وعان سەبەپ – ورال مەن اۋدان ورتالىعىنا قاتىنايتىن تاكسي باعاسىنىڭ 2500 تەڭگەدەن 3000-عا كوتەرىلۋى. انشەيىندە جالاقى مەن جانار-جاعارماي وسە قالسا, باعاسىن وسىرە قوياتىن تاكسي قىزمەتى نارىقتا وزگەرىس بولا تۇرا, تاريفتەرىن تۇسىرمەي, كەرىسىنشە كوتەرىپ جاتقانى تۇرعىندار اراسىندا نارازىلىق تۋعىزۋدا. وسى ماسەلەنىڭ ءمان-جايىن ساراپتاپ كورۋدى ءجون سانادىق.
بۇگىندە قازتالوۆ – ورال ارالىعىنا قاتىنايتىن جەكە تاكسيلەردىڭ قۇنى 3000 تەڭگە, ال جالپاقتال – ورال اراسى 2500 تەڭگە. بۇل باعانى ولارعا ەشكىم شەگەلەپ بەكىتىپ بەرگەن جوق, ارينە. بۇل تاكسي جۇرگىزۋشىلەرى ءوزارا كەلىسىپ العان ورتاق باعا. ال وسى ەكى اراعا قاتىنايتىن اۆتوبۋستىڭ بيلەت قۇنى 1350-1500 تەڭگە. دەگەنمەن, قازتالوۆ باعىتىنداعى 20 ورىندىق اۆتوبۋستىڭ سوڭعى كەزدەرى جۇرۋىنەن تۇرۋى كوبەيىپ كەتتى. ءتىپتى ءبىر ايعا جۋىق مۇلدەم جۇرمەي قالعانى دا بار. سونداي-اق بۇل اۆتوبۋستار تۇرعىنداردى تولىق قامتي المايدى. بيلەتتى ەرتەمەن بارىپ الماساڭىز قۇر قالاتىنىڭىز تاعى بار. تالاي مارتە ءوزىمىز وسى جاعدايدى باسىمىزدان وتكىزىپ ءجۇرمىز. امال جوق تاكسي قىزمەتىنە جۇگىنۋىڭىزگە تۋرا كەلەدى.
وسىنداي تاكسي قىزمەتىن ءجيى پايدالاناتىن اۋىل تۇرعىندارىنىڭ ءبىرى – نۇرلان قۇسايىنوۆ:
– تاكسي باعاسىنىڭ بۇلاي ءوسۋى نەگىزسىز دەپ سانايمىن. جىلدان-جىلعا وبلىس ورتالىعىنان تارتىلعان تاس جول جاقىنداپ كەلەدى. اۋدان ورتالىعىنا 30 شاقىرىم جەتپەي تۇر. تاكسي قىزمەتىندە جۇرگەندەردىڭ ىشىندە كولىكتەرى كوگىلدىر وتىنمەن جۇرەتىندەرى دە بار. جاعارماي قۇنى تومەندەگەنى تاعى بار. سوندا ولار وسىنى ەسكەرمەي مە؟ اتقارۋشى ورگاندار بۇل جاعدايدى رەتتەسە ەكەن دەيمىن, – دەگەن پىكىر ءبىلدىردى.
وسى ماسەلەگە تىكەلەي قاتىسى بار اۋداندىق تۇرعىن ءۇي-كوممۋنالدىق شارۋاشىلىق, جولاۋشىلار جول كولىگى جانە اۆتوموبيلدەر جولى بولىمىنە باس سۇعىپ, ءجون سۇرادىق. ءبولىم باسشىسى نۇرجان يسلياموۆ:
– جاقىندا وبلىس ورتالىعى مەن اۋدان ورتالىعىنا قاتىنايتىن اۆتوبۋس جوندەۋگە تۇرىپ قالعانىن پايدالانعان تاكسي قىزمەتىندەگىلەر جولاقىنى كوتەرىپ جىبەردى. بۇل ولاردىڭ جەكە شەشىمى. بىزبەن اقىلداسقان ەشكىم جوق. ودان بولەك, تاكسي قىزمەتىنە ارنايى پاتەنت الماي جۇرگەندەرى دە ءبىرشاما. ياعني, جولاۋشى تاسۋعا ەشبىر رۇقساتى جوق, بىراق ونداي كولىكتەرگە تۇرعىندار ويلانباستان ءمىنىپ جاتىر. وسى جاعدايلاردى رەتتەۋ ءۇشىن «نۇر وتان» پارتياسى, جول پوليتسياسى قىزمەتكەرلەرى جانە قوعامدىق كەڭەس مۇشەلەرىمەن بىرگە رەيدتەرگە شىعۋدى جوسپارلاپ وتىرمىز. وسى جۇمىستارمەن قاتار اۋدان ورتالىعىندا اۆتوتۇراقتار جاساقتاۋدى قولعا الىپ جاتىرمىز, – دەگەن جاۋابىن بەردى.
