ا.سماعۇلوۆ قۇرمانعازى اتىنداعى كونسەرۆاتوريانى ءبىتىرىپ, دراما اكتەرى ماماندىعىن الىپ شىقاننان كەيىن ەڭبەك جولىن تورعاي وبلىسىندا باستاپ, كەيىن استاناداعى ق.قۋانىشباەۆ اتىنداعى دراما تەاترىندا جالعاستىرعان. «قىز جىبەك» سپەكتاكلىندە بەكەجان ءرولىن سومداعانى ءۇشىن قازاقستاننىڭ ەڭبەك سىڭىرگەن ءارتىسى اتاعىنا يە بولعان. تبيليسيدە وتكەن حالىقارالىق جاستار تەاترلارى فەستيۆالىنىڭ ديپلومانتى اتانعان.
ورتا ازيا مەن قازاقستان تەاترلارىنىڭ حالىقارالىق بايقاۋىنىڭ گران-ءپريىن جەڭىپ العان. «اپيىن», «ۇمىتپا مەنى», «كوشپەندىلەر», ء«بىرجان سال», «ەلىم-اي» «قازاق حاندىعى» فيلمدەرىندە باستى جانە قوسالقى رولدەردى بەينەلەگەن. بەلگىلى تەاتر سىنشىسى اشىربەك سىعاي «مۇزبالاق قاراقشى, قاراجۇرەك كاززاپ بەكەجاندى ءسال-ءپال سۇيكىمدىلىككە سۇيرەلەگەن, ونىڭ سۇستى جۇزىنە از-كەم قان جۇگىرتكەن الاش اكتەرى اسىلبولات سماعۇلوۆ بولدى» دەسە, قازاقستاننىڭ حالىق جازۋشىسى ساكەن ءجۇنىسوۆ «قىز جىبەكتەگى» «اسىلبولات-بەكەجان» – قازاق تەاترى ساحناسىنداعى ۇلكەن قۇبىلىس» ەكەنىن اتاپ كورسەتكەن.
كورمەنىڭ اشىلۋ راسىمىندە ايداربەك سەيپىل ۇلى كاسىبي اكتەرگە وبلىس اكىمىنىڭ قۇرمەت گراموتاسىن سالتاناتتى تۇردە تابىس ەتىپ, شىعارماشىلىق جولىنىڭ تابىستى جالعاسا بەرۋىنە تىلەكتەستىك ءبىلدىردى. جان دوسى ءا.بايمەنوۆ «سەگىز قىرلى, ءبىر سىرلى» تۇلعانىڭ اقىندىق, سازگەرلىك, انشىلىك, مۇسىنشىلىك, سۋرەتشىلىك قابىلەتتەرى جايلى كەڭىنەن اڭگىمەلەپ بەردى.
قىلقالام قۇدىرەتى ارقىلى سۋرەتشىلىك تالانتىن تانىتا بىلگەن جەرلەسىمىز كورمەگە 40-تان استام كەسكىندەمە جانە گرافيكا جۇمىستارىن ۇسىندى. ءتۇرلى جانرداعى سۋرەتتەر, جانرلىق كومپوزيتسيالار, پورترەتتەر, پەيزاجدار دا وزىندىك ورىندالۋىمەن ەرەكشەلەنەدى.
– بالا كەزىمنەن سۋرەت سالۋعا وتە اۋەس بولدىم. قابىرعالارعا ۆاسنەتسوۆتىڭ ء«ۇش باتىرىن», باسقا سۋرەتتەردى سالىپ قوياتىنمىن. جاس ۇلعايا كەلە شىنداپ اينالىسا باستادىم. سۋرەتتەرىم – جان دۇنيەمنىڭ ايناسى ىسپەتتەس. قاي-قايسىسىندا بولسىن تۋعان جەرگە دەگەن بالالىق ساعىنىشىم مەن پەرزەنتتىك تولعانىسىمدى سۋرەت تىلىندە «سويلەتۋگە» ۇمتىلدىم, – دەيدى اسىلبولات سماعۇلوۆ.
شىنىندا دا «ۋاقىت», «انا», «شىرماۋىق, جالعان دۇنيە», «اساۋ كۇرەڭ», «قالىڭدىق» تاعى باسقا كارتينالاردىڭ كاسىبي سۋرەتشىنىڭ تۋىندىلارىنان ەش ايىرماسى جوق. قورقىت, اقان سەرى, بايان سۇلۋ, قىز جىبەك, بەكەجان پورترەتتەرى دە وزىندىك دارالىعىمەن سيپاتتالادى.
ول بەينەلەۋ ونەرى مۇراجايىنا بىرنەشە تۋىندىسىن سىيعا تارتتى.
ء ومىر ەسقالي,
«ەگەمەن قازاقستان»
سولتۇستىك قازاقستان وبلىسى
