فورۋم جۇمىسىنا كاسىپوداق فەدەراتسياسىنىڭ توراعاسى باقىتجان ءابدىرايىموۆ, جامبىل وبلىسىنىڭ اكىمى اسقار مىرزاحمەتوۆ, قازاقستان رەسپۋبليكاسى تۇڭعىش پرەزيدەنتى - ەلباسى قورى اتقارۋشى ديرەكتورىنىڭ ورىنباسارى يگور روگوۆ, پارلامەنت ءماجىلىسىنىڭ دەپۋتاتى دارحان مىڭباي جانە ەلىمىزدىڭ ءاربىر وڭىرىنەن كەلگەن جاستار قاتىستى. اتالعان فورۋم اياسىندا «زاماناۋي الەۋمەتتىك-ەڭبەك قاتىناستارى. قازاقستاننىڭ تەورياسى مەن تاجىريبەسى» تاقىرىبىندا عىلىمي-تاجىريبەلىك كونفەرەنتسيا ۇيىمداستىرىلدى.
رەسپۋبليكالىق جيىندى باقىتجان ءابدىرايىموۆ اشىپ, جۇرگىزىپ وتىردى. اۋەلى ءسوز العان اسقار مىرزاحمەتوۆ ەلباسى تاپسىرماسىمەن جامبىل وڭىرىندە جاستارعا ءتيىستى كوڭىل ءبولىنىپ جاتقانىن, جاستاردىڭ باسەكەگە قابىلەتتىلىگىن ارتتىرۋ ماقساتىندا كوتەرمە جاردەماقىعا 1 ميلليارد تەڭگە ءبولىنىپ وتىرعانىن جەتكىزدى.
«جاستاردىڭ باسەكەگە قابىلەتتى بولىپ قالىپتاسۋى قوعام ءۇشىن ماڭىزدى. سونىمەن قاتار, بۇگىنگى تاڭدا ەڭبەك ماسەلەسى جاستار ءۇشىن شەشۋشى ءرول اتقارۋدا. جاستار عىلىم مەن جەتىستىكتى ۇشتاستىرۋ ارقىلى ناقتى ناتيجەگە قول جەتكىزە الادى. ال ەڭ باستى ماسەلە - ەلجاندى, پاتريوت ازاماتتاردى تاربيەلەۋ. وسىنى ىلعي دا ەستە ساقتاۋ كەرەك. وتاندى سۇيە ءبىلۋ - ۇلكەن قاسيەت. مۇنى دا جاستار ۇمىتپاۋى كەرەك», دەدى اكىم. ال ءوز سوزىندە يگور روگوۆ جاستاردى جۇمىسپەن قامتۋدىڭ ماڭىزدىلىعىنا توقتالدى. جيىن بارىسىندا ءسوز سويلەگەن دارحان مىڭباي ەلىمىزدە قولعا الىنعان تسيفرلاندىرۋ جۇيەسىنىڭ الەمدىك ترەند ەكەنىن, سونىمەن قاتار بۇل ايادا ءبىراز ماماندىقتاردىڭ وزگەرەتىنىن, بۇل كاسىپتىك دەڭگەيدىڭ جوعارى ساتىسى ەكەنىن اتاپ ءوتتى.
