پەتروپاۆل قالاسىندا جالپىۇلتتىق كونكۋرستىڭ وبلىستىق كەزەڭى جەڭىمپازدارى مەن جۇلدەگەرلەرىن ماراپاتتاۋ راسىمىندە اقجار اۋدانىنىڭ نامىسىن ابىرويمەن قورعاپ, ءۇشىنشى ورىندى يەلەنگەن امىرەنوۆتەر وتباسىنا لايىقتى قۇرمەت كورسەتىلدى. ولاي بولاتىن ءجونى بار. بۇل شاڭىراق – كۇشتىك قۇرىلىم يەلەرى. بەرىك اۋداندىق ىشكى ىستەر بولىمىندە ينسپەكتور-كينولوگ بولىپ جۇمىس ىستەيدى. جان جارى جانار كاپيتان, كامەلەتكە تولماعاندار ءىسى جونىندەگى ينسپەكتور. ەكەۋى دە ارىپتەستەرى الدىندا سىيلى, بەدەلدى. تەمىردەي تارتىپكە ۇيرەنگەندىكتەن, وزگەلەردەن دە جيناقىلىقتى, جاۋاپكەرشىلىكتى تالاپ ەتەدى.
بەرىكتىڭ بۇل سالاداعى جۇمىس ءوتىلى شيرەك عاسىرعا جۋىق. ەڭبەك جولىن ۋاقىتشا ۇستاۋ وقشاۋلاعىشىندا كەزەكشىلىكتەن باستاپ, بۇگىندە ءتورت اياقتى كومەكشىسىمەن بىرگە كوپتەگەن قىلمىستاردى اشكەرەلەدى. جۇمىستىڭ ۇساق-تۇيەگى بولمايدى. سەنىم بيىگىنەن كورىنۋ – مەن ءۇشىن ۇلكەن مارتەبە. ءوزارا تۇسىنىستىك, سىيلاستىق ورىن العان وتباسىنىڭ ىرگەسى بەرىك, ۋىعى مىقتى كەلەدى. جوعارى قوعامدىق, رۋحاني-ادامگەرشىلىك تانىمدارعا جەتەلەيتىن مۇنداي سايىستار ۇرپاقتار اراسىنداعى ساباقتاستىقتى جالعاستىرۋدىڭ, قامتاماسىز ەتۋدىڭ پارمەندى جولى ەكەنىن اتاي كەتكىم كەلەدى. ويتكەنى ۇلتتىق, مادەني داستۇرلەر «شاعىن مەملەكەتتەن» باستاۋ الاتىنى ايتپاسا دا تۇسىنىكتى, دەپ وتاعاسى اعىنان جارىلادى.
جانار جونىندە ءسوز بولەك. وتاناسى وفيتسەرلىك ماماندىق پەن اتا-انالىق مىندەتتى قاتار الىپ ءجۇرۋ وڭاي ەمەس ەكەنىن ايتادى. بەس ۇل-قىزىنا دەگەن ماحاببات, سۇيىسپەنشىلىك سەزىمى ونى كاسىبي تۇرعىدان قالىپتاسۋىنا ۇلكەن سەبەپشى بولعان. ۋاقىتىنىڭ كوپ بولىگى مەكتەپ وقۋشىلارى اراسىندا وتەتىندىكتەن, ولاردىڭ نە ايتپاعىن, ەمەۋرىنىن قاس-قاباعىنان ايتقىزباي-اق ۇعادى. ءتارتىبى مەن ۇلگەرىمى تومەن تالاي بالاقاي اپايلارىنىڭ پايدالى كەڭەستەرىن الىپ, جامان داعدىلاردان ارىلىپ جاتادى. «بالالاردى ءبولىپ-جارىپ قارامايمىن. مەن ءۇشىن ءبارى بىردەي. ولاردىڭ جان-دۇنيەسىن ءتۇسىنىپ, دۇرىس باعىت بەرىپ, تۋرا جولعا سالا ءبىلۋ كەرەك. جاستا بەرگەن تاربيە جاس قايىڭدى يگەنمەن بىردەي. اقىل-كەڭەستەرىم تىعىرىقتان شىعۋعا سەپتىگىن تيگىزىپ جاتسا, ەڭبەكتىڭ اقتالعانى», دەيدى جانار مەرەكەقىزى.
امىرەنوۆتەر وتباسىنىڭ ەڭ كىشكەنتايى ەكى جاستا. يسلام مەن الۋا تەتەلەس. اكە-شەشەلەرى تۇزدە جۇرگەندە بار جاۋاپكەرشىلىك الانعا جۇكتەلەدى. ءۇيدىڭ تۇڭعىشى دياس ءابۋ دوسمۇحامبەتوۆ اتىنداعى وبلىستىق قازاق مەكتەپ-ينتەرناتىندا ءبىلىم الادى. ول وقۋدا دا, سپورتتا دا ۇزدىك. ءتۇرلى بايقاۋلار مەن جارىستاردا ەنشىلەگەن ماراپاتتارى مەن مەدالدارى جەتەرلىك. 9 جاستاعى يسلام اتا-اناسىنا قولعانات, تەك «بەسكە» وقيدى.
بەرىك پەن جاناردىڭ باستى ارمانى بالالارىن قامقورشىل, ەلگەزەك, ەل پاتريوتتارى ەتىپ تاربيەلەۋ. اتا-انالاردان العان ءتالىم-تاربيە, اعا ۇرپاقتى سىيلاۋ, قۇرمەت كورسەتۋ قاعيداتتارىن ونەگەلى وتباسى ءۇشىن بۇلجىماس زاڭ ءتارىزدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى,
اقجار اۋدانى
