فورۋمعا قازاقستان پرەمەر-ءمينيسترى باقىتجان ساعىنتاەۆ, دسۇ باس ديرەكتورى روبەرتۋ ازەۆەدۋ, سونداي-اق, 40 دسۇ-عا مۇشە ەلدىڭ جانە دسۇ باقىلاۋشى ەلدەرىنىڭ مينيسترلەرى مەن دەلەگاتسيا باسشىلارىنان تۇراتىن الەمدىك دەڭگەيدەگى (تمد, ازيا, شىعىس ەۋروپا جانە تاياۋ شىعىس ەلدەرى) ساراپشىلار قاتىستى. 26–27 قىركۇيەك كۇندەرى استانادا دۇنيەجۇزىلىك ساۋدا ۇيىمىنا كىرۋ جونىندەگى جەتىنشى «دوڭگەلەك ۇستەل» ءوتتى.
اشىلۋ راسىمىندە قر پرەمەر-ءمينيسترى باقىتجان ساعىنتاەۆ سوز سويلەدى.
فورۋم جۇمىسى ءتورت تاقىرىپتىق سەكتسيا بويىنشا وتكىزىلەدى. ءبىرىنشى سەكتسيا ەكونوميكانىڭ تۇراقتى دامۋى, باسەكەگە قابىلەتتىلىگى, ءوسىمى جانە ونى ءارتاراپتاندىرۋ ماقساتىندا ساۋدا-ساتتىق پەن ينۆەستيتسيالاردى ۇلعايتۋعا قولداۋ كورسەتۋ ماسەلەلەرىنە ارنالعان. ەكىنشى باعىت — بيزنەستىڭ ينۆەستيتسيالاردى قولداۋ سالاسىنداعى كۇردەلى ماسەلەلەردى شەشۋ جونىندەگى پىكىرلەرى. ءۇشىنشى سەكتسيا بارىسىندا ينۆەستيتسيالار مەن يننوۆاتسيالاردى قولداۋ سالاسىندا تاجىريبەمەن الماسۋ جوسپارلانعان. سونىمەن قاتار, ىشكى جانە ايماقتىق دەڭگەيلەردەگى تابىستى وقيعالار مەن ماسەلەلەر تالقىلانباق. ءتورتىنشى سەسسيا جۇمىسى «دامۋ ماقساتىندا ينۆەستيتسيالاردى قولداۋ ءۇشىن كوپجاقتى ىنتىماقتاستىققا قاتىسۋ» تاقىرىبى بويىنشا وتەدى.
پىكىرتالاستار بارىسىندا اتالعان تاقىرىپتاردىڭ ءتۇرلى اسپەكتىلەرىنە سايكەس جان-جاقتى ءارى سىندارلى پىكىر الماسۋلار وتەدى. شارا قورىتىندىسى بويىنشا «استانا مالىمدەمەسى» قارالىپ, قابىلدانادى.
فورۋم دسۇ مۇشەلەرىن قازاقستاننىڭ ينۆەستيتسيالار تارتۋ سالاسىنداعى تابىستى تاجىريبەسىمەن جانە ينۆەستيتسيالىق مۇمكىندىكتەرىمەن تانىستىرادى, ەلىمىزدەگى ينۆەستيتسيالىق قىزمەتتى كەڭەيتۋگە جول اشىپ, دسۇ-عا مۇشە مەملەكەتتەردىڭ كوپجاقتى قارىم-قاتىناسىن ودان ءارى دامىتۋعا جاڭا سەرپىن بەرمەك.
قازاقستان دۇنيەجۇزىلىك ۇيىمعا 2015 جىلى كىردى. 2015 جىلدىڭ 22 ماۋسىمىندا رگ-نىڭ XX فورمالدى كەزدەسۋىندە قازاقستاننىڭ دۇنيەجۇزىلىك ساۋدا ۇيىمىنا كىرۋ شارتى كورسەتىلگەن قۇجات قابىلدانعان بولاتىن. 2015 جىلدىڭ 27 شىلدەسىندە دۇنيەجۇزىلىك ساۋدا ۇيىمىنىڭ باس كەڭەسىنىڭ كەزەكتى وتىرىسىندا پرەزيدەنت ن. نازارباەۆتىڭ قاتىسۋىمەن قازاقستاننىڭ دسۇ-عا كىرۋى تۋرالى حاتتاماعا قول قويۋ ءراسىمى ءوتتى.
قازاقستان 2015 جىلعى 30 قاراشادا قر پارلامەنتىنىڭ مىندەتتەمەلەر پاكەتىن راتيفيكاتسيالاۋ گراموتاسىنا قول قويۋ جانە ونى 2015 جىلدىڭ 1 قاراشاسىندا دسۇ حاتشىلىعىنا تاپسىرعاننان كەيىن دۇنيەجۇزىلىك ساۋدا ۇيىمىنىڭ تولىققاندى مۇشەسى بولدى.