«جاستار ىزدەنۋگە, جاڭاشىلدىققا كوپ ءمان بەرۋ كەرەك. ەلباسىنىڭ «پرەزيدەنتتىڭ بەس الەۋمەتتىك باستاماسى» اتتى حالىققا ۇندەۋى دە جاستارعا ارنالعان. بولاشاقتا ەڭبەك جاستارى قانداي بولۋى كەرەك؟ ەلىمىزدەگى ءتۇرلى باستامالارعا ولاردىڭ كوزقاراسى قانداي؟ بارلىق جاستاردىڭ وزىندىك پىكىرى قالىپتاسۋى كەرەك», دەدى دەپۋتات. سونىمەن قاتار, جيىندا ءسوز العان «قازفوسفات» جشس باس ديرەكتورى, قازاقستاننىڭ ەڭبەك ەرى مۇقاش ەسكەندىروۆ اتالعان كاسىپورىننىڭ جاستارعا ءتيىستى كوڭىل ءبولىپ, ولاردى جۇمىسقا قابىلداۋ ارقىلى ەڭبەك جاستارىنىڭ بەلسەندىلىگىن ارتتىرۋعا ۇلەس قوسىپ وتىرعانىن جەتكىزسە, قازاقستان رەسپۋبليكاسى قوعامدىق دامۋ مينيسترلىگى جاستار جانە وتباسى كوميتەتى توراعاسىنىڭ مىندەتىن اتقارۋشى اسحات ورالوۆ ەلىمىزدە 4 ميلليونعا جۋىق جاستار بار ەكەنىن, ءبىر عانا «جاسىل ەل» باعدارلاماسى بويىنشا وتكەن جىلى رەسپۋبليكا بويىنشا 25 مىڭ جاستىڭ جۇمىسپەن قامتىلعانىن, ونىڭ ىشىندە مىڭنان استام جاستىڭ جامبىلدىق ەكەنىن, سونىمەن قاتار «سەرپىن» باعدارلاماسى ارقىلى جامبىل وبلىسىنان 820 جاستىڭ ءبىلىم الىپ جاتقانىن ايتىپ ءوتتى. ال كونفەرەنتسيا سوڭىندا جاستار قاۋىمى ءتيىستى تۇلعالارعا سۇراقتار قويىپ, ناقتى جاۋاپتار الدى.
بۇدان كەيىن قوعامنىڭ الەۋمەتتىك ستاندارتتارىن كوتەرۋ جونىندەگى سەسسيا ءوتتى. مۇندا ۇلتتىق ءبىلىم جانە يننوۆاتسيا پالاتاسىنىڭ توراعاسى مۇرات ابەنوۆ, پارلامەنت ءماجىلىسىنىڭ دەپۋتاتى گەننادي شيپوۆسكيح, «جاستار ءۇنى» اقۇ توراعاسى, قر پرەزيدەنتى جانىنداعى جاستار ساياساتى جونىندەگى كەڭەس مۇشەسى داۋرەن بابامۇراتوۆ, PhD دوكتور, قازاق مەملەكەتتىك زاڭ ۋنيۆەرسيتەتىنىڭ دوتسەنتى جانە PhD دوكتورى بەيبىگۇل نۇراشەۆا, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ازاماتتىق جانە ەكولوگيالىق قۇقىق كافەدراسىنىڭ اعا وقىتۋشىسى مۋسليم حاسەنوۆ جاستارمەن پىكىر الماستى.
27 قىركۇيەك كۇنى مەرەيلى مەركى جەرىندە باستاۋ العان ەڭبەك جاستارىنىڭ رەسپۋبليكالىق فورۋمى 29 قىركۇيەك كۇنى اياقتالادى. ءۇش كۇندى قامتىعان فورۋم اياسىندا ەلىمىزدىڭ ءاربىر وڭىرىنەن كەلگەن جاستار ەڭبەك تۋرالى ەرەكشە وي ءتۇيىپ قايتاتىنىنا سەنىم مول. فورۋم بارىسىندا ۇيىمداستىرىلعان كاسىپوداق كوشباسشىسى مەكتەبى اياسىندا موتيۆاتسيالىق سەسسيا, ۇجىمدىق ستاندارتتى قالىپتاستىرۋ جونىندەگى ستراتەگيالىق سەسسيا جۇمىستارى دا جاستارعا كوپ نارسە بەرەدى. ال فورۋمنىڭ سوڭعى كۇنى جاستار مەركى وڭىرىنە ەتنوجورىققا شىعىپ, تاريحى مەن تابيعاتىن تاماشالايتىن بولادى.
حاميت ەسامان,
«ەگەمەن قازاقستان»
جامبىل وبلىسى
مەركى اۋدانى
