قازىرگى ۋاقىتتا الماتى قالاسىنىڭ كاسىپكەرلەر پالاتاسى جەتى سالا بويىنشا 300-دەن استام كاسىپورىندى قۇجاتتاندىردى. كاسىپورىندارداعى كوكەيكەستى ماسەلەلەر جۇيەلى تۇردە انىقتالىپ, ونىڭ ىشىندە جۇكتەمە دەڭگەيىنىڭ (56%-دان كەم) جانە قارجى كوزدەرىنىڭ جەتكىلىكسىزدىگى انىقتالدى. بۇگىندە حالىق تۇتىناتىن تاۋارلار شىعارۋدى قارجىلاي قولداۋ كورسەتۋگە بايلانىستى 20 وڭدەۋ ونەركاسىبى انىقتالعان. ءۇش جىل ىشىندە ساۋدا سالاسىنا 240 ملرد تەڭگەدەن استام جەكەلەي قارجى سالىنعان.
الماتى قالاسى كاسىپكەرلەر پالاتاسىنىڭ ديرەكتورى باعدات تەلەبايدىڭ ايتۋىنشا, اعىمداعى جىلدىڭ شىلدە ايىندا كاسىپكەرلەر پالاتاسى كۇردەلى ماسەلەلەردى انىقتاۋ ماقساتىندا قالا بازارلارىنا قۇجاتتاما جۇرگىزگەن. ونىڭ بارىسىندا بازارلاردى جاڭارتۋ جۇمىستارىن جۇرگىزۋگە مەنشىك يەلەرىنىڭ قاراجاتىنىڭ جەتىسپەۋشىلىگى مەن بازارلاردى زاماناۋي سيپاتقا كەلتىرۋ ماسەلەلەرى انىقتالعان. وسى تۇرعىدا «جىبەك جولى» وڭىرلىك باعدارلاماسى اياسىندا ماقساتتى قارجىلاندىرۋ ماسەلەسى كوتەرىلدى. الماتى قالاسىنىڭ كاسىپكەرلەر پالاتاسى قالا بويىنشا جاقىن جەردە ساۋدا نىساندارى جوق, سونداي-اق ەلەكتر جەلىسىنە قوسىلۋ مۇمكىندىگى بار جانە جاياۋ جۇرگىنشىلەر كوپ جۇرەتىن 100 اۋماقتى ىرىكتەپ الدى. «سسن ءۇشىن 100 نۇكتە» جوباسى الماتى قالاسى اكىمىنىڭ قاراۋىنا جىبەرىلدى. الداعى ۋاقىتتا ستانتسيونارلىق ەمەس ساۋدا نۇكتەلەرىن 100-گە, كەلەشەكتە1000-عا دەيىن ۇلعايتۋ, جالعا الۋ مەرزىمىن 4 جىل 11 ايعا دەيىن ۇزارتۋ, تىكەلەي جالعا الۋ شارتىن جاساۋ مۇمكىندىگىن قاراستىرۋ سياقتى ماسەلەلەر جوبانىڭ نەگىزگى باعىتتارى بولىپ تابىلادى.
الماتى قالاسى كاسىپكەرلەر پالاتاسى وڭىرلىك كەڭەسىنىڭ توراعاسى يۋري تىلەۋمۇراتوۆ الماتىداعى بيزنەستىڭ وزەكتى ماسەلەلەرىنە توقتالدى. ونىڭ ايتۋىنشا, بيزنەستى ەڭ الدىمەن, كولىك ماسەلەسى الاڭداتادى. اتاپ ايتقاندا, جول بويىنداعى سارى جولاقتى اۋماقتارعا توقتاۋعا تىيىم سالۋ, بىرقاتار كوشەلەردى ەكى باعىتتان ءبىر جاقتى قوزعالىسقا باعىتتاۋ جولاۋشى تاسىمالداۋشىلارى ءۇشىن بىرقاتار قيىندىقتار تۋعىزىپ وتىر. سونداي-اق ستاتسيونارلىق ەمەس ساۋدا نىساندارىن بولشەكتەۋ, سىرتقى (كورنەكى) جارناما, تاريف ماسەلەلەرى شەشىمىن تاپاي وتىر. وسى ورايداعى بارلىق وتكىر تاقىرىپتار وڭىرلىك وتىرىستاردا تالقىلانىپ, وعان مەملەكەتتىك ورگاندار مەن بيزنەس وكىلدەرى شاقىرىلدى. سونىمەن قاتار, وڭىرلىك كەڭەس نەگىزىندە سالالىق كوميتەتتەر قۇرىلعان.
