قالالىق اكىمدىكتىڭ مالىمەتىنشە, تاراز قالاسىنداعى ء«شولدالا» القابىنا گاز قۇبىرىن جاقىنداتۋ قۇرىلىسىنا 2017 جىلى رەسپۋبليكالىق بيۋدجەتتەن 623,2 ملن تەڭگە, وبلىستىق بيۋدجەتتەن 61,3 ملن تەڭگە, بارلىعى 682,2 ملن تەڭگە بولىنگەن. مەردىگەر مەكەمە – «مونوليت-ديزاين» جشس. جاۋاپ حاتتا قۇرىلىس-مونتاجداۋ جۇمىستارى 2017 جىلدىڭ 1 ساۋىرىندە باستالىپ, 31 شىلدەسىندە اياقتالعانى جانە گاز قۇبىرىنىڭ ۇزىندىعى 24,355 شاقىرىم ەكەنى جازىلعان.
– ء«شولدالا», «قۇمشاعال», «كولتوعان», «قىزىل-اباد» جانە 28 ساياجاي القاپتارىنىڭ ىشكى ورامدىق تاراتۋشى جەلىلەرىنىڭ قۇرىلىسى» جوباسىنىڭ جوبالاۋ-سمەتالىق قۇجاتتاماسىن ازىرلەۋگە 2018 جىلى قالالىق بيۋدجەتتەن 9,0 ملن تەڭگە بولىنگەن. قازىرگى ۋاقىتتا العاشقى دەرەكتەر قورى جيناستىرىلۋدا. جوبالاۋ-سمەتالىق قۇجاتتاما ازىرلەنىپ, مەملەكەتتىك ساراپتامادان وتكەننەن كەيىن رەسپۋبليكالىق بيۋدجەتكە قۇرىلىس-مونتاجداۋ جۇمىستارىن قارجىلاندىرۋعا ءوتىنىم جولداناتىن بولادى. سونىمەن قاتار تۇرعىندار تۇتىنىلعان ەلەكتر ەنەرگياسىنا زاڭدى تۇلعا رەتىندە قوسىمشا قۇن سالىعىن ەسەپكە العاندا 1 كۆت ساعات ءۇشىن 22,27 تەڭگەدەن تولەم جۇرگىزىپ كەلەدى. جەكە تۇلعالار ءۇشىن بەكىتىلگەن تاريف كولەمى قوسىمشا قۇن سالىعىن ەسەپكە العاندا 1 كۆت ساعات ءۇشىن 14,95 تەڭگە بولىپ بەكىتىلگەن. ەلەكتر ەنەرگياسىن پايدالانۋ بويىنشا اي سايىنعى تولەم جەتكىزۋشى ۇسىنعان شوت-فاكتۋرا نەگىزىندە جۇرگىزىلۋدە. ساياجاي تۇرعىندارى ەلەكتر ەنەرگياسىن كووپەراتيۆتىڭ ەلەكتر جەلىلەرىنەن الىپ وتىرعاندىقتان, ەلەكتر ەنەرگياسىنىڭ اقىسىن كووپەراتيۆكە تولەپ وتىر, – دەيدى كەنجەبەك ولجاباي.
ماقالا جازۋ بارىسىندا شاعىن اۋدان تۇرعىندارىمەن كەزدەسكەنىمىزدە, ولار قوعامدىق كولىك ماسەلەسىن ايتا كەلىپ, قالاعا كۇن سايىن قاتىناۋ قيىندىق تۋعىزىپ وتىرعانىن جەتكىزگەن ەدى. بۇل ورايدا قالا اكىمدىگى تاراپىنان بىرقاتار جۇمىستار قولعا الىنعان. اكىم ورىنباسارىنىڭ ايتۋىنشا, بۇگىنگى تاڭدا «قۇمشاعال» القابىنا №54 اۆتوبۋس باعىتى 8 كەستەمەن, ءجۇرۋ ارالىقتارى 20-22 مينۋتتان جەرگىلىكتى حالىققا قىزمەت كورسەتۋدە ەكەن. سونىمەن قاتار اعىمداعى جىلى حيميك, ۆەتەران ساياجايلارىنان باستاپ ءشولدالا, قۇمشاعال, كولتوعان القاپتارى ارقىلى مولتەك اۋداندارعا, №1 قالالىق اۋرۋحاناعا قاتىنايتىن №61 اۆتوبۋس باعىتىنىڭ قىزمەتىن ۇيىمداستىرۋ جونىندە كونكۋرس وتكىزىلىپتى. باعىتتىڭ ءجۇرۋ كەستەسى جەرگىلىكتى تۇرعىندارمەن كەلىسىلىپ, بۇگىندە باعىت تاڭعى مەزگىلدە ۇزدىكسىز قاتىناۋدا. قازان ايىنان باستاپ جولاۋشىلار اعىمىنىڭ كوبەيۋىمەن اتالعان باعىتقا قوسىمشا كەستە ساندارىن قوسۋ دا جوسپارلانىپتى.
