وڭىردەگى ءىرى ءوندىرىس ورنى – «قازتسينك» كومپانياسىنىڭ ۇيىتقى بولۋىمەن قولعا الىنعان شارا بارىسىندا بەيبىت كۇننىڭ باتىرلارىنا ارنايى ستاتۋەتكامەن بىرگە 500 مىڭ تەڭگەنىڭ سەرتيفيكاتى تابىس ەتىلدى. ەرتىستىڭ مۇزدى سۋىنان ەكى جاستاعى بالاسىن قۇتقارۋ ءۇشىن سۋعا سەكىرگەن اناسىنا جاردەمدەسكەن وسكەمەندەگى توتەنشە جاعداي ءبولىمىنىڭ ءورت ماشيناسىنىڭ جۇرگىزۋشىسى ۆيتالي باقتىباەۆ, ورتكە ورانعان ۇيگە بالكون ارقىلى كىرىپ, زەينەتكەرگە كومەك قولىن سوزعان ەلەكترومونتەر پاۆەل كاچەسوۆ, قاقاعان قاڭتار ايىندا سۋ باسقان ۇيدەن ەكى بالا مەن زەينەتكەردى قاۋىپسىز جەرگە جەتكىزگەن گلۋبوكوە اۋدانىنىڭ پراپورششيكوۆا اۋىلىنىڭ ۋچاسكەلىك ينسپەكتورى رۋسلان ورازامەتوۆ اتالعان سىيلىقتىڭ العاشقى يەگەرلەرى اتاندى. «ماعان «سىيلىققا ۇمىتكەرلەردىڭ قاتارىندا ءسىز دە بارسىز» دەپ حابارلاسقاندا سەنبەگەنىم راس. باسىنا قاۋىپ تونگەن تۇرعىندارعا كومەكتەسكەن ازاماتتاردىڭ بارلىعى قانداي ماراپاتقا دا لايىق دەپ ەسەپتەيمىن. وسىنداي تاعىلىمدى شارانى ۇيىمداستىرعان جاندارعا ريزاشىلىعىمدى بىلدىرەمىن», – دەيدى «ىزگى جۇرەك» سىيلىعىنىڭ جەڭىمپازدارىنىڭ ءبىرى ۆيتالي باقتىباەۆ.
سونىمەن قاتار كەنشىلەر مەرەكەسىندە وسكەمەن مەتاللۋرگيالىق كەشەنىنىڭ وندىرىستىك الاڭىندا داڭق اللەياسى اشىلدى. «قازتسينك» جشس اكىمشىلىك ماسەلەلەر جونىندەگى اتقارۋشى ديرەكتورى اندرەي لازارەۆ داڭق اللەياسىنىڭ اشىلۋى قاراپايىم جۇمىسشىلارعا كورسەتىلگەن قۇرمەت ەكەندىگىن, مۇندا وسىندا ەرەن ەڭبەگىمەن كوزگە تۇسكەن جۇزدەگەن قىزمەتكەرلەردىڭ سۋرەتتەرى ىلىنگەنىن ايتادى.
ازامات قاسىم,
«ەگەمەن قازاقستان»
وسكەمەن