بيزنەستى قۇقىقتىق تۇرعىدان قورعاۋ ماسەلەسىنە توقتالعان الماتى قالاسى كاسىپكەرلەر پالاتاسى ديرەكتورىنىڭ ورىنباسارى ايتۋار قوشمامبەتوۆتىڭ ايتۋىنشا, ەسەپتى مەرزىم ىشىندە كاسىپكەرلەردەن 138 ءوتىنىش كەلىپ تۇسكەن. پالاتا زاڭگەرلەرىنىڭ بيزنەس نىساندارىنا قۇقىقتىق كومەگىنە وراي شامامەن ءبىر ميلليارد تەڭگە ۇنەمدەلگەن (نەگىزسىز ەسەپتەۋ ايىپپۇلدار مەن ءوسىمپۇلدار, تولەم جاساۋعا ماجبۇرلەۋ). ايتۋار قوشمامبەتوۆ سونىمەن قاتار «اتامەكەن» «بيزنەستى قۇتقارۋ قىزمەتى» جاڭا جوباسىن تانىستىردى. ەندىگى كەزەكتە تۋىنداعىن ماسەلەلەر بويىنشا بيزنەس وكىلدەرى 1432 نومىرىنە قوڭىراۋ سوعىپ, وزدەرىن الاڭداتقان سۇراقتار بويىنشا ءوتىنىش بىلدىرە الادى. جوبا بويىنشا كاسىپكەرلەرگە كەڭەس بەرىپ قانا قويماي, قاجەت بولعان جاعدايدا ءموبيلدى توپ جەدەل كومەككە شىعىپ, بىلىكتى ماماندار دايەكتى كەڭەستەر بەرەتىن بولادى. استانادا ىسكە قوسىلعان پيلوتتىق جوبا اياسىندا ءموبيلدى توپتىڭ قۇرامىنا ۇلتتىق پالاتا, پروكۋراتۋرا, سىبايلاس جەمقورلىققا قارسى ورگاندار, ءىىب جانە تجد قىزمەتكەرلەرى كىرەدى.
ال سەرۆيستىك قىزمەتتەردى تسيفرلاندىرۋ باعىتىندا بيزنەس وكىلدەرى ۇيدە وتىرىپ-اق مامان كەڭەسىنە جۇگىنە الادى. ياعني, ونلايىن ارقىلى تولعاندىرعان سۇراقتارىنا جاۋاپ الا الادى.
الماتى قالاسى كاسىپكەرلەر پالاتاسى اپپاراتىنىڭ باسشىسى نۇرلان قابىشتاەۆتىڭ ايتۋىنشا, اعىمداعى جىلدىڭ 1 تامىزىنا دەيىن بۋحگالتەرلىك جانە سالىقتىق ەسەپكە الۋ, كەدەندىك راسىمدەر, ماركەتينگ, زاڭتانۋ ماسەلەلەرى بويىنشا كونسۋلتاتسيالار مەن قىزمەتتەر, اقپاراتتىق تەحنولوگيالارعا قىزمەت كورسەتۋ, مەملەكەتتىك-جەكەمەنشىك ارىپتەستىك, سونداي-اق جوبالاردى سۇيەمەلدەۋدى بيزنەسمەندەر كاسىپكەرلەرگە قىزمەت كورسەتۋ ورتالىعىنا حابارلاسىپ, مەنەدجەر-كەڭەسشىلەرگە جۇگىنۋ ارقىلى العان بولسا, ەندىگى كەزەكتە وتىنىشتەر ونلاين رەجيمدە services.atameken.kz پورتالىندا قابىلدانادى. وسىعان وراي ەكى جارىم اي ىشىندە 2478 الماتىلىق ونلاين رەجيمدە وتىنىشتەرگە جاۋاپ العان.
ەلۆيرا سەرىكقىزى,
«ەگەمەن قازاقستان»
الماتى
