م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىنە جينالعان جاس عالىمدار ەكى ەلدىڭ وڭىرارالىق ىنتىماقتاستىق فورۋمىنىڭ كۇن تارتىبىنە ۇسىنىلاتىن تاقىرىپتار جايلى وي-پىكىرلەر الماسىپ, قىزىقتى, قۇندى جوبالارعا قولداۋ ءبىلدىردى.
«بيىل قاراشا ايىندا پەتروپاۆل قالاسىندا وتەتىن قازاقستان مەن رەسەي اراسىنداعى حالىقارالىق فورۋم ەكى ەل ءۇشىن دە اسا ماڭىزدى. ويتكەنى, شەكارالاس ايماقتاردا ورنالاسقاندىقتان, بىرلەسىپ شەشەتىن ورتاق ماسەلەلەر از ەمەس. كەز كەلگەن مەملەكەت ءۇشىن تۋريزم تابىس كوزى, تۋريستەردى ىنتالاندىرۋشى سالا بولىپ سانالادى», دەدى «قىزىلجار-2018» فورۋمىنا قاتىسۋشىلار الدىندا سويلەگەن سوزىندە وبلىس اكىمىنىڭ ورىنباسارى ماديار قوجاحمەت.
ۋنيۆەرسيتەت رەكتورى سەرىك ومىرباەۆ وقۋ ورنى رەسەيدىڭ 83 ۋنيۆەرسيتەتىمەن سەرىكتەستىك ورناتقانىن, ارىپتەستىك اياسىندا 237 جوبا ىسكە اسىرىلىپ جاتقانىن اتاپ كورسەتتى. 500-دەن استام حالىقارالىق كەلىسىم جاسالىپتى.
القالى باس قوسۋعا قاتىسقان قر تۇڭعىش پرەزيدەنت قورى جانىنداعى عىلىمي كەڭەس توراعاسىنىڭ ورىنباسارى سۇحراب جاپپاروۆ ءوز سوزىندە پىكىرتالاس الاڭىندا كوكەيكەستى ماسەلەلەردىڭ قوزعالعانىن, باعالى ۇىنىستاردىڭ ايتىلعانىن جەتكىزدى. ءبىزدىڭ باستى ماقساتىمىز–وزىق جوبالارعا باعا بەرۋ, قولداۋ, دەدى ول.
سۋ جانە ەكولوگيا ماسەلەلەرى ينستيتۋتىنىڭ باس عىلىمي قىزمەتكەرى دميتري چەرنىح جيىندا سۋ رەسۋرستارىن ءتيىمدى قولدانۋ جايىن كوتەردى. ونىڭ ويىنشا, ەرتىس, ورال وزەندەرىنىڭ سالالارى قازاقستان مەن رەسەيدى كوكتەي وتەدى. بۇل ورايدا, قىتاي ەلىمەن بىرلەسكەن باعدامالاردى جۇزەگە اسىرۋدىڭ ماڭىزى زور. ويتكەنى ەرتىسكە قۇياتىن وزەندەر وسى ەل اۋماعىنان باستاۋ الادى. قىتاي نەگىزگى سۋ پايدالانۋشى بولعاندىقتان, رەسەي مەن قازاقستان كوپ جاعدايدا تاۋەلدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