2017 جىلعى 7 ساۋىردە قازاقستان رەسپۋبليكاسى ساۋدا جانە قورشاعان ورتا جونىندەگى دسۇ كوميتەتىنىڭ توراعاسى بولىپ سايلاندى. وتكەن جىلدىڭ ءساۋىر ايىندا قازاقستان «دامۋ ماقساتىندا ينۆەستيتسيالاردى قولداۋ دوستارى» توبىنا, ماۋسىم ايىندا «دامۋ ماقساتىندا ەلەكتروندىق كوممەرتسيا دوستارى» توبىنا قوسىلدى. دسۇ-عا مۇشە رەتىندە قازاقستان دۇنيەجۇزىلىك ساۋدا ۇيىمى مەن ازيا وڭىرلىك دامۋشى توبىن قۇرۋ تۋرالى XII كەلىسىمنىڭ بابىنا سايكەس, ۇيىم مۇشەلەرىنىڭ كەلىسسوزدەر توبىنا كىردى. 2018 جىلعى 7 ناۋرىزدا دسۇ-نىڭ باس كەڭەسىنىڭ كەزەكتى وتىرىسىندا قازاقستان دسۇ قىزمەت ساۋداسى جونىندەگى ارنايى سەسسياسىنىڭ توراعاسى بولىپ سايلاندى. 2018 جىلى 29 مامىردا قازاقستان 2020 جىلى دسۇ-عا مۇشە ەلدەر مينيسترلەرىنىڭ كەزەكتى كونفەرەنتسياسىن استانادا وتكىزۋدى ۇسىندى. دسۇ-نىڭ باس كەڭەسى وتىرىسىندا ۇيىمعا مۇشە ەلدەر ءبىراۋىزدان 2020 جىلدىڭ ماۋسىمىندا دسۇ-نىڭ 12-ءشى مينيسترلەر كونفەرەنتسياسىنىڭ قازاقستاندا وتكىزىلۋىن قولداپ ءبىراۋىزدان داۋىس بەردى.
دسۇ-نىڭ XII مينيسترلەر كونفەرەنتسياسى جۇمىسىنا 164 مۇشە-ەلدەردەن جانە دۇنيەجۇزىلىك ساۋدا ۇيىمىنىڭ 20 باقىلاۋشى ەلدەرىنىڭ ساۋدا مينيسترلەرى قاتىسادى. قاتىسۋشىلاردىڭ جالپى سانى 4-4,5 مىڭ ادام بولادى.
مينيسترلەر كونفەرەنتسياسى — ەكى جىلدا ءبىر رەت وتەتىن دسۇ-نىڭ جوعارى باسقارۋشى ورگانى. مينيسترلەر كونفەرەنتسياسىنىڭ قۇزىرەتى جوعارى, ونىڭ ىشىندە حالىقارالىق ساۋدانى رەتتەيتىن جاڭا قۇرالداردى بەكىتۋ تۋرالى شەشىم دە قابىلدايدى.
قازىرگى ۋاقىتتا قازاقستاندا بيزنەس ورتانى جاقسارتۋ جۇمىسى ساتىلاي جۇزەگە اسىپ كەلەدى. كاسىپتى باستاۋعا قاجەتتى قۇجاتتار ءتىزىمى ازايىپ, ولاردى الۋ جولى دا جەڭىلدەدى.
2016 جىلدان باستاپ ەلىمىزدىڭ بارلىق 16 ايماعىندا ينۆەستورلارعا قىزمەت كورسەتۋ ءۇشىن ء«بىر تەرەزە» قاعيداسىمەن جەرگىلىكتى كەڭسەلەر اشىلدى.
ينۆەستورلار مەن ۇكىمەتتىڭ ديالوگتىق الاڭى بولۋ ءۇشىن 20 جىل بويى قازاقستان رەسپۋبليكاسى پرەزيدەنتىنىڭ جانىنداعى شەتەلدىك ينۆەستورلار كەڭەسى, پرەمەر-مينيستر جانىنداعى ينۆەستيتسيالىق احۋالدى جاقسارتۋ جونىندەگى كەڭەس, ينۆەستيتسيالىق جانە بيزنەس ومبۋدسمەن ينستيتۋتتارى جۇمىس ىستەپ كەلەدى.
دۇنيەجۇزىلىك بانكتىڭ بيزنەس جۇرگىزۋ جەڭىلدىگى بويىنشا جاساعان رەيتينگىسىندە قازاقستان رەسپۋبليكاسى 35-ءشى ورىندا تۇر. ورتالىق ازيادا — ينۆەستيتسيالىق احۋالى جايلى ەل رەتىندە I ورىندا. قازاقستان ەكونوميكاسى شەتەل كاپيتالى ءۇشىن تارتىمدى, مەملەكەت $260 استام شەتەلدىك ينۆەستيتسيا تارتقان.
