مىسالى, شىعىس قازاقستان وبلىسى اياگوز اۋدانىنىڭ اكىمدىگى زارداپ شەككەندەرگە كەلتىرىلگەن زياندى وتەۋگە اقشالاي تولەمدەر جاساماعان. ال سەمەي قالاسىنىڭ اكىمدىگى باستاپقىدا جىلجىمايتىن م ۇلىك وبەكتىسىنە كەلتىرىلگەن زياندى وتەۋ ءۇشىن سۋ تاسقىنىنان زارداپ شەككەن ءاربىر تۇرعىنمەن وتەماقى تولەۋ تۋرالى شارت جاساپ, سودان كەيىن بۇل تولەمدەردەن بەلگىسىز سەبەپتەرمەن باس تارتقان. سونىمەن قاتار اياگوز قالاسىندا سۋ باسقان تۇرعىن ۇيلەردى تەحنيكالىق زەرتتەپ-قاراۋ جانە سۋ تاسقىنى سالدارىنان زارداپ شەككەندەردىڭ م ۇلىكتەرىنە كەلتىرىلگەن زياندى باعالاۋ زاڭنامانىڭ تالاپتارىنا سايكەس جۇرگىزىلمەگەن. ماسەلەن, ءبىر ءۇي بويىنشا تەحنيكالىق زەرتتەپ-قاراۋدى 3-4 رەت جۇرگىزۋ جاعدايلارى ورىن العان.
ەكىنشىدەن, زارداپ شەككەندەردىڭ ۇيلەرىندە جوندەۋ-قالپىنا كەلتىرۋ جۇمىستارىن جۇرگىزۋ ءتارتىبى دە ايقىندالماعان. سوندىقتان كەيبىر جەرگىلىكتى اتقارۋشى ورگاندار زارداپ شەككەندەرمەن ءتيىستى شارتتى جاساماي, ازاماتتىق-قۇقىقتىق جاۋاپكەرشىلىكتى جانە جۇمىسىنىڭ ساپاسىنا كەپىلدىكتى قاراستىرماي, تۇرعىنداردىڭ ۇيلەرىندە جوندەۋ جۇمىستارىن جۇرگىزگەن. بۇل زارداپ شەككەندەردىڭ ۇيلەرىندە ساپاسىز جوندەۋلەر جۇرگىزۋگە سوقتىرعان. مىسالى, اياگوز قالاسىنداعى 72 جاستاعى زەينەتكەر ر.گۋسەۆا ءوز حاتىندا ءۇيىن جوندەۋ ءۇشىن ونىڭ ءبىر بولمەسىن بۇزعانى, قابىرعالارىندا جارىقتار پايدا بولعانى, توبەسىنىڭ تولىعىمەن جابىلماعانى, جوندەۋدىڭ ساپاسىز جاسالعانى تۋرالى جازعان. «بۇل ەگدە ادامدى قورلاۋ, كەمسىتۋ عوي» دەپ ول ءوز حاتىندا نارازىلىق بىلدىرەدى.
ۇشىنشىدەن, بيىلعى ماۋسىم ايىندا قازاقستان رەسپۋبليكاسى ۇكىمەتىنىڭ 2015 جىلعى 25 ساۋىردەگى № 325 قاۋلىسىندا تابيعي سيپاتتاعى توتەنشە جاعدايلار سالدارىنان زارداپ شەككەندەرگە نارىقتىق باعامەن تۇرعىن ءۇي ساتىپ الۋ قاراستىرىلعان بولاتىن. بىراق تۇرعىن ءۇيدى ساتىپ الۋدا ونىڭ 1 شارشى مەترىنىڭ باعاسىن ەسەپتەۋ ءتارتىبى مەن ءۇيدىڭ سالىنعان جىلى, جاعدايى, تاڭداۋ تالاپتارىن كوزدەيتىن قاعيدالار بولماعاندىقتان, جەرگىلىكتى اتقارۋشى ورگان ەسكى تۇرعىن ۇيلەردى نەمەسە قۇنىنا ساي كەلمەيتىن تۇرعىن ۇيلەردى وزدەرىنە بەلگىلى تۇلعالاردان ساتىپ العان.
وسىلايشا, «ازاماتتىق قورعاۋ تۋرالى» قازاقستان رەسپۋبليكاسى زاڭىنىڭ تالاپتارىن ساقتاماۋ جانە قاجەتتى قۇقىقتىق اكتىلەردىڭ بولماۋى سۋ تاسقىنىنان زارداپ شەككەن ازاماتتاردىڭ زاڭدى قۇقىقتارى مەن مۇددەلەرىن بۇزۋعا سوقتىرعان. اتالعان فاكتىلەردىڭ بارلىعى شىعىس قازاقستان وبلىسىنىڭ سۋ تاسقىنىنان زارداپ شەككەن تۇرعىندارىنىڭ وتىنىشتەرىندە كورسەتىلگەن.
ءبىز وسى ماسەلەلەردى پرەمەر-مينيستر باقىتجان ساعىنتاەۆتىڭ اتىنا دەپۋتاتتىق ساۋالمەن جولمەن, اتالعان جايتتاردى قاراستىرۋدى, شەشىمىن تابۋدى سۇرادىق.
نۇرتاي سابيليانوۆ,
ءماجىلىستىڭ ەكونوميكالىق رەفورما جانە وڭىرلىك دامۋ كوميتەتىنىڭ توراعاسى