سونىمەن قاتار تۇرعىندار ءبىر اتاۋدىڭ بىرنەشە جەردە كەزدەسەتىنىن, ءتىپتى جەدەل جاردەم كولىگىنىڭ ءوزى بەرىلگەن مەكەنجايدى تاپپايتىنىن ايتقان ەدى. بۇل ورايدا كەنجەبەك ولجاباي تاراز قالاسىنداعى ساياجاي القاپتارى, ساياجاي كووپەراتيۆتەرى, گاراجدىق كووپەراتيۆتەردەگى قايتالاناتىن 225 كوشە, 1 شاعىن اۋدان بويىنشا ۇكىمەتتىڭ 2014 جىلعى 24 اقپانداعى №138 قاۋلىسىنا سايكەس جۇمىستار جۇرگىزىلىپ, رەسپۋبليكالىق ونوماستيكا كوميسسياسىنىڭ 2017 جىلعى 27 قاراشاداعى وڭ قورىتىندىسىنا يە بولعانىن مالىمدەدى. قازىرگى تاڭدا بۇل ماسەلە جامبىل وبلىسى اكىمدىگى مەن جامبىل وبلىستىق ءماسليحاتىنىڭ قاراۋىنا ەنگىزىلگەن. اتالعان كوشەلەردىڭ انشلاگتارىن جاڭالاۋعا قالالىق بيۋدجەتتەن 10 ملن تەڭگە قارجى ءبولىنىپ, بىرلەسكەن قاۋلى جانە شەشىم شىققان جاعدايدا انشلاگتارىن اۋىستىرۋ جۇمىستارى جۇرگىزىلەدى.
– اۋىزسۋ قورىن انىقتاۋ ءۇشىن ينجەنەرلىك-گەودەزيالىق جۇمىستار جۇرگىزىلۋدە. سونىمەن قاتار «قۇمشاعال» سۋ بوگەتى عيماراتىن قايتا جاڭعىرتۋ جانە ء«شولدالا» القابىنا سورعى ستانساسىمەن جاڭا سۋ بوگەتى عيماراتىنىڭ قۇرىلىسىن جۇرگىزۋ جۇمىستارى قاراستىرىلۋدا. وسى شارالار اياقتالعاننان كەيىن ء«شولدالا» مەن «قۇمشاعال» القاپتارىن سۋمەن قامتۋ ءۇشىن جوبالاۋ-سمەتالىق قۇجاتتاما ازىرلەنەتىن بولادى. 2019-2021 جىلدارى اتالعان جەلىلەردىڭ قۇرىلىسىن جۇرگىزۋ جوسپارلانىپ وتىر.
ال 2018 جىلدىڭ 15 تامىز كۇنى اتالعان اۋماقتىڭ تۇرعىندارىمەن قالا اكىمدىگىنىڭ ماماندارى جينالىس وتكىزىپ, كوتەرىلگەن ماسەلەلەر بويىنشا تۇرعىندارعا ءتۇسىندىرۋ جۇمىستارىن جۇرگىزدى, – دەيدى كەنجەبەك ولجاباي.
حاميت ەسامان,
«ەگەمەن قازاقستان»
جامبىل وبلىسى
