ارنايى قۇرىلعان كوميسسيا 152 ءۇيدىڭ 13-ءىن تۇرۋعا جارامسىز دەپ تانىعان-دى. قازىرگى ۋاقىتتا اۋداندا تۇرۋعا جارامدى 134 ۇيگە جوندەۋ جۇمىستارى جۇرگىزىلىپ جاتىر. ال باسپاناسى جارامسىز دەپ تانىلعان ءۇي يەلەرىنە وبلىس باسشىلىعى جاڭادان ءۇي ساتىپ الىپ بەرەمىز دەپ ۋادە بەرگەن ەدى.
«نۇر وتان» پارتياسى وبلىستىق فيليالى توراعاسىنىڭ ءبىرىنشى ورىنباسارى انۋاربەك مۇحتارحانوۆ جاقىندا شەمونايحا اۋدانىنا ارنايى بارىپ, 12 وتباسىنا باسپانا كىلتىن تاپسىرىپ قايتتى. «25 ناۋرىز كۇنگى جاعداي ءالى ەسىمدە. مەنىڭ ءۇيىم سۋعا باتىپ كەتتى. ىرگەتاسى ءۇش جەردەن جارىلدى. سول كەزدەگى جاعدايىمدى كورسەڭىزدەر عوي. قالادان جيەنىم كەلگەن بولاتىن. قورىققانىمىز سونشالىقتى, ءبىراز ۋاقىتقا دەيىن ەس جيناي المادىق. بۇرىن تەك تەلەديداردان كورەتىن جاعدايدىڭ باسىما كەلەتىنىن ويلاماعان دا ەدىم. قيىن ساتتە بىزبەن بىرگە بولعان حالقىما, اسىرەسە, ەلباسىمىزعا, وبلىس باسشىلىعىنا راحمەتىمدى ايتقىم كەلەدى. اپات بولعان العاشقى كۇننەن ءار تۇرعىننىڭ جاعدايىن جەكە-جەكە ءبىلىپ, ءۇيدى-ءۇيدى ارالاپ, گۋمانيتارلىق كومەككە دەيىن جەتكىزگەن «نۇر وتان» پارتياسىنا العىسىمىز شەكسىز», - دەيدى بۇرىنعى تۇرعان ۇيىنەن الدەقايدا جاقسى, قولايلى, 4 بولمەلى باسپاناعا قول جەتكىزگەن ليۋدميلا دەگتيارەۆا.
پارتيا فيليالىنىڭ ءباسپاسوز قىزمەتىنىڭ حابارلاۋىنشا, بۇل كۇنى شەمونايحا تۇرعىندارىنا تەك پاتەر كىلتى عانا ەمەس, استانادان ارنايى كەلگەن «مەملەكەتتىك قىزمەت كورسەتۋ سالاسىنداعى قىزمەتكەرلەردىڭ جەرگىلىكتى كاسىپتىك وداعى» قوعامدىق بىرلەستىگىنىڭ توراعاسى بىرنەشە تۇرمىستىق تەحنيكالاردى تارتۋ ەتىپتى. ناقتىراق ايتساق, ولار وزدەرىمەن بىرگە 18 توڭازىتقىش, 7 كىر جۋاتىن ماشينا, 8 تەلەديدار الىپ كەلىپتى.
«اۋداندا جوندەۋ جۇمىستارى قىزۋ ءجۇرىپ جاتىر. تامىزدىڭ اياعىنا دەيىن 126 ۇيدەگى جوندەۋ تولىق اياقتالادى. جۇمىس بارىسى تولىق باقىلاۋدا. اۋداندىق اكىمدىكتىڭ الدىنا قويىلعان مىندەت بار. سوندىقتان تاسقىننان زارداپ شەككەن حالىقتى قالىپتى تىرشىلىگىنە ورالتۋ كۇن تارتىبىندەگى باستى ماسەلە», - دەيدى «نۇر وتان» پارتياسىنىڭ وبلىستىق فيليالى توراعاسىنىڭ ءبىرىنشى ورىنباسارى انۋاربەك مۇحتارحانوۆ.
ازامات قاسىم,
«ەگەمەن قازاقستان»
شىعىس قازاقستان وبلىسى,
شەمونايحا اۋدانى
سۋرەتتەر «نۇر وتان» پارتياسى وبلىستىق فيليالىنىڭ ءباسپاسوز قىزمەتىنەن الىندى
