كەشە ليساكوۆ قالاسىندا كراسنووكتيابر بوكسيت باسقارماسىنىڭ اسحاناسىنان تۇستىك تاماق ىشكەن 39 جۇمىسشى ۋلانىپ قالدى. الدىمەن 38 ادام مەديتسينالىق كومەككە جۇگىنگەن, سودان سوڭ 24 ادام ليساكوۆ قالالىق اۋرۋحاناسىنا جاتقىزىلىپ, 14 ادام وبلىستىق اۋرۋحاناعا جونەلتىلگەن بولاتىن. ەرتەڭىنە وبلىستىق اۋرۋحاناعا تاعى 10 ادام جەتكىزىلدى. وسى ماسەلە بويىنشا وبلىستىق قوعامدىق دەنساۋلىق قورعاۋ دەپارتامەنتى ماماندارى وتكىزگەن ءباسپاسوز ءماسليحاتىندا تاماققا ۋلانعان جۇمىسشىلاردىڭ ءحالى جاقسارىپ كەلە جاتقاندىعى ايتىلدى.
– جۇمىسشىلار ورتا جانە جەڭىل دارەجەدە ۋلانعان. ومىرلەرىنە ەش قاۋىپ جوق. ولاردىڭ اراسىنان 15 ادامدى اۋرۋحاناعا جاتقىزباۋعا دا بولار ەدى. بىراق پروفيلاكتيكالىق شارا جانە ۋلانۋ سەبەبىن اياعىنا دەيىن زەرتتەۋ ءۇشىن بارلىعى دا ەمدەۋ ورنىندا بولۋى كەرەك دەپ شەشتىك. قازىر بارلىعى ەم الىپ جاتىر. جۇمىسشىلار اسحانادا دايىندالعان تۇستىك تاماقتان كەيىن وزدەرىن ناشار سەزىنگەن. ليساكوۆ قالالىق جانە وبلىستىق اۋرۋحانالارىندا جاتقان جۇمىسشىلاردىڭ جاعدايى جاقسارىپ كەلەدى, – دەدى وبلىستىق دەنساۋلىق ساقتاۋ باسقارماسى باستىعىنىڭ ورىنباسارى ەكاتەرينا سلوبودەنيۋك.
دارىگەرلەر ۋلانعان جۇمىسشىلارعا «اسقىنعان اسقازان قابىنۋى» دەگەن دياگنوز قويدى. ونىڭ جۇقپالى ەكەنى دە ايتىلدى.
– ءيا, بۇل جۇقپالى اۋرۋ. «اسقىنعان اسقازان قابىنۋى» – اۋرۋدىڭ جالپى اتاۋى, بۇل ءارى قاراي ءتۇر-تۇرگە بولىنەدى. ول سالمونەللەز بە, اسقىنعان جۇقپالى ءىش اۋرۋى ما, الدە ۆيرۋستىق جۇقپالى اۋرۋ ما, ازىرگە ەشنارسە ايتا المايمىز. ناۋقاستاردان تالداۋعا ماتەريالدار الىندى. لابوراتوريادا زەرتتەلگەن سوڭ, بارلىعى انىقتالادى, – دەدى وبلىستىق قوعامدىق دەنساۋلىق قورعاۋ دەپارتامەنتى جۇقپالى جانە پارازيتارلىق اۋرۋلاردى ەپيدەميولوگيالىق قاداعالاۋ ءبولىمىنىڭ باسشىسى گ ۇلىم دوسىموۆا. دارىگەرلەر جۇمىسشىلاردىڭ ۋلانۋى ساپاسىز ازىق-ت ۇلىكتەن بە, تاماقتىڭ ساپاسىز دايىندالۋىنان با, الدە اۋىرعان ادامنان تارادى ما, ونى تاپ باسىپ ايتۋعا ءالى ەرتە ەكەنىن ايتتى. اسحانادا تازالاۋ, دەزينفەكتسيا جۇمىستارى جۇرگىزىلدى. الىنعان ماتەريالدار تەكسەرىسىنەن كەيىن بارلىعى انىقتالادى. ال ناۋقاستار اۋرۋ جاعدايىنا قاراي 7 كۇننەن 10 كۇنگە دەيىن ەمدەلەدى.
ءنازيرا جارىمبەت,
«ەگەمەن قازاقستان»