ارينە جوعارىدا كورسەتىلگەن جانە بەرىلگەن پىكىرلەردى ەسكەرسەك, تاكسي قىزمەتىندەگىلەردىڭ جولاقىنى كوتەرۋلەرى ءجونسىز سياقتى. بۇرىنعىداي چاپايعا دەيىن شوقالاق, جايسىز جولدىڭ اسفالت جولمەن جابدىقتالىپ جاتقانىن دا العا تارتۋعا بولادى. دەگەنمەن, تاكسي قىزمەتىندە ءجۇرىپ, ناپاقا تاۋىپ جۇرگەن ازاماتتاردىڭ دا پىكىرىنە دە قۇلاق استىق. جولاۋشى تاسىمالىمەن اينالىسىپ جۇرگەن اۋىل تۇرعىنى مەرگەن مالاحوۆ:
– اۋدان ورتالىعىندا ارنايى رۇقساتى بار, «اليپكاليەۆ» جەكە كاسىپكەرلىگى ارقىلى تىركەلگەن 23 تاكسي وبلىس ورتالىعىنا قاتىناپ جۇمىس جاساۋدا. ولاردىڭ 3-ءى بىرىك اۋىلدىق وكرۋگىنەن, 2-ءى بوستاندىقتان. ال اۋدان ورتالىعىنداعى 18-ءدىڭ قازىرگى كۇندە 12-ءسى جولاۋشى تاسىمالىمەن اينالىسۋدا. قالعاندارى ءارتۇرلى سەبەپتەرمەن ازىرگە جۇرمەي جاتىر. مەن دە وسى بەرىك اليپكاليەۆ باسقاراتىن «اليپكاليەۆ» جەكە كاسىپكەرلىگى ارقىلى جولاۋشى تاسىمالىمەن اينالىسامىن. جولاۋشى تاسىمالىنا قاجەتتى بارلىق قۇجاتتارىمىز بار. تاكسي قىزمەتىنىڭ جولاقىنى كوتەرۋ ماسەلەسىنە كەلسەك, ءبىز وتكەن جىلدىڭ 21 اقپانىندا ءوزارا كەلىسۋ ارقىلى قازتالوۆ-ورال باعىتىنداعى جولاقىنى 2500-نان 3000 تەڭگەگە كوتەردىك. بۇدان كەيىن بيىلعى جىلى جاز ايلارىندا بالالار مەن ستۋدەنتتەردىڭ اۋىل مەن قالاعا قاتىناۋىنا جەڭىلدىك رەتىندە قايتادان 2500 تەڭگەگە تۇسىرگەن بولاتىنبىز. ال قازىر ازىق-ت ۇلىك, كيىم, قۇرىلىس ماتەريالدارى كۇننەن-كۇنگە قىمباتتاپ جاتىر. كولىككە قاجەتتى اۆتوبولشەكتەر دە شارىقتاپ كەتتى. ءبىز دە تاكسي قىزمەتىندە ەرىككەننەن جۇرگەنىمىز جوق قوي. وتباسىمىزدى اسىراۋ ءۇشىن جۇمىس جاسايمىز. سول سەبەپتەن جولاقىسىن 3000 تەڭگەگە قايتادان كوتەردىك. بىزدەن باسقا رۇقساتسىز تاكسي قىزمەتىمەن اينالىساتىندار كوپ. ولاردى قاتارىمىزعا تارتۋعا ارەكەتتەنىپ كەلەمىز. اۋىل تۇرعىندارىنىڭ ىشىندە از قامتىلعان وتباسىلاردان جولاقىسىن المايمىز. كوپبالالى وتباسىلارعا وبلىس ورتالىعىنان ازىق-ت ۇلىك تە اكەلىپ بەرىپ جاتامىز. كوپشىلىك ءبىزدى دۇرىس تۇسىنسە دەيمىن, – دەگەن ءۋاجىن ءبىلدىردى.
ءيا, جولاۋشى تاسىمالىمەن اينالىساتىن تاكسي جۇرگىزۋشىلەردىڭ كوپشىلىگى جۇمىسسىز جۇرگەندەر. وتباسىن اسىراۋ ءۇشىن تەمىر تۇلپار تىزگىندەپ, تابىس تابۋدى كوزدەگەندەر. اركىمنىڭ كۇن كورىس قامى ءۇشىن ەڭبەك ەتكەنى دۇرىس. بىردەن تاكسي قىزمەتىندە جۇرگەن ازاماتتاردى كىنالاۋدان اۋلاقپىز. دەي تۇرعانمەن, ولاردىڭ قاراپايىم حالىقتىڭ قالتاسىنا تىم قاتتى سالماق سالا بەرۋگە بولمايتىنىن ەسكەرگەنى ابزال. ماسەلە وڭ شەشىم تاباتىنىنا سەنىمىمىز مول.
قايرات جاقىپ,
باتىس قازاقستان وبلىسى, قازتالوۆ اۋدانى
