ەلباسى نۇرسۇلتان نازارباەۆ وسى ماسەلەگە ەرەكشە نازار اۋدارىپ, استانا قالاسىنىڭ اينالاسىن جاسىل جەلەككە اينالدىرۋ تۋرالى باستامانى قولعا الدى. بۇل نەگىزىنەن اقمولا وبلىسىنداعى كورشىلەس بۋراباي مەن زەرەندىنى تۋريستىك كلاستەرگە اينالدىرۋ اياسىندا جۇزەگە اسىرىلۋدا.
وسىنداي ماڭىزدى جوبالار قولعا الىنىپ جاتسا دا, بۋراباي مەن زەرەندىنىڭ ورمانىن زاڭسىز وتاۋ ازاياتىن ەمەس. ءبىر كوشەتتى وتىرعىزىپ, ءوسىرۋ ءۇشىن ونداعان جىل قاجەت. بىراق ورمانعا جاۋلىقپەن قارايتىندار مۇنى نازارعا دا المايدى. ويتكەنى ولارعا اعاش كەسۋ قۇقىعىن بەرىپ وتىرعان دا – ورماندى قورعاۋعا ءتيىستى مەملەكەتتىك ورگاندار. بىزدىڭشە بۇل قاسكۇنەمدىكتى دەرەۋ توقتاتۋ كەرەك. ابىلاي حاننىڭ اق ورداسى بولعان كيەلى بۋرابايدىڭ اعاشىن زاڭسىز كەسىپ, ءبىر ءتۇپ كوشەت وتىرعىزباۋ – ۇلتتىق ۇلكەن قاسىرەت. بۋرابايدىڭ سۇلۋ تابيعاتى ءبىزدىڭ كوز الدىمىزدا جويىلىپ بارادى.
وتكەن جىلدىڭ وزىندە اقمولا وبلىسىندا 110 زاڭسىز اعاش كەسۋ فاكتىسى تىركەلىپ, جالپى اۋماعى وتىز مىڭداي شارشى مەتردىڭ اعاشى زاڭسىز وتالعانى انىقتالعان.
جاقىندا «اق جول» قدپ ماجىلىستەگى فراكتسياسىنا زەرەندى اۋدانى, قاناي بي اۋىلىنىڭ 75 تۇرعىنى قول قويعان حات كەلىپ ءتۇستى. وندا «كىشى تۇكتى» ورمان شارۋاشىلىعىنىڭ توعىز مىڭداي گەكتار ورمان قورى «جاسىل اعاش» سەرىكتەستىگىنە اعاش كەسىپ, دايىنداۋ ءۇشىن 49 جىلعا پايدالانۋعا زاڭسىز بەرىلگەنى تۋرالى دابىل كوتەرىلگەن. جەرگىلىكتى تۇرعىندارمەن ەشقانداي قوعامدىق تىڭداۋ وتكىزىلمەگەن.
ءدال وسىنداي وقيعا بۋراباي اۋدانىنا قاراستى قارابۇلاق اۋىلىندا دا ورىن الىپ وتىر. كەسىلگەن اعاشتىڭ ورنىنا جاس كوشەتتەر وتىرعىزۋ باعىتىندا دا جۇمىستار جوق دەۋگە بولادى. اعاشتى بۇلاي وتاي بەرسەك, بارلىق جاسىل بايلىعىمىزدان ايىرىلىپ قالامىز. ەلىمىزدە تۋريستىك كلاستەردى جۇزەگە اسىرۋ باستاماسىنا دا بالتا شابىلۋى مۇمكىن. ءبىز وسى ماسەلەلەردى پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى ومىرزاق شوكەەۆتىڭ نازارىنا جەتكىزىپ, ءتيىستى شارا قولدانۋدى وتىندىك.
مەرۋەرت قازبەكوۆا,
ءماجىلىس دەپۋتاتى
