكەت قانا قول جەتكىزە الادى, – دەدى ەرلان قوشانوۆ.
قايرات ءابىلدا,
«ەگەمەن قازاقستان»
قاراعاندى
