ەجەلدەن اۋليەاتا اتانعان تاريحي مەكەننىڭ شەرتەر سىرى كوپ. جەتىسۋلىقتار اۋەلى وبلىس ورتالىعىنداعى «كونە تاراز» تاريحي-مادەني كەشەنىندە بولىپ, ەكى مىڭ جىلدان استام تاريحى بار كونە شاھاردىڭ تاريحىن تاماشالادى. مۇندا كەلۋشى قوناقتاردى جامبىل وبلىستىق مادەنيەت, ارحيۆتەر جانە قۇجاتتاما باسقارماسىنا قاراستى «تاريحي ەسكەرتكىشتەردى قورعاۋ جانە قالپىنا كەلتىرۋ ديرەكتسياسى» تاريح جانە ارحەولوگيا ءبولىمىنىڭ باسشىسى ساۋران قاليەۆ تاراز قالاسىنىڭ ەجەلگى ورىنىمەن تانىستىردى. مىڭداعان جىلدار بويى ساقتالىپ كەلگەن الىپ قورعاندار, قۇندى جادىگەرلەر تۋراسىندا ماعلۇمات بەردى. سونىمەن قاتار, جەتىسۋلىقتارعا «كونە تاراز» كەشەنىنىڭ اۋماعىنداعى ەرتە يسلام داۋىرىندەگى مەشىت تاريحىن, تاراز جەرىندە بولعان ايگىلى اتلاح شايقاسىن, بالبال تاستاردىڭ تاعدىرىن اڭگىمەلەدى.
بۇدان كەيىن جامبىل وبلىسىنىڭ اكىمى اسقار مىرزاحمەتوۆ الماتى وبلىستىق ءماسليحاتىنىڭ حاتشىسى سۇلتان دۇيسەنبينوۆ باستاعان جەتىسۋلىقتارمەن كەزدەستى. ءوز كەزەگىندە اكىم قوس ءوڭىردىڭ تاعىلىمعا تولى تەرەڭ تاريحى تۋرالى ءسوز قوزعاپ, بۇگىنگى تاڭدا جەتىسۋ جانە اۋليەاتا وڭىرلەرىنىڭ اراسىنداعى مادەني بايلانىستىڭ بەرىك ەكەنىنە توقتالدى. سونىمەن قاتار ەلباسىنىڭ «رۋحاني جاڭعىرۋ» باعدارلاماسىنىڭ ماڭىزدىلىعىن اتاپ ءوتتى. كەزدەسۋ بارىسىندا الماتى وبلىسىنىڭ قۇرمەتتى ازاماتى, ايگىلى «تاقيالى پەرىشتە» فيلمىندە تايلاق بەينەسىن سومداعان اكتەر الىمعازى رايىمبەكوۆ, سۇلتان دۇيسەنبينوۆ جانە وزگە دە ازاماتتار ءسوز الىپ, ءوز ويلارىمەن ءبولىستى.
جالپى, جامبىل ءوڭىرى دەگەندە اقىرتاس, تورتكۇل كەشەندەرى مەن قاراحان, ايشا ءبيبى, داۋىتبەك كەسەنەلەرى سياقتى تاريحي نىساندار ەسكە تۇسەدى. بۇل ورايدا جەتىسۋلىق رۋحاني كەرۋەن مۇشەلەرى جامبىل وبلىسىنىڭ وسىنداي تاريحي-مادەني جەرلەرىنە ساياحات جاساپ, تاعىلىمدى ورىندارمەن تانىستى. ءاربىر نىساننىڭ تاعدىرى مەن تاريحى تۋرالى اڭگىمەگە قانىقتى.
حاميت ەسامان,
«ەگەمەن قازاقستان»
جامبىل وبلىسى
