بۇگىندە جوبا بارلىق سەگىز باعىت بويىنشا تابىستى جۇزەگە اسىرىلىپ جاتىر. سونىمەن, ءبىلىم باسقارماسىنىڭ مالىمەتىنشە, «بالالاردىڭ ءىت الەمى» باعىتى اياسىندا 20 مەكتەپتى ينتەراكتيۆتى جابدىقتارمەن, كەشەندى روبوت تەحنيكالارىمەن, 3D-پرينتەرلەرمەن جابدىقتاۋ جالعاسۋدا. بۇل جۇمىس بۇگىندە قوبدا, مارتوك, ويىل, تەمىر جانە حرومتاۋ اۋداندارىندا تولىقتاي اياقتالدى.
ەرەكشە قاجەتتىلىگى بار بالالاردىڭ قۇقىعىن قامتاماسىز ەتۋ جانە ءومىر ءسۇرۋ ساپاسىن جاقسارتۋ شارالارى قابىلدانۋدا. بۇل ءۇشىن «كەدەرگىسىز ءبىلىم» ءىس-شارالارىنىڭ جەكەلەگەن بلوگى جاسالعان. ەرەكشە بالاقايلارعا ارنالعان بالاباقشا مەن قازاقستانداعى تۇڭعىش جىل بويعى ينكليۋزيۆتى «كۇنشۋاق» دەمالۋ جانە ساۋىقتىرۋ لاگەرى ەندىگى اشىلىپ, جۇمىس جاساپ جاتىر. بۇدان باسقا, تسەرەبرالدى سال اۋرۋىمەن جانە اۋتيزممەن اۋىراتىن بالالار ءۇشىن پسيحولوگيالىق-مەديتسينالىق-پەداگوگيكالىق كەڭەس بەرۋ, وڭالتۋ ورتالىقتارى اشىلدى. جالپى, وبلىستاعى 34 مەكتەپكە كەدەرگىسىز ءبىلىم بەرۋ ورتاسىن جاساۋ كوزدەلگەن.
«دەنى ساۋ بولاشاق» بلوگىن جۇزەگە اسىرۋ ءۇشىن بۇكىل وبلىس بويىنشا 140 سپورت, ويىن جانە ۆوركاۋت الاڭدارى, سونىمەن قاتار جابىق سپورت كەشەنى مەن 24 حوككەي كورتتارى سالىنىپ جاتىر. بۇل ماقساتقا 385 ملن تەڭگەدەن استام قاراجات اۋدارىلماق. دەنساۋلىعىندا كۇردەلى كىناراتى بار بالالار قىمبات تۇراتىن مەديتسينالىق قىزمەتتەردى تەگىن الاتىن بولادى, سونىڭ ىشىندە وڭتۇستىك كورەيا مەن تۇركياعا ەمدەلۋگە جىبەرىلەدى.
وسى جىلعى تامىز ايىنىڭ سوڭىنا دەيىن 118 مىڭ بالا جازعى دەمالىسپەن قامتىلماق. 10 مىڭنان اسا بالا قازاقستاننىڭ كيەلى جەرلەرىنە تەگىن ساياحاتتاۋ ءۇشىن مۇمكىندىك الدى, تاعى جۇزدەگەن جاس اقتوبەلىك تاتارستان, وزبەكستان, رف-نىڭ ورىنبور وبلىستارىنداعى ساۋىقتىرۋ جانە ءبىلىم بەرۋ لاگەرلەرىندە بولىپ قايتادى. سونىمەن بىرگە اقتوبەنىڭ وزىندە «ارتەككە» ۇقساۋى ءتيىس «اسەم» جىل بويعى لاگەرى اشىلعان بولاتىن.
بۇدان وزگە, «باقىتتى بالا» جوباسى اياسىندا كاسىپورىندار مەن مەملەكەتتىك ورگاندار جەتىم جانە اتا-انا قامقورىنسىز قالعان مىڭداعان بالانى ءوز قامقورلىقتارىنا الدى. ولار بالالاردىڭ تۇرعىن ءۇي قۇرىلىس جيناق بانكىندەگى ەسەپشوتتارىن ۇنەمى تولتىرىپ وتىرادى. ايتا كەتەيىك, جوبا باستالعالى بەرى 58 جەتىم بالا باسپانالى بولدى.
تەمىر قۇسايىن
