قىركۇيەك ايىندا باستالعان اسكەرگە شاقىرۋ ناۋقانى كەزەڭىندە مەملەكەتتىك كۇزەت قىزمەتىنىڭ «ايبىن» جانە «باتىر» پرەزيدەنتتىك پولكتەرىنە قابىلدانعان 295 جاس سارباز الماتىداعى 0111 اسكەري بولىمىندە وتان الدىندا انت قابىلدادى. بۇل ءراسىم اسكەريلەر ءۇشىن ەرەكشە جورالعى سانالىپ, ساربازداردىڭ بويىنداعى پاتريوتيزم, وتانعا جانە پرەزيدەنتكە ادال بولۋ, سونداي-اق قازاقستان رەسپۋبليكاسى مەملەكەتتىك كۇزەت قىزمەتىنىڭ قاتارىندا ادال قىزمەت اتقارۋ ءتارىزدى قاسيەتتەرگە باۋليدى.
تالاپ بويىنشا مەملەكەتتىك كۇزەت قىزمەتىنىڭ ساپىندا ساپقا تۇرۋ ءۇشىن ۇمىتكەرلەر سان سىناقتان سۇرىنبەي وتۋگە ءتيىس. بيىلعى ناۋقانداعى ىرىكتەۋ بارىسىندا دا ساربازداردىڭ زياتكەرلىك قابىلەتىنە, قىسىلتاياڭ جاعدايداعى باتىلدىعى مەن دۇرىس شەشىم قابىلداي الۋ شەبەرلىگىنە, ءتارتىبى مەن قىراعىلىعىنا ايرىقشا نازار اۋدارىلعان. ولاردىڭ سپورتتىق جەتىستىكتەرىنە دە زور ءمان بەرىلىپتى. ماسەلەن وسى جىلى قىزمەت قاتارىنا شاقىرىلعان جاس تولىمداۋلاردىڭ ساپالىق مىنەزدەمەسى جوعارى دەڭگەيدە ەكەنىن ايتۋعا بولادى. ەكى جۇزدەن ارتىق اسكەري قىزمەتشىلەردىڭ 17 پروتسەنتىنىڭ جوعارعى ءبىلىمى بار بولسا, 67 پروتسەنتى ورتا-ارنايى ءبىلىمى تۋرالى ديپلوممەن كەلگەن. جاس ساربازداردىڭ اراسىندا 4 سپورت شەبەرى, 19 سپورت شەبەرلىگىنە ۇمىتكەر بار.
وتە جاۋاپتى مىندەتتەردى ءمىنسىز اتقارۋ ءۇشىن اتالعان قىزمەتتە ساربازداردىڭ كەشەندى دەنە شىنىقتىرۋ جانە جاۋىنگەرلىك دايارلىعىنا اسا نازار اۋدارىلادى. ولار ساپتىق امالداردى, جاۋىنگەرلىك قارۋدان اتۋماشىق-داعدىسىن, سونداي-اق جاۋىنگەرلىك تەحنيكانى قۇرعاق جەردە جانە سۋدا جۇرگىزۋدى جانە تاعى باسقالاردى مەڭگەرەدى. سپورتتىق جەتىستىكتەرى بار جاۋىنگەرلەردىڭ ءارتۇرلى دەڭگەيدەگى, ونىڭ ىشىندە الەمدىك دارەجەدەگى سپورتتىق جارىستارعا قاتىسۋ مۇمكىندىگى مول.
– ەلباسىمىز قازان ايىنداعى جولداۋىندا اسكەري-پاتريوتتىق تاربيەنىڭ ءرولىن كۇشەيتۋ تۋرالى ايتقان بولاتىن. وتاندى, حالقىن, ءتىلىن قۇرمەتتەۋگە تاربيەلەنگەن ۇرپاق تۋعان جەرىن, ەلىن قورعاۋعا قابىلەتتى بولادى. ەلىمىزگە ادال قىزمەت ەتۋ جانە ونى قورعاۋ ءاربىر ازاماتتىڭ قاسيەتتى بورىشى. بۇگىن سىزدەر تۇڭعىش پرەزيدەنت كۇنى قارساڭىندا وتانعا ءمىنسىز قىزمەت ەتۋگە جانە ونى قورعاۋعا اسكەري انت قابىلدادىڭىزدار.تاۋەلسىزدىك العان جىلدارى قازاقستان وزىق ەلدەردىڭ قاتارىنا قوسىلىپ, شەت مەملەكەتتەرمەن دوستاستىعىمىز ارتا ءتۇستى. سىزدەر اسكەري ءىستى جاقسى مەڭگەرىپ, كومانديرلەردىڭ بۇيرىقتارىن بۇلجىتپاي ورىنداپ, ادال قىزمەت اتقارا وتىرىپ, قازاقستاننىڭ ماڭگىلىك ەل بولۋىنا ءوز ۇلەستەرىڭىزدى قوساسىزدار, – دەدى سالتاناتتى جيىندا ساربازداردى قۇتتىقتاعان مەملەكەتتىك كۇزەت قىزمەتى باستىعىنىڭ ورىنباسارى- وبەكتىلەردى قورعاۋ قىزمەتىنىڭ باستىعى گەنەرال-لەيتەنانت مۇحتار ايۋباەۆ.
اسكەري انت قابىلداۋ راسىمىنە الماتى قالاسى اكىمدىگىنىڭ وكىلدەرى, قوعام قايراتكەرلەرى, قر مەملەكەتتىك كۇزەت قىزمەتىنىڭ ارداگەرلەرى, جاس ساربازداردىڭ اتا-انالارى مەن تۋىستارى قاتىستى. مەملەكەتتىك كۇزەت قىزمەتىنىڭ اسكەري قىزمەتكەرلەرى وزدەرىنىڭ شەبەرلىكتەرىن, كاسىپقويلىعى مەن ءىس-قيمىلدارىنىڭ ۇيلەسىمدىگىن كورسەتىپ جيىلعانداردى ءتانتى ەتتى. ءوز كەزەگىندە جاس ساربازدار دا قىسقا مەرزىمدە العان ماشىق-داعدىلارىن, سونىڭ ىشىندە قارۋمەن جانە قارۋسىز يگەرگەن ساپتىق امالدارىن پاش ەتىپ, كوپشىلىك الدىندا سالتاناتتى مارشپەن ءجۇرىپ ءوتتى. سونداي-اق پرەزيدەنتتىك ۇرمەلى اسپاپتار وركەسترى مەن قۇرمەت قاراۋىل روتاسى پلاتس-كونتسەرتتىڭ (دەفيلە) جاڭا باعدارلاماسىن كورەرمەن نازارىنا ۇسىندى.
وتان الدىندا انت قابىلداعان ساربازدار الداعى ۋاقىتتا قر مەملەكەتتىك كۇزەت قىزمەتىنىڭ استانا مەن الماتى قالالارىنداعى اسكەري بولىمدەرى بويىنشا تاراتىلىپ, اسكەري مەرزىم ارالىعىندا جۇكتەلگەن اسا جاۋاپتى مىندەتتەردى اتقارۋعا كىرىسەتىن بولادى.
ارمان وكتيابر,
«ەگەمەن قازاقستان»
الماتى
