جۋىردا الەۋمەتتىك جەلىلەردە قازاقستان-وزبەكستان شەكارا بەكەتىنەن ءوتۋ ءۇشىن جۇك اۆتوكولىكتەرىنىڭ ساعاتتاپ كەزەكتە تۇراتىنى تۋرالى اقپارات تاراعان بولاتىن. الايدا, تۇركىستان وبلىستىق مەملەكەتتىك كىرىستەر دەپارتامەنتى الەۋمەتتىك جەلىلەردە تاراعان اقپاراتتى جوققا شىعاردى. دەپارتامەنت وكىلدەرىنىڭ ايتۋىنشا, «قاپلانبەك» شەكارا بەكەتىنەن وتۋگە ەش كەدەرگى جوق. وبلىستاعى قازاق-وزبەك شەكارا بەكەتتەرىندە ازاماتتاردى وتكىزۋ توقتاتىلماعان. ال قارجى مينيسترلىگىنىڭ مەملەكەتتىك كىرىستەر كوميتەتى: «وزبەكستاننىڭ جاقىن جانە الىس شەتەلدەرمەن سىرتقى ساۋدانى دامىتۋىنا بايلانىستى قازاقستان اۋماعى ارقىلى وزبەكستانعا قاراي تاۋارلار اعىنى ەداۋىر ۇلعايدى. وسىعان بايلانىستى 2018 جىلدىڭ ناۋرىز ايىنان بەرى «ب.قونىسباەۆ» وتكىزۋ بەكەتى الدىندا قازاقستان جاعىنان 50-100 شامالى جۇك كولىكتىڭ جينالىپ قالۋى بايقالا باستادى», – دەپ حابارلادى.
كوميتەت مالىمەتى بويىنشا, «ب.قونىسباەۆ» بەكەتى تاۋلىگىنە 150 اۆتوكولىكتى وتكىزە الادى. دەگەنمەن, بۇگىندە «ب.قونىسباەۆ» كەدەن بەكەتى كۇشەيتىلگەن رەجىمدە جۇمىس ىستەپ, تاۋلىگىنە 250-گە دەيىن اۆتوكولىك وتكىزۋدە. «1 تامىز بەن 7 تامىز ارالىعىندا قازاقستان جاعىنان وزبەكستانعا كولىكتەردىڭ جينالىپ قالۋى 200-دەن 315-كە دەيىن كوبەيدى. بۇل كەزەڭدە وزبەك جاعى تەحنيكالىق سەبەپتەرگە بايلانىستى وتكىزۋدى تاۋلىگىنە 100 بىرلىككە دەيىن (بۇرىن 130-140 كولىك وتكىزەتىن) تومەندەتتى», دەپ تۇسىندىرەدى ورىن العان جايتتى كوميتەت.
سونداي-اق «كولىكتەردى وتكىزۋدى جەدەلدەتۋ بويىنشا ەكى كەدەن بەكەتى باسشىلارىنىڭ كەزدەسۋى كۇن سايىن وتكىزىلەتىنىن» حابارلادى. ازەربايجان, بەلارۋس, رەسەي جانە قىرعىزستاننىڭ كەدەن قىزمەتتەرىنە جۇك اعىنىن, وزبەكستانعا «قازىعۇرت», «قاپلانبەك» جانە «اتامەكەن» وتكىزۋ بەكەتتەرى بويىنشا قايتا ءبولۋ جونىندە حات جولدانعان. سونىمەن بىرگە شەتەلدىك اۆتوكولىك قۇرالدارىنىڭ وزبەكستان اۋماعى ارقىلى ترانزيتتىك ءوتۋى تۇركىستان وبلىسىنداعى «ياللاما (وزبەكستان) – «ب.قونىسباەۆ» (قازاقستان) جانە ماڭعىستاۋ وبلىسىنداعى «قاراقالپاق» (وزبەكستان) – «تاجەن» (قازاقستان) وتكىزۋ بەكەتتەرى ارقىلى رۇقسات ەتىلەتىنى تۇسىندىرىلگەن. «سوڭعى اپتادا وزبەك جاعى اۆتوكولىكتەردى وتكىزۋدى تاۋلىگىنە 150-گە دەيىن ۇلعايتتى. مەملەكەتتىك كىرىستەر كوميتەتى 16 تامىزدا قازاقستاننان وزبەكستانعا اۆتوكولىكتەردىڭ جينالىپ قالۋى 190-عا دەيىن تومەندەگەنىن حابارلادى. بۇل ماسەلەنى شەشۋ ءۇشىن «ب.قونىسباەۆ» وتكىزۋ بەكەتىن كەڭەيتۋ ارقىلى قايتا قۇرۋ جوسپارلانعان. قايتا قۇرۋدان سوڭ اۆتوكولىكتەردى وتكىزۋ كورسەتكىشى تاۋلىگىنە ءبىر مىڭعا جەتەتىن بولادى. قۇرىلىس مەرزىمى – 19 اي», دەلىنگەن مينيسترلىك حابارلاماسىندا.
قالاي بولعاندا دا, كەدەن قىزمەتكەرلەرى وتكىزۋ بەكەتتەرىندە جۇك كولىكتەرىنىڭ جۇرگىزۋشىلەرى ۋاقىتشا ورىن العان جاعدايعا تۇسىنىستىكپەن قارايتىنىن جەتكىزدى.
عالىمجان ەلشىباي,
«ەگەمەن قازاقستان»
تۇركىستان وبلىسى
