اكادەميك تىلەكتەس ەسپولوۆتىڭ جولى الماتىنىڭ ىرگەسىندەگى ءوزى ماي توپىراعىن بالا كەزدەن كەشىپ وسكەن سۋىقتوبە باۋرايىنا ءجيى تۇسە دە بەرمەيدى. سۇرانشى باتىر اۋىلىنا بەلگىلى عالىمنىڭ بۇل كەلۋى ءاپ-ساتتە جاڭالىققا اينالدى. ەل جايىن, مال-جان اماندىعىن سۇراپ, جەكەمەنشىك شارۋاشىلىق يەلەرىنىڭ ىستەرىمەن تانىسىپ, جانى جايدارىلانعان اكادەميك اۋىلداعى اعايىندارعا ءسۇيىنشى اڭگىمەنىڭ شەتىن شىعاردى.
ۇستىمىزدەگى جىلدىڭ 6 ماۋسىمىندا الەمنىڭ ۇزدىك ۋنيۆەرسيتەتتەرىنىڭ QS WUR-2019 رەيتينگى جاريالاندى. رەيتينگتە جەر شارىنىڭ 2 مىڭنان اسا ۋنيۆەرسيتەتى ىرىكتەلىپ, تاڭداۋلى 1 مىڭ جوعارى وقۋ ورنى ارنايى ساراپتامادان ءوتتى. وسى ساراپتامادا ت.ەسپولوۆ جەتەكشىلىك ەتەتىن قازاق اگرارلىق ۋنيۆەرسيتەتى توپ-700 ىرىكتەۋ تەستى بويىنشا الەمنىڭ ۇزدىك ۋنيۆەرسيتەتى اتاعىن الدى. بيىل وقۋ ورنىن 1314 تۇلەك باكالاۆريات بويىنشا, سونىڭ ىشىندە 320 ستۋدەنت ۇزدىك ديپلوممەن ءبىتىردى. تۇلەكتەردىڭ 85 پايىزى جۇمىسقا ورنالاسۋ مۇمكىندىگىنە يە بولدى. ديپلومدى جاس ماماندار جوبالىق جۇيە بويىنشا قازاقستاننىڭ تۇكپىر-تۇكپىرىنە اتتانىپ تا كەتتى. ايتپاقشى, توقسان جىلدىق تاريحى بار ءبىلىم شاڭىراعىندا 90 پايىزدان استام اۋىل بالالارى وقيدى. اۋىل ادامدارىمەن اراداعى اڭگىمەدە اكادەميك بۇل ماسەلەگە دە باسىمدىق بەرۋدى ۇمىتپادى.
مەملەكەت باسشىسى نۇرسۇلتان نازارباەۆتىڭ بيىلعى جولداۋىنداعى ون باسىمدىقتىڭ ءۇشىنشى باعىتىندا: «اگرارلىق ساياسات ەڭبەك ونىمدىلىگىن تۇبەگەيلى ارتتىرۋعا جانە وڭدەلگەن ءونىمنىڭ ەكسپورتىن ۇلعايتۋعا باعىتتالۋى كەرەك» دەپ اتاپ كورسەتىلدى. عالىم اگرارلىق قۋاتتى ساياساتتىڭ عالامدىق ماڭىزى مەن ءمانىسىن تىڭداۋشىلارعا ۇعىنىقتى تىلمەن ءتۇسىندىردى. الدىن الا جوسپارسىز وتكەن باسقوسۋ اۋىل تۇرعىندارىنا ۇنادى. تۇس-تۇستان جاۋعان ساۋالدىڭ بارلىعىنا عالىم تاراپىنان ناقتى جاۋاپ قايتارىلدى.
...تابيعات قانشا تۇرلەنىپ, اۋا رايى قانشا قۇبىلسا دا جەر-انا ەڭبەكتەنگەن جانعا جەمىسىن اياماي بەرەرى انىق. ورتا تولتىرعان اڭگىمەدەن سوڭ جەرگىلىكتى شارۋا قوجالىقتارىن ارالاعان اكادەميك اۋىلداعى ماۋسىمدىق تولايىم ەڭبەكتىڭ تولاسسىز تاسقىنىن كورىپ مارقايدى.
تالعات ءسۇيىنباي,
«ەگەمەن قازاقستان»
الماتى وبلىسى,
جامبىل اۋدانى,
سۇرانشى باتىر اۋىلى
